1Sa kalougata o ira era sa sega ni beitaki rawa ena dua na ka,
Ni ra sa muria na lawa i Jiova.
2Sa kalougata o ira era muria na nona i vakaro,
O ira sa vakasaqarai koya ena yalodra taucoko.
3Era sa sega ni cakava e dua na ka ca;
Ni ra sa muria voli ga na sala i Jiova.
4O ni sa solia vei keimami na nomuni lawa
Ka tukuna vei keimami me keimami muria ena yalodina.
5Au nuitaka me'u muria ena yalodina
na nomuni veivakaro.
6Kevaka au muria kece na nomuni i vakaro,
Au na sega sara ni veivutunitaka.
7Ni'u sa vulica na nomuni lewa dodonu,
Au na vakacaucautaki kemuni ena yalosavasava.
8Au na talairawarawa ki na nomuni lawa;
Ni kakua sara ni biuti au.
Talairawarawa ki na Lawa i Jiova (Beta)9Ena maroroya vakacava na nona bula na cauravou me na savasava?
Ni sa muria ga na nomuni i vakaro.
10Au sa tovolea me'u qaravi kemuni ena yaloqu taucoko;
Ni vukei au me'u kakua ni talaidredre ki na nomuni i vakaro.
11Au sa maroroya na nomuni vosa e lomaqu,
Me'u kakua kina ni cala vei kemuni.
12Au sa vakacaucautaki kemuni Jiova,
Ni vakavulici au ena nomuni i vakavuvuli.
13Au na wilika tale vakadomoilevu,
Na nomuni lewa kece o ni a solia.
14Au marautaka cake vakalevu na muria na nomuni vakaro
Mai na levu ni noqu i yau.
15Au na vulica na nomuni vakaro,
Ka dikeva na nomuni i vakavuvuli.
16Au na taleitaka na nomuni vunau,
Ka'u na sega sara ni guilecava na nomuni vosa.
Marau ena Lawa i Jiova (Qimela)17Kemuni Jiova, ni yalovinaka vei au na nomuni tamata dauveiqaravi,
Me'u bula kina ka muria na nomuni vakavuvuli.
18Ni dolava na mataqu me'u raica kina
Na veika dina ka talei ena nomuni lawa.
19Au sa tiko vakavulagi ga e vuravura,
Ni kakua ni vunitaka vei au na nomuni vakaro.
20Sa mosi mai na yaloqu ena vuku ni noqu gagadre,
Ni'u sa vinakata me'u kila na nomuni lewa ena veigauna kecega.
21O ni sa vunauci ira na viavialevu,
Era sa kalouca o ira era sa gole tani mai na nomuni i vakaro.
22Ni vagalalataki au mai na nodra veivakalialiai kei na nodra veibeci,
Baleta ni'u sa talairawarawa ki na nomuni lawa.
23Dina ga ni ra sa bose na i liuliu ka bukiveretaki au,
Oi au na nomuni tamata au na vulica ga na nomuni vakavuvuli.
24Sa vakamarautaki au na nomuni i vakaro,
Era sa noqu daunivakasala.
Yalodina ena Kena Muri na Lawa (Daleca)25Au sa davo druka tu ena soso;
Ni vakaukauwataki au me vaka na nomuni vosa.”
26Au na tusanaka kece na veika au a cakava, ka o ni sa rogoci au;
Ni qai vakavulici au ena nomuni sala.
27Ni vukei au me'u bau kila na nomuni lawa,
Ka'u na qai vakanananu ena nomuni vakavuvuli talei.
28Au sa luvuci ena rarawa;
Ni vakaukauwataki au, me vaka o ni sa yalataka.
29Ni tarovi au ena noqu muria na ka lasu,
Ena nomuni yalovinaka, ni vakavulici au kina ena nomuni sala.
30Au sa vakadeitaka oti me'u na talairawarawa;
Ka'u sa biuta e mataqu na nomuni lewa.
31Au sa muria na nomuni i vakaro i Jiova,
Ni kakua ni laivi au me'u vakamaduataki.
32Au sa taleitaka na muria na nomuni i vakaro,
Baleta ni o ni solia tale vakalevu vei au na kila-ka.
