1Era sa kauta mai na Kato ni Veiyalayalati ka la'ki biuta ena loma ni valelaca sa vakarautaka oti tu o Tevita. Era a qai vakacabora na i soro kama eso kei na i soro ni veivinakati vua na Kalou.
2Ni sa vakacabora oti o Tevita na i soro kece sara, sa qai vosa vakalougatataki ira na tamata ena yaca i Jiova
3ka vota vei ira yadua kece sara na kakana. A sa solia vei ira yadua na tagane kei na yalewa e tau yadua na i buli madrai, e dua na tiki ni lewe ni manumanu tavu, vata kei na qerepi mamaca.
4Sa qai lesia o Tevita eso vei ira na Livai me ra liutaka na sokalou vei Jiova na Kalou ni Isireli ena mata ni Kato ni Veiyalayalati, ka me ia na lagalaga sere kei na vakamolimoli vua.
5A lesi kina o Esava me kena i liuliu, ka me nona i vukevuke o Sakaraia. Ia me ratou dauqiria na api o Jieli, o Simiramoci, o Jeieli, o Maticaia, o Iliavi, o Penaia, o Opeti Itomi vata kei Jieli. O Esava me dauqiria na sibali,
6ka me rau dau uvuca vakawasoma tiko na davui ena mata ni Kato ni Veiyalayalati oi rau na bete o Penaia kei Jesieli.
7Sa i koya o ya na i matai ni gauna me solia kina o Tevita vei Esava kei ira na Livai na i tavi ni kena lagati na veisere ni vakavinavinaka vei Jiova.
A Sere ni Vakavinavinaka(Same 105.1-15; 96.1-13; 106.1,47,48)8Dou ia na vakavinavinaka vei Jiova, dou kacivaka yani na nona lagilagi;
Dou tukuna ki na veimatanitu na veika sa vakayacora.
9Dou sere vei Jiova;
Dou tukuna na veika talei sa cakava.
10Dou marau ni da sa wili me nona;
Io me marau na lomadra era sa qaravi koya!
11Dou goleva na veivuke nei Jiova,
Ka cuva tikoga vua ena veigauna.
12Dou nanuma na nona cakacaka veivakurabuitaki sa vakayacora oti,
Na nona cakacaka mana, kei na lewa sa vakatauca.
13Oi kemudou na kawa i Isireli na nona tamata,
Oi kemudou na luve i Jekope, na nona digitaki.
14Ko Jiova ga sa noda Kalou;
Na nona i vakaro sa roboti vuravura taucoko.
15Dou kakua ni guilecava na veiyalayalati ni Kalou,
Ka sa vakayacora o koya me yacova na tawa mudu,
16na veiyalayalati erau sa cakava kei Epara-ama,
kei na nona bubului kivei Aisake.
17A sa veiyalayalati ko Jiova kei Jekope,
a veiyalayalati sa tawa mudu.
18A sa kaya, “Au na solia vei iko na vanua o Kenani,
Ai votavota mo dou taukena vakadua.”
19Era sa lewe lailai ga na tamata ni Kalou,
Era sa vulagi ki na vanua o Kenani.
20Era sa lako mai na dua na vanua ki na dua tale,
Mai na dua na matanitu ki na dua tale.
21Ia sa sega ni vakatara na Kalou e dua me vakacacani ira;
Me baleta na nodra taqomaki, a sa vunauci ira kina na tui vakaoqo:
22“Kakua ni vakacacani ira na noqu tamata digitaki;
Kakua ni tarai ira na noqu parofita.”
23Dou sere vei Jiova, na vuravura kecega!
Kacivaka voli e veisiga na i tukutuku vinaka ni nona vakabulai keda.
24Kacivaka na nona lagilagi ki na veimatanitu,
Na nona cakacaka talei vei ira na tamata kecega.
25Ni sa cecere ko Jiova, ka sa dodonu me vakacerecerei vakalevu;
Sa dodonu me rokovi vakalevu cake mai vei ira na kalou kecega.
