VOSA VAKAIBALEBALE 26 - Ai Vola Tabu Ena Vakavakadewa Vou（FNV）

1Na veivakacaucautaki e sega ni dua na kena yaga vua na tamata lialia me vaka na wai cevata ena vula i katakata se na uca ena vula i tatamusuki.

2Na vosa ni veivakasewasewani ena sega ni mosi vei iko vakavo ga kevaka e tau yani me baleti iko. Era sa vaka ga na manumanu sa vuka yani ka ra sega ni ro.

3Na kuita me baleta na ose, na i tarovi me baleta na asa, ia na kau me na moku kina na tamata lialia.

4Kevaka o sauma e dua na taro lialia, o sa lialia talega me vakataki koya e taroga.

5Ni o solia e dua na i sau ni taro lialia me saumi kina e dua na taro lialia, ena vakila kina o koya e taroga ni sega ni vuku me vaka e nanuma.

6Na tamata e tala e dua na tamata lialia sa taya musuka ga na yavana; sa vaqara ga na leqa.

7Me vaka na kena lili wale toka ga na yavana na tamata lokiloki, sa vakakina na vosa vakaibalebale ena gusuna na tamata lialia.

8Na vakacaucautaka na tamata lialia e vaka ga na vesuka e dua na vatu levu ki na dua na i rabo.

9Na tamata lialia e cavuta e dua na i vosavosa vuku e vaka e dua na mateni ni via cavuta e dua na voto ni kau mai na ligana.

10Na tamata e sauma me cakacaka e dua na tamata lialia e lako mai ki na nona vale, ena vakamavoataki ira kecega na tamata.

11 2Pita 2.22 Na tamata lialia e cakava vakarua e dua na i vakarau lialia e vaka na koli e lesuva tale na nona lua.

12Na tamata lialia sara e vinaka cake mai vua na tamata e nanuma vakai koya ni sa vuku, ia sa sega ni vuku o koya.

13Sa kaya na tamata vucesa, E dua na laione sa tiko ena gaunisala, sa tiko na laione e tautuba.

14Me vaka na i sogo ni katuba sa veitosoyaki ena kena i ruberube, sa veivukiyaki vakakina na tamata vucesa ena nona i davodavo.

15Eso na tamata era sa vucesa mada ga ni biuta na kakana ki na gusudra.

16Na tamata vucesa e nanuma ni vinaka cake mai na vitu na tamata era rawa ni vakaraitaka na veika vinaka me baleta na nodra vakasama.

17Na vakaitavi ena dua na veileti o sega ni yaga kina e vaka na lako sobu ena dua na gaunisala ka qai vesuka e dua na koli ena daligana.

18Na tamata e vakaisina e dua tale na tamata ka qai kaya ni veiwali ga,

19e tautauvata kei na tamata lialia sa vakasaga na ka sa rawa kina na mate.

20Ni sega na kau ena boko na buka, ia ni sega na kakase sa na sega na veivala.

21Na qilaiso waqa sa vakawaqara na qilaiso; na kau sa vakawaqara tikoga na buka sa vakakina na tamata dauvakatubu ca, sa vakavuna tikoga na veivala.

22Sa ka kamikamica na kakase, eda sa dau vinakata tikoga me da cakava.

23Na vosa vinaka sa sega ni dua na ka e vunitaki kina na ka dina e tiko e lomada, sa vaka e dua na iloilo yagoyago vinaka ena dua na dela ni kuro qele caca wale.

24Na dauveivakaisini ena vunitaka na nona yalo ca ena nona vosa veicavilaki.

25Ena rogo vinaka sara na nona vosa, ia kakua sara ni vakabauti koya baleta ni sa sinai na yalona ena veicati.

26Ena rawa me vunia na nona veicati, ia era na raica na tamata kece na veika ca e cakava.

27O koya sa kelia na i keli ena sikalutu tale kina kei koya sa vaqiqica na vatu ena bikai koya tale.

28Na yame lasulasu sa vosa vakacacataka vakailasu na tamata e cata. Na vosa vinaka veivakaisini sa kauta ga mai na veivakarusai.