A Masu ni Kere Vuku Vakayalo (He)33Kemuni Jiova, ni vakavulici au ena nomuni lawa,
Ka'u na muria tiko ena veigauna kecega.
34Ni vakamacalataka vei au na nomuni lawa
Ka'u na maroroya ena lomaqu taucoko.
35Ni tuberi au ena sala ni nomuni vakaro,
Baleta ni'u sa kunea kina na marau.
36Ni qisi au me'u taleitaka na muria na nomuni lawa,
Ka me kakua ga na vutuniyau.
37Ni tarovi au me'u kakua ni goleva na ka tawayaga;
Ni yalovinaka vei au me vaka o ni sa yalataka.
38Ni vakayacora na nomuni vosa ni yalayala vei au na nomuni tamata,
O ni a kaya me baleti ira era rerevaki kemuni.
39Ni vakabulai au mai na veivakasewasewani au sa rerevaka;
Sa ka talei dina na nomuni lewa.
40Au gadreva me'u muria na nomuni vakaro;
Ni solia vei au na bula vou, ni o ni sa yalododonu ga.
Vakadinata na Lawa i Jiova (Vau/Wau)41I Jiova, ni vakaraitaka mai vei au na levu ni nomuni lomani au,
Ka vakabulai au me vaka na nomuni vosa ni yalayala.
42Au sa na rawa ni qai sauma na nodra vosa era vakasewasewani au;
Baleta ni'u sa vakadinata na nomuni vosa.
43Ni vukei au me'u tukuna na i tukutuku dina ena gauna kecega,
Baleta ni sa tu na noqu vakanuinui ki na nomuni lewa.
44Au na dau muria tikoga na nomuni lawa,
Ena veigauna kece ka sega ni mudu.
45Au na bula ena galala,
Baleta ni'u sa tovolea me'u muria na nomuni vakavuvuli.
46Au na vunautaka na nomuni vakaro vei ira na tui,
Ka'u na sega sara ni madua.
47Au marau ni'u sa muria na nomuni vakaro,
Baleta ni'u sa taleitaka.
48Au sa rokova ka lomana na nomuni i vakaro.
Au na vakanananu ena nomuni i vakavuvuli.
Nuidei ena Lawa i Jiova (Sayini)49Ni nanuma na nomuni yalayala vei au, na nomuni tamata;
Sa solia ga vei au na vakanuinui tudei.
50Ena gauna ni noqu rarawa, au sa dau yalovakacegu ga,
Baleta ni sa solia vei au na bula na nomuni vosa ni yalayala.
51Era sa beci au na tamata viavialevu,
Ia, au sa sega ga ni gole tani mai na nomuni lawa.
52Ni'u dau vakananuma na nomuni vakatulewa e liu,
Sa dau veivakacegui dina, i Jiova.
53Au sa sinai ena cudru,
Ni'u raici ira na tamata ca ni ra basuka na nomuni lawa.
54Au a bulia na sere me baleta na nomuni i vakaro,
Ena noqu a tu tani voli mai na noqu vale.
55I Jiova, au sa dau vakasamataki kemuni ena bogi,
Ka'u sa muria ga na nomuni lawa.
56Sa i koya oqo na ka au marautaka,
Me'u maroroya na nomuni vakavuvuli.
Yalodina ki na Lawa i Jiova (Keca)57Sa i kemuni ga ka'u sa gadreva;
Au sa yalataka me'u tugana na nomuni vosa.
58Au sa vakatarotarogi kemuni ena vu ni yaloqu taucoko;
Ni yalololoma vei au, me vaka na nomuni vosa ni yalayala!
59Au sa liaca na noqu i vakarau,
Ka'u sa yalataka me'u na muria na nomuni i vakasala.
60Au sa sega tale ni wawa, au sa vakatotolo sara ga
Me'u muria na nomuni i vakaro.
61Era sa vesuki au sara vakaukauwa na tamata ca ena nodra dali,
Ia, au sa sega ga ni guilecava na nomuni vunau.
