JOPE 17 - Ai Vola Tabu Ena Vakavakadewa Vou（FNV）

1Sa voleka sara ni oti na noqu bula.

Sa dredre sara me'u cegu vakavinaka;

Sa sega tale na ka e vo tiko vei au,

Na i bulubulu ga.

2Au sa vakaraica tiko

Na levu ni nodra vakalialiai au na tamata.

3Kemuni na Kalou, oi au na tamata dina.

Ni vakadinata na noqu vosa.

Sa sega tale ni dua me na tokona na ka au sa tukuna.

4O ni sa sogota na veika mai na nodra vakasama;

Ni kakua ni laivi ira me ra vakalevulevui au ena gauna oqo.

5O koya sa veilalitaka na nona i tokani

Me rawata kina na i lavo

Era na qai leqa ga kina na luvena.

6Ena gauna oqo, era sa vakayagataka vei au

Na vosa vakaibalebale oqo;

Ni ra rogoca na tamata,

Era qai lako mai ka mai kasivita na mataqu.

7Na noqu rarawa sa buwawa mai kina na mataqu;

Ka sa vaka ga na i yaloyalo ni ka

Na lila ni ligaqu kei na yavaqu.

8Era sa kurabui o ira era kaya tiko ni ra sa tamata dina,

Ka ra beitaki au kecega ni'u lecava na Kalou.

9O ira era kaya tiko ni ra tamata rokovi,

Sa kaukauwa cake tikoga na nodra vakabauta ni ra sa dodonu tiko.

10Ia kevaka era lako kece mai ka mai tu e mataqu,

Au na sega ni kunea rawa e duabau vei ira ni tamata vuku.

11Sa sivi yani na noqu veisiga;

Sa vodi na noqu i naki;

Sa yali na noqu i nuinui.

12Ia o iratou na noqu i tau

E ratou kainaka ni bogi na rarama ni siga;

E ratou kaya ni sa voleka mai na rarama,

Ia oi au, au sa tiko ga ena butobuto.

13Sa noqu i nuinui duadua ga na nodra vuravura na mate,

Na vanua au na la'ki davo koto kina ka moce ena butobuto.

14Au na qai kaya ni sa tamaqu ga na i bulubulu,

Ka tinaqu ka ra ganequ na baca ni qele era kania na yagoqu.

15Sa qai evei na ka me'u vakanuinui kina?

O cei sa kunea rawa na ka au sa nuitaka?

16Ni'u sa lako ki na nodra vuravura na mate,

Ena sega ni salavata kei au na vakanuinui.