AISEA 15 - Ai Vola Tabu Ena Vakavakadewa Vou（FNV）

Na Kalou ena Vakarusai Moapi

1 Aisea 25.10-12; Jere 48.1-47; Isi 25.8-11; Emo 2.1-3; Sefa 2.8-11 Oqo na i tukutuku e baleti Moapi.

E rau sa vakarusai o Ari kei Kiri ena dua ga na bogi

Ka sa mai vakanomodi tu yani na vanua taucoko o Moapi

2Era sa cabe cake na lewe i Taiponi

Me ra tagi ena i cabocabonisoro.

Era sa tagicaki Nipo kei Meteva na kai Moapi,

Ka ra sa toroya na uludra kei na kumidra ena rarawa.

3Era sa vakaisulu ena taga na tamata era tu e gaunisala

Ka ra tagi na tui ena veidela ni vale

Kei ira na tu ena veiloma ni bai.

4Era tabalaka cake na tagi na kai Esiponi kei Elale,

Ka rawa ni rogoci sara na domodra mai Jeasa.

O ira sara mada ga na sotia ni Moapi,

Era sautaninini ka ra taqaya.

5Sa tagi na lomaqu ena vuku i Moapi,

Era sa dro na tamata ki na koro o Soa,

Ka so era cabeta cake na sala ki Luici,

Ka ra tagi voli ena nodra lako yani.

Eso era dro ki Oroneimi,

Ka qolou ena tagi ni veivakarusai.

6Sa maca na wai ena uciwai na Nimirimi,

A ra sa malai na co e yasana,

Ka sega na ka drokadroka e vo.

7A ra sa lako kosova na qakilo ni veikuta na tamata

Ena nodra via drotaka yani na nodra i yau kece.

8Ia sa rogo na domo ni tagi

Ena loma i Moapi taucoko;

Ka sa rogo yani o Ekilami kei Pierielimi.

9Sa sinai na uciwai mai Taiponi ena dra,

Ka sa tiko talega vua na Kalou

Eso na ka mosimosi cake vei ira na kena tamata.

Ia ena yaco e dua na veivakamatei vakadomobula

Vei ira na vo-ni-bula e Moapi.