62Au sa yadra cake ena lomaloma ni bogi
Me'u vakacaucautaki kemuni ena vuku ni nomuni lewa dodonu.
63Au sa nodra i tokani na tamata kecega era qaravi kemuni,
O ira kece era muria na nomuni lawa.
64I Jiova, sa sinai ga o vuravura ena nomuni loloma tudei;
Ni vakavulici au ena nomuni i vakaro.
Na Yaga ni Lawa i Jiova (Teca)65I Jiova, o ni sa vakayacora tikoga na nomuni vosa ni yalayala,
Ka yalovinaka vei au na nomuni tamata.
66Ni solia vei au na vuku kei na kila-ka,
Baleta ni'u sa vakadinata na nomuni vakaro.
67Ni se bera ni o ni a totogitaki au e liu, au a daucakava ga na veika ca,
Ia oqo, au sa talairawarawa ga ki na nomuni vosa.
68O ni sa yalovinaka ka i tovo vinaka,
Ni vakavulici au ena nomuni i vakaro.
69Era sa tukuna na veika lasu na tamata viavialevu me baleti au,
Ia au sa muria tikoga na nomuni vakavuvuli ena lomaqu taucoko.
70Era sa sega ni yalomatua na tamata oqo,
Ia, au sa rekitaka ga na nomuni vunau.
71Sa yaga sara vei au na kequ i totogi,
Baleta ni sa vakavulici au me'u kila na nomuni i vakaro.
72Sa vakaibalebale cake vakalevu vei au na lawa o ni solia
Mai na udolu na tiki ni koula kei na siliva.
Na Dodonu ni Lawa i Jiova (Yota)73O ni a buli au ka taqomaki au tiko;
Ni solia vei au na kila-ka,
ka me'u na vulica rawa kina na nomuni lawa.
74Era na marau ni ra raici au o ira kece era rerevaki kemuni,
Baleta ni'u sa vakanuinui ga ki na nomuni vosa.
75Au sa kila, i Jiova, ni sa dodonu na nomuni lewa,
Ka o ni sa totogitaki au ena vuku ni nomuni yalodina.
76Me qai vakacegui au na nomuni loloma tudei,
Me vaka o ni sa yalataka vei au na nomuni tamata.
77Ni yalololoma vei au, ka'u na qai bula kina;
Ena vuku ni noqu sa rekitaka na nomuni lawa.
78Me ra vakamaduataki na tamata viavialevu
ena nodra beitaki au vakailasu;
Ia oi au, au na dau vakananuma ga na nomuni vakavuvuli.
79Me ra lako mai vei au na rerevaki kemuni
Kei ira era kila na nomuni vakaro.
80Me'u na muria sara vakavinaka na nomuni vakaro
Ka vagalalataki au mai na madua ni druka.
A Masu ni Kere Veisereki (Kafa)81I Jiova, au sa oca mai, ni'u sa waraka na nomuni veivakabulai;
Au sa vakadinata ga na nomuni vosa.
82Sa oca mai na mataqu ena vakaraica tiko na ka o ni a yalataka,
Ka'u sa taroga, “O ni na qai vukei au ni naica?”
83Au sa vaka na bolaniwai kuli ni manumanu sa sega na kena yaga;
Ia, au sa sega ga ni guilecava na nomuni vakaro.
84Ena vakacava soti na dede ni noqu wawa?
O ni na qai totogitaki ira era vakararawataki au ena gauna cava?
85Era sa keli qara, era sa vesuki au,
O ira na tamata viavialevu era sega ni muria na nomuni lawa.
86Sa dina na nomuni i vakaro kecega;
Era sa vakacacani au ena veika lasu!
87Era sa voleka sara ni rawata me ra vakamatei au,
Ia, au sa sega ga ni vakanadakuya na nomuni i vakaro.
88Ni maroroya na noqu bula ena nomuni loloma tudei,
Me'u na muria kina na nomuni lawa.
Vakadinata na Lawa i Jiova (Lameta)89Kemuni Jiova, ena tudei na nomuni vosa ka sega ni mudu;
Sa vakataudeitaki mai lomalagi.