26Ni ra sa matakau kecega na nodra kalou na veimatanitu tani,
Ia ko Jiova ga sa bulia na lomalagi.
27Sa wavoliti koya na i serau kei na lagilagi,
Na kaukauwa kei na reki sa vakasinaita na nona i tikotiko.
28Dou vakalagilagi Jiova na lewe i vuravura kecega,
Dou vakacaucautaka na nona i serau kei na nona kaukauwa.
29Dou vakacerecerea na yaca lagilagi i Jiova;
Dou kauta mai na i solisoli me cabori ka curu ki na nona vale tabu.
Dou cuva ena mata i Koya sa Yalosavasava ni sa rairai mai;
30dou sautaninini e matana na vuravura kecega!
Sa tudei o vuravura ena kena i tutu, ka na sega ni yavalati rawa.
31Me reki o lomalagi, ka marau o vuravura!
Me tukuni ki na veimatanitu ni sa tui ko Jiova.
32Me vadugu na wasawasa, kei na veika bula era tiko kina;
Me reki na veivanua kei na veika kece era bula kina.
33Na veivunikau mai veikau era na kaila ena marau
Ni sa lako mai ko Jiova me lewai vuravura.
34Dou ia na vakavinavinaka vei Jiova, ni sa yalovinaka o koya;
Ni sa sega ni mudu na nona loloma.
35Dou kaya vua, “Ni vakabulai keimami, na Kalou na neimami i Vakabula;
Ni vakasoqoni keimami vata, ka vueti keimami mai vei ira na veimatanitu,
Me keimami vakasinaiti kina ena yalo ni vakavinavinaka,
Ka vakalagilagia na yacamuni tabu.”
36Me vakavinavinakataki ko Jiova, na nodra Kalou na Isireli!
Me vakacaucautaki ena gauna oqo ka tawa mudu!
Era sa qai kaya na tamata kece sara, “Emeni!”, ka vakavinavinakataki Jiova.
Na Sokalou e Jerusalemi kei Kipioni37A sa lesi Esava kei ira na wekana na Livai o Tevita na tui me ra liutaka na kena qaravi na sokalou ena tikina sa koto kina na Kato ni Veiyalayalati. Era sa lesi me ra vakayacora na nodra i tavi oqo ena veisiga me vaka na kena i valavala.
38A veivuke vei ira o Opeti Itomi na luve i Jitucuni tagane kei na 68 na lewe ni nona mataqali. E rau a lesi o Opeti Itomi kei Osa me rau liutaka na kena yadravi na matamata.
39O Setoki na bete kei ira na nona i tokani vakabete sa nodra i tavi na veiqaravi vei Jiova ena vanua ni sokalou e Kipioni.
40Era dau vakacabora tiko na i soro kama taucoko ena dela ni cabocabonisoro ena veimataka kei na veiyakavi, me muria na veika kecega sa volai ena Lawa sa vakarota ko Jiova vei ira na Isireli.
41A sa tiko vata kei ira e kea o Imani kei Jitucuni, vata kei ira na kena vo era sa digitaki me ra seretaka na vakavinavinaka vei Jiova ena vuku ni nona loloma tawa mudu.
42A sa nodrau i tavi talega o Imani kei Jitucuni na liutaki ni kena uvuci na davui, kei na qiriti ni sibali kei na i yaya ni vakatagi tale eso ena gauna e lagati kina na sere eso ni vakavinavinaka vua na Kalou. Era a lesi na lewe ni mataqali i Jitucuni me ra dau yadrava na matamata.
43Era sa qai dui lesu ki na nodra i tikotiko na tamata kecega, ka sa lesu talega o Tevita me la'ki tiko vata mada kei iratou na nona lewe ni vuvale.
Who We AreWhat We EelieveWhat We Do
2025 by iamachristian.org,Inc All rights reserved.
