SAME 99 - Ai Vola Tabu Ena Vakavakadewa Vou（FNV）

Me Dokai na Kalou na Tui Cecere

1Sa tui cecere ko Jiova;

Ka ra sa sautaninini na tamata.

Sa tiko o koya ena maliwa ni jerupi;

Ka sa yavavala o vuravura.

2Sa cecere ko Jiova mai Saioni;

Ka sa uasivita na veimatanitu kecega.

3Na tamata kecega ena vakamolimoli ki na yacana dokai ka cecere;

Ni sa dodonu, tabu, ka yalosavasava ga o koya!

4Kemuni na tui kaukauwa, o ni sa dautaleitaka na veika dodonu;

O ni sa vakataudeitaka na lewa dodonu e Isireli;

O ni sa caka dodonu ka vakataulewa vinaka.

5Me laveti ko Jiova na noda Kalou;

Ka cuva ena nona i tikotiko vakatui!

Sa dodonu, tabu, ka yalosavasava o koya!

6O Mosese kei Eroni e rau a nona bete,

Kei Samuela, o koya ka a masu vua;

E ratou a masuti Jiova, ka sa rogo yani vei iratou.

7Sa vosa vei ira o koya ena duru o;

Eratou sa vakabauta na nona i vunau,

kei na i vakaro sa solia vei ira.

8Oi kemuni Jiova, na neimami Kalou,

O ni a rogoci iratou na nomuni tamata;

O ni a vakatakila vei iratou ni o ni sa Kalou dauveivosoti,

Ia, o ni a dau sauma talega na nodra i valavala ca.

9Mo ni vakacaucautaki Jiova na noda Kalou,

Ka sokalou vua mai na nona ulunivanua tabu;

Ko Jiova na noda Kalou sa dodonu, tabu, ka yalosavasava.