90Sa tudei na nomuni yalodina me yacova na veitabatamata kecega;
O ni sa vakatikora na vuravura ena tikina me tu kina,
ka sa tudei tu ga kina.
91Sa tudei tu ga na veika kece me yacova na siga edaidai
ena vuku ni nomuni i vakaro;
Baleta ni ra sa nomuni dauveiqaravi kecega.
92Kevaka me a sega ni vu ni noqu marau na nomuni lawa,
Ke'u a sa mate ena noqu yalorarawa.
93Au na sega sara ni guilecava na nomuni vakaro,
Baleta ni o ni sa solia kina vei au na bula.
94Au sa nomuni, ni vakabulai au!
Au sa tovolea me'u muria na nomuni vakaro.
95Era sa wawa tiko na tamata ca me ra vakamatei au,
Ia, au na vakanananu ga ena nomuni lawa.
96Au sa vulica rawa ni sa vakaiyalayala na veika kecega;
Ia, na nomuni vakaro sa sega ni vakaiyalayala.
Taleitaka na Lawa i Jiova (Memi)97Au sa taleitaka dina na nomuni vunau!
Au sa vakanananu ga kina ena veisiga taucoko sara.
98Sa tiko kei au na nomuni i vakaro ena veigauna kecega,
Ka sa vakavukui au cake mai vei ira kece na kequ meca.
99Sa levu cake na ka au sa kila mai vei ira na noqu qasenivuli,
Baleta ni'u sa dau vakanananu ena nomuni i vakaro.
100Au sa vuku cake vakalevu mai vei ira na qase,
Baleta ni'u sa muria na nomuni vakaro.
101Au sa tarovi au mai na i tovo ca kecega,
Baleta ni'u sa gadreva me'u muria na nomuni vosa.
102Au sa sega ni guilecava na nomuni vakaro,
Baleta ni sai kemuni o ni a vakavulici au.
103Sa kamikamica dina na nomuni i vakaro,
Io, sa kamikamica cake mai na deni oni!
104Au sa rawata na vuku mai na nomuni lawa,
Ka'u sa cata kina na veitovo ca kecega.
Na Rarama mai na Lawa i Jiova (Nuni)105Na nomuni vosa sa vaka na cina ki na yavaqu
Kei na rarama ki na noqu sala.
106Au na vakayacora na veika ka'u sa yalataka,
Me'u muria kina na nomuni i vakaro dodonu.
107Au sa vakararawataki vakalevu sara, Jiova;
Ni vakabulai au me vaka o ni sa yalataka.
108Ni vakadonuya mada Jiova na noqu masu ni vakavinavinaka,
Ka vakavulici au ena nomuni i vakaro.
109Au sa dau vakarau tu ga me'u taqomaka na noqu bula;
Au sega sara ni guilecava na nomuni lawa.
110Era sa cakava e dua na dai na tamata ca me baleti au,
Ia au sa sega sara ni talaidredre ki na nomuni vakaro.
111Sa noqu i votavota ka sega ni mudu na nomuni i vakaro,
Era sa ka ni reki ga ki lomaqu.
112Au sa vakatulewataka me'u muria na nomuni lawa,
Me yacova na siga au sa na mate kina.
Maroroi ka Taqomaki ena Lawa i Jiova (Sameki)113Au sa cati ira era sa sega ni yalodina vei kemuni,
Ia, au sa taleitaka ga na nomuni vunau.
114Sa i kemuni o ni sa dau maroroi au, ka taqomaki au,
Au sa vakanuinui ki na nomuni vosa ni yalayala.
115Ni lako tani mai vei au na tamata i valavala ca,
Au na muria ga na nona i vakaro na noqu Kalou.
116Ni solia vei au na kaukauwa me vaka o ni sa yalataka, me'u bula kina;
Ni kakua ni laiva me'u vakamaduataki ena ka au sa nuitaka!
117Ni tauri au, au na qai taqomaki vinaka,
Ka'u na qai dau goleva tikoga na nomuni i vakaro.
118O ni sa cati ira kece era cata na nomuni lawa;
Ka sa tawayaga na nodra veinaki ca.
