LAKO YANI 25 - Ai Vola Tabu Ena Vakavakadewa Vou（FNV）

Solisoli ki na Vale Tabu(Lako 35.4-9)

1Sa kaya vei Mosese ko Jiova;

2“Tukuna vei ira na Isireli me dua na nodra tausoli vei au. Mo taura kece sara na i solisoli vakayadua ga sa vakauqeti kina na tamata me ra solia.”

3Na veisolisoli oqo me okati kina na: koula, siliva, kei na parasa;

4na lineni matailalai; na vuti ni sipi roka karakarawa, lokaloka kei na damudamu; na i sulu kuli ni me;

5na i sulu kuli ni sipi tagane e rokataki ena wai damudamu; na kuli-ni-manumanu vinaka; na kau akasia;

6na waiwai ni cina; na i saluwaki ni waiwai ni veilumuti kei na ka boi vinaka me vakamai;

7na vatu talei na kaneliani kei na veivatu talei tale eso me semati vinaka ki na i sulu ni lomaserena kei na nona efoti na Bete Levu sara.

8O ira na tamata me ra cakava e dua na i tikotiko tabu me noqu, me rawa kina ni'u tiko vata kei ira.

9Me caka oqori kei na veika tale eso mai na kena muri sara vakadodonu na i tuvatuva au na solia.

Na Kato ni Veiyalayalati(Lako 37.1-9)

10“Me ra cakava e dua na kato ena kau akasia, me 110 na senitimita na kena balavu, me 66 na senitimita na kena raba, ka me 66 na senitimita na kena cere.

11Me qai boroi na loma ni kato kei na dakuna ena koula dina, ka cakava na batibatina kece sara ena koula.

12Me caka talega ena koula na kena i tubetube e ra, ka me biu ena yasa ni yavana vava, me yarua kina na i tubetube ena yasana ruarua.

13Me caka talega na kena i vua ena kau akasia ka ubi ena koula

14ka me qai daramaki ena kena i tubetube ena yasa ni kato ruarua.

15Na i vua oqo e dodonu me tiko ga ena kena i tubetube ka me kakua sara ni kau laivi ena dua na gauna.

16Me qai biu ki na loma ni kato na vatu raraba e rua ka'u na solia vei iko, o koya ka volai tu kina na i vunau.

17“Mo cakava na kena i sogo ena koula dina, me 110 na senitimita na kena balavu ka 66 na senitimita na kena raba.Na i Tutu ni Cina(Lako 37.10-17)

31“Mo cakava e dua na i tutu ni cina ena koula. Me caka na kena i tutu kei na duru ena koula tuki, na kena i ukuuku, na senikau, na draunikau talega kei na bilo me sema vata kina.

32Me ono na tabana me ra veisemati vata kina, me yatolu na tabana ena yasana ruarua.

33Ena ono na tabana oqo me tiko kina e tolu na senikau me vaka na se ni alamodi ni sa seraki tu ka me tu talega na kena e sa bera ni se ka se kubu tu.

34Ia ena i tutu ni cina donu e loma me va na kena senikau me vaka na se ni alamodi me tu talega na sena e sa kubu tu.

35Ia me dua na sena e sa kubu ena ruku ni ono na tabana.

36Na kena e kubu, na tabana kei na i tutu ni cina, oqo me caka ga ena koula e duabau ga ni sa tuki.

37Mo cakava e vitu na cina mai na i tutu ni cina ka vakaduria me rawa ni rarama yani ki liu.

38Me caka na i qiso ni buka kei na disi ni dravusa ena koula dina.

39Mo vakayagataka e 35 na kilokaramu na koula dina me caka kina na i tutu ni cina kei na kena i yaya talega.

40Ia mo qarauna matua mo cakava oqo me vaka na kena i tuvatuva au a vakaraitaka vei iko mai na ulunivanua.