VOSA VAKAIBALEBALE 27 - Ai Vola Tabu Ena Vakavakadewa Vou（FNV）

1 Jeme 4.13-16 Kakua ni boletaka na ka mo cakava ena siga ni mataka, ni o sa sega ni kila na ka ena yaco ena dua na siga.

2Laivi ira na tani se na kai tani me dokai iko, ia mo kakua ga ni dokai iko vakai iko.

3E sega sara ni dua na ka na bibi ni vatu kei na nuku ni vakatautauvatani kei na leqa e rawa ni vakavuna na lialia.

4Sa dau veivakarusai ka sega ni dau loloma na cudru, ia o cei ena tiko rawa ena matana na dauvuvu.

5E uasivi cake na veivunauci e matanavotu mai na loloma e vunitaki lo.

6E vinaka na i naki ni veivakamavoataki ni i tokani voleka, ia sa dauveivakacalai ga na i regu ni meca.

7A tamata e sa mamau sa cata na qani oni, ia sa kamikamica ga na ka kece veitalia ni gaga ki vua sa viakana.

8Sa vaka na manumanu vuka sa dro mai na nona sova na tamata sa lako yawa mai na nona i tikotiko.

9Na i vakaboi vinaka kei na waiwai boi vinaka sa vakamarautaka na yalo, kei na veiwekani voleka sa vakayaloqaqataka na yaloda.

10Kakua ni biuti ira na nomu i tokani se na i tokani nei tamamu e tiko sara vakayawa.

11Mo yalomatua na luvequ au na qai marau. Ena qai tu vei au na ka me'u kaya vei ira kece era vakalewai au.

12Na tamata yalomatua ena raica ni sa yaco mai na leqa ena taqomaki koya, ia na tamata yalowai ena lako ga yani kina ka na qai veivutunitaka e muri.

13Na tamata lialia e yalataka me sauma na nona dinau na kai tani e dodonu me vesu na ka e taukena me i vakadei ni kena saumi na dinau.

14O koya sa vosa vakalougatataka na wekana vakadomoilevu ena mataka caca sara, ena rawa me okata o koya sa vosa vakalougatataki me ruru.

15Na yalewa vakawati dauvakatubu veileti, sa tautauvata kei na turu ni wai sa sega ni mudu ena dua na siga ucauca.

16Ni o tovolea mo vagalui koya, sa tautauvata kei na via tarova na cagi; se o koya e via taqomaka na waiwai e sinai tu e ligana.

17Na kaukamea e vagatara na kaukamea me vaka na nona vuku na tamata mai na dua tale na tamata.

18O koya sa qarava vinaka e dua na vunilolo ena kania na vuana. Na dauveiqaravi ena qarava vinaka na nona turaga ena dokai.

19Na matamu o na ilova ena wai me vaka ga na nomu raici iko vakai iko ena yalomu.

20Na gagadre ni tamata ena sega ni mamau rawa me vaka na nodra vuravura na mate na kena sega ni sinai rawa.

21Na koula kei na siliva e dau vakatovolei ena buka. Na kena i rogorogo e dua na tamata sa rawa talega me vakatovolei tale kina o koya.

22Kevaka sara mada ga o mokuta e dua na lialia me voleka sara tu ni mate, ena sega sara ni oti kina na nona lialia.

23Vakatawa vinaka sara na nomu qele ni sipi kei na bulumakau,

24baleta ni sa sega ni ka tudei na i yau. Era sa sega talega ni ka tudei vakadua na veimatanitu.

25Sa takali yani na co ka sa tubu vou tale mai, ia sa la'ki musu mai na co drokadroka ena veibaba.

26O ni sa rawa ni cakava na i sulu mai na vuti ni sipi ka voli qele mai na i lavo sa rawati mai na nomuni volitaka eso na nomuni me.

27Na vo ni nomu me era na vakarautaka na memu sucu kei na sucu me baleta na nomu vuvale, ka vakakina o iratou na nomu yalewa dauveiqaravi.