VOSA VAKAIBALEBALE 21 - Ai Vola Tabu Ena Vakavakadewa Vou（FNV）

1Sa lewa ko Jiova na vakasama ni tui me vaka na rawarawa ni nona lewa na vanua me drodro kina na uciwai lailai.

2A sala kece ni tamata sa rairai dodonu ga vua, ia sa dikeva ko Jiova na yalo ni tamata.

3Na kena vakayacori na ka e dodonu ka savasava sa taleitaka vakalevu cake ko Jiova mai na vakacaboisoro.

4Era sa lewai na tamata dauveivakaisini mai na nodra viavialevu kei na dokadoka, ka sai valavala ca oqo.

5Ni o vakavakarau vinaka, ena levu na ka o rawata; ia ke o rui vakatotolo, ena sega ni veirauti na ka o rawata.

6Na i yau o rawata mai na sala vakatani ena yali yani, ia ena kauti iko mada e liu ki na katuba ni mate.

7Na nodra i tovo kaukauwa na tamata ca ena vakarusai ira ga; era sa bese ni cakava na ka dodonu.

8Era sa muria na sala veve na tamata era kila tiko ni ra cala; ia era sa cakava ga na ka dodonu na tamata cakacaka vakadodonu.

9E vinaka cake me da la'ki tiko vakatikitiki e dela ni vale, ka ca ni da tiko vata e vale kei na marama watida dauveileti.

10Na tamata ca sa guta vakalevu na veika ca; ka sa sega ni bau lomana e dua na tamata.

11Ni sa cudruvi na dauveivakalialiai, sa vuku kina na yalowai; ia ni sa vakavulici na yalomatua, sa kila-ka kina.

12Na Kalou, o Koya na Yalododonu sa dikeva na nodra vale na tamata ca, ka sa vakavuna na nodra rusa.

13Kevaka o bese ni rogoca na tagi ni tamata dravudravua, ena sega ni rogoci na nomu tagi ni kere veivuke.

14Kevaka e dua e cudruvi iko tiko, ena oti na nona cudru ke soli lo vua e dua na i loloma.

15Ni vakayacori na ka dodonu, era marau kina na tamata yalododonu, ia era domobula kina na tamata ca.

16O koya sa gole tani mai na sala ni yalomatua ena la'ki cava ena nodra i soqosoqo na mate.

17O koya sa dautaleitaka na marau kei na lasa, ena yaco me dravudravua; kei koya sa dauvinakata na waini kei na waiwai ena sega ni rawa ni vutuniyau.

18Ena yacovi ira ga na tamata ca na veika ca era via cakava vei ira na tani.

19E vinaka me da tiko ena dua na vanua lala ka ca na tiko vata kei na marama watida dauveileti ka daucudru.

20Sa tiko e nona vale na tamata yalomatua na kakana kei na waiwai, ia na tamata yalowai sa kania kece na veika e tu vua.

21O na bula balavu kevaka o tamata yalovinaka ka daucakacaka vakadodonu; era na dokai iko ka caka vinaka vei iko na tani.

22Na tamata yalomatua sa vakadruka rawa na nodra koro na qaqa, ka talaraka sobu na veiyavu kaukauwa era dauvakararavi kina.

23Kevaka o vinakata mo kakua ni coko ena dua na leqa ia mo qarauna vinaka na ka o tukuna.

24Mo dusia mada vei au e dua na tamata dokadoka ka'u na qai dusia vei iko e dua na tamata qaciqacia, viavialevu, ka sega ni dauveikauwaitaki.

25Na gagadre ni tamata vucesa e rui rerevaki, baleta ni ra dau bese ni cakacaka na liga vucesa.

26Ena siga yadua era sa vakananuma na ka era garova, ia o ira na yalododonu era sa lomasoli ena dausolisoli.

27A nodra i soro na tamata ca sa ka vakasisila; sa qai ca vakalevu ni cabori ena yalo vakatani.

28A i vakadinadina lasu ena rusa, ia na tamata dauvakarorogo vinaka ena vakabauti na nona vosa.

29A tamata ca sa vakaukauwataka na matana, ia na tamata yalododonu sa dikeva vinaka na nona sala.

30Sa sega na vuku, se na kila-ka, se na i vakasala me uasivi cake mai vei Jiova.

31Sa rawa ni vakarautaki tu na ose me la'ki valu, ia na qaqa ena solia duaduaga ko Jiova.