119O ni sa okati ira kecega na tamata ca me vaka na benu,
Ia, au sa lomana ga na nomuni i vakaro.
120Au sa sega sara ni rere ena vukumuni,
Ia, au sa sinai ga ena vakarokoroko ena vuku ni nomuni lewa.
Talairawarawa ki na Lawa i Jiova (Ayini)121Au sa vakayacora na ka sa dodonu ka vinaka;
Ni kakua ni biuti au vei ira na kequ meca!
122Ni yalataka mada ni o ni na vukea na nomuni tamata;
Ni kakua ni laivi ira na tamata ca me ra vakaleqai au!
123Sa oca na mataqu ena vakaraica toka na nomuni veivakabulai,
Na veisereki o ni a yalataka.
124Ni vakayaco lomamuni ga vua na nomuni tamata
me vaka na nomuni loloma tudei,
Ka vakavulici au ena nomuni i vakaro.
125Oi au na nomuni tamata dauveiqaravi, ni solia vei au na kila-ka;
Me'u kila kina na nomuni vakavuvuli.
126Kemuni Jiova, sa kena gauna oqo mo ni cakacaka kina,
Baleta ni ra sa sega ni muria na tamata na nomuni lawa.
127Au sa lomana vakalevu cake na nomuni lawa mai na koula,
Ka vakalevu cake mai na koula dina.
128Ia au sa muria kece na nomuni vakasala;
Au sa cata na veika kecega e cala.
Gadreva mo Muria na Lawa i Jiova (Pe)129Sa ka talei na nomuni i vakavuvuli
Ka'u sa muria ena yaloqu taucoko.
130Na vakamacalataki ni nomuni vakavuvuli sa solia na rarama,
Ka solia na yalomatua vei ira na lecaika.
131Au sa dalaga ena cegu oca,
Ena noqu gadreva voli na nomuni i vakaro.
132Ni vuki mai vei au ka yalololoma vei au,
Me vaka o ni sa dau vakayacora vei ira era lomani kemuni.
133Ni maroroi au me'u kakua ni bale, me vaka o ni yalataka;
Ni kakua ni laiva me vakadrukai au na ca.
134Ni vakabulai au mai vei ira era vakararawataki au,
Me'u muria kina na nomuni vakaro.
135Me serauna mada na nomuni tamata na matamuni,
Ka vakavulici au ena nomuni lawa.
136Sa drodro mai na wai ni mataqu me vaka na uciwai,
Baleta ni ra sa sega ni muria na tamata na nomuni lawa.
Na Dodonu ni Lawa i Jiova (Sade)137I Jiova, o ni sa yalododonu ga,
Ka sa dodonu na nomuni vakataulewa.
138Na lawa o ni sa solia sa vinaka ka dodonu taucoko sara.
139Sa waqa tiko e lomaqu na noqu lomakatakata me vaka na buka
Ni ra sa sega ni kauwaitaka na nomuni i vakaro na kequ meca.
140Sa ka dina na nomuni vosa ni yalayala,
Ka sa lomana sara vakalevu na nomuni tamata.
141Au sa tamata wale ga ka beci,
Ia, au sa sega ga ni cakitaka na nomuni vakavuvuli.
142Ena tudei na nomuni yalosavasava ka sega ni mudu,
Ena dina tikoga na nomuni vunau.
143Au sa vakasinaiti ena leqa kei na rarawa,
Ia, sa vakamarautaki au ga na nomuni i vakaro.
144Sa dodonu na nomuni i vakavuvuli ka sega ni mudu;
Ni solia vei au na kila-ka, au sa na qai bula.
A Masu ni Kere Veisereki (Kofa)145Au sa masu yani vei kemuni Jiova ena yaloqu taucoko,
Ni sauma mai na noqu masu Turaga, au na qai muria na nomuni vakaro.
146Au sa masu vei kemuni,
Ni vakabulai au, au na qai muria na nomuni lawa.
147Ni bera ni cabe na siga au sa masuta yani na nomuni veivuke,
Au sa vakanuinui sara ga ki na nomuni vosa ni yalayala.
148Au davo ka yadra tu ga ena bogi taucoko,
Me'u vakanananu ena nomuni vakaro.
149Ni rogoci au, i Jiova, ena nomuni loloma tudei;
Ni vakatakila na nomuni yalololoma, ka maroroya na noqu bula!
150Era sa voleka mai na dauveivakararawataki ca sara,
O ira na tamata era sega ni muria na nomuni lawa.
151Ia, o ni sa voleka ga vei au, i Jiova,
Ka sa dina na nomuni vosa ni yalayala kecega.
152Au sa kila makawa toka na nomuni i vakaro,
O ni sa vakadeitaka me na sega sara ni mudu.
Kerea na Veivakabulai (Resi)153Ni raica mada na noqu rarawa, ka vakabulai au,
Baleta ni'u sa sega ni cakitaka na nomuni vunau.
154Ni taqomaka na veika e baleti au, ka vakabulai au;
Ni vakabulai au me vaka na nomuni vosa ni yalayala.
155Era na sega ni vakabulai na tamata ca,
Baleta ni ra sega ni muria na nomuni lawa,
156Ni sa levu sara, i Jiova, na nomuni yalololoma;
Ni vakabulai au me vaka ga na nomuni lewa dodonu.
157Sa lewa na kequ meca kei ira era vakararawataki au,
Ia au sa sega sara ni gole tani mai na nomuni lawa.
158Au sa raici ira na tamata sega ni yalodina ena cudru,
Baleta ni ra sega ni muria na nomuni i vakaro.
159I Jiova, ni raica mada na noqu lomana na nomuni i vakaro;
Ni qai vakabulai au me vaka na nomuni loloma tudei.
160Na uto ni nomuni vunau sai koya na dina,
Ka sega ni mudu na nomuni lewa dodonu.
Yalodina ki na Lawa i Jiova (Sini)161Era sa vakacacani au vakatawadodonu na tamata,
Ia, au sa doka duadua ga na nomuni lawa.
162Au sa rekitaka na nomuni vosa ni yalayala,
Me vaka na nona marau e dua sa kunea na i yau levu.
163Au sa cata ka vakasisilataka na ka lasu kecega,
Ia, au sa lomana ga na nomuni vunau.
164Au sa vakavinavinaka vakavitu vei kemuni ena dua na siga,
Ena vuku ni nomuni lewa dodonu.
165Sa ka taucoko na nodra taqomaki o ira sa lomana na nomuni lawa,
Ka sa sega ni dua na ka e rawa ni vakabalei ira.
166Au sa waraki kemuni, i Jiova, mo ni vakabulai au,
Ka'u sa vakayacora na nomuni i vakaro.
167Au sa muria na nomuni i vakaro,
Ka lomana ena yaloqu taucoko.
168Au sa muria na i vakaro kei na nomuni vakasala;
O ni sa raica na ka kecega au cakava.
A Masu ni Kere Veivuke (Tau)169I Jiova, au sa kerea me na yaco sara yani vei kemuni
na noqu masu ni kere veivuke oqo!
Ni qai solia vei au na kila-ka, me vaka o ni sa yalataka.
170Ni rogoca mada na noqu masu,
Ka vakabulai au me vaka na nomuni vosa ni yalayala!
171Au na dau vakacaucautaki kemuni tikoga,
Baleta ni o ni sa vakatavulica vei au na nomuni vunau.
172Au na seretaka na veika me baleta na nomuni lawa,
Baleta ni sa dina ga ka dodonu na nomuni i vakaro.
173Ni vakarau tu ga mo ni vukei au
Baleta ni'u sa muria na nomuni i vakaro.
174Au sa gadreva na nomuni veivakabulai Jiova,
Ka'u sa kunea na marau ena nomuni vunau.
175Ni solia vei au na bula me'u vakacaucautaki kemuni kina,
Me vukei au na nomuni vakasala.
176Au sa veilakoyaki voli me vaka na sipi sa sese,
Ia ni lako mai mo ni vaqarai au na nomuni tamata,
Baleta ni'u sa sega ni guilecava na nomuni vakaro.
Who We AreWhat We EelieveWhat We Do
2025 by iamachristian.org,Inc All rights reserved.
