SAME 37 - Ai Vola Tabu Ena Vakavakadewa Vou（FNV）

Na Vinaka ni Vosota kei na VakabautaA nei Tevita.

1Kakua ni taqaya ena vukudra na tamata ca;

Kakua ni vuvutaki ira era daucaka cala;

2Era na takali yani me vaka na co madu,

Ka ra na mate me vaka na kau sa malai.

3Mo vakadinati Jiova ga ka cakava na ka dodonu,

O na qai tawana tikoga na vanua ka taqomaki vinaka.

4Vakasaqara na nomu marau vei Jiova

Ena qai solia vei iko o koya na ka sa gadreva na yalomu.

5Mo solia na nomu bula vei Jiova;

Vakadinati koya, ena qai vukei iko o koya;

6Ena cakava o koya me serau na nomu vinaka

me vaka na rarama,

Kei na nomu yalododonu me vaka na rarama ni siga

ena sigalevu tutu.

7Tiko vakanomodi ena mata i Jiova ka waraki koya tiko;

Kakua ni loma leqa ena vukudra era tiko vinaka

Se ena vukudra era rawata vinaka na nodra i naki ca.

8Kakua ni rawai ena lomaleqa kei na cudru;

Ena tini ga ki na leqa.

9O ira era vakadinati Jiova era na taukena na vanua;

Ia, o ira ga na tamata ca era na vakasavi tani.

10Ena sega soti ni dede era sa na takali yani na tamata ca,

O na qai vaqarai ira, ia o na sega ga ni raici ira tale.

11 Maciu 5.5 Ia, o ira sa yalomalua era na taukena na vanua,

Ka marautaka na bula sautu.

12Sa bukiveretaka na tamata yalododonu o koya na tamata ca

Ka marautaka na bula sautu.

13Ia, ena dredrevaka koya na Turaga,

baleta ni sa kila ni sa vakarau vakarusai.

14Era sa ucuna na nodra i seleiwau na tamata ca,

ka loveca na nodra dakaititi,

Me ra vakamatei ira kina na dravudravua kei na vakaloloma,

Ka mokuti ira na tamata daucakacaka vakadodonu;

15Ia, era na lausua ga ena nodra i seleiwau,

Ka musulaki na nodra dakaititi.

16Sa vinaka cake na ka lailai e taukena na tamata yalododonu

Mai na i yau levu e taukena na tamata sega ni yalododonu,

17Ni na kauta tani ko Jiova na nodra kaukauwa na tamata ca,

Ia, ena taqomaki ira ga na tamata i vakarau dodonu.

18Sa taqomaki ira era talairawarawa vua ko Jiova

Ka ra na taukena na vanua ka sega ni mudu.

19Era a sega ni sotava na ka rarawa ena veigauna ca,

ka na levu tu ga na kedra ena gauna ni dausiga.

20Ia, era na vakamatei ga na tamata i tovo vakasisila;

Kei ira na meca i Jiova era na takali yani

me vaka na senikau ni vanua ni veikau;

Era na seyavu yani me vaka na kubou.

21Ni ra dinau na tamata ca, era sa sega ni dau sauma lesu tale;

Ia, sa dau lomasoli ga ka yalovinaka na tamata yalododonu.

22O ira sa vakalougatataki ira na Turaga

era na tiko ka taqomaki vinaka ena nodra vanua.

Ia, era na vakasavi tani yani o ira era sa cudruvi mai vua.

23Sa dau tubera na tamata ko Jiova

ena sala sa dodonu me lako kina,

Ka sa taleitaka na nona i valavala.

24Kevaka sa bale, ena sega ni davo tu ga

Baleta ni na vakaturi koya cake tale ko Jiova.

25Au sa qase mai oqo oi au; ka'u sa bula balavu mai,

Ia, e sega mada ni'u se bau raica

me biuti ira tu na yalododonu ko Jiova,

Se me ra kere kakana tu na luvedra.

26Era sa dau lomasoli ga ena veigauna kecega

ka dau soli-ka vei ira na tani,

Ka ra sa yaco me ra ka ni veivakalougatataki na luvedra.

27Gole tani mai na ca ka cakava na ka vinaka,

O na qai bula sautu tiko ena veigauna kecega,

28Baleta ni vinakata ko Jiova na ka dina

Ka sega ni biuti ira na nona tamata yalodina.

Sa dau taqomaki ira tikoga,

Ia, na luvedra na tamata ca era na vakasavi tani yani.

29Era na taukena na vanua na yalododonu

Ka ra tiko ga kina ka sega ni mudu.

30Sa vosataka na vosa vuku na tamata yalododonu,

Ka tukuna na veika dina.

31Sa maroroya na lawa ni Kalou ena yalona o koya

Ka sa sega ni gole tani mai kina.

32Sa dau vakaraica matua na yalododonu na tamata ca,

Ka sa dau saga me vakamatea.

33Ia, ena sega ni soli koya vua na tamata ca ko Jiova

Se soli koya me vakacacani ena nona vakatovolei.

34Mo vakadinati Jiova ga ka muria na nona i vakaro;

Ena solia vei iko na kaukauwa mo taukena na vanua,

O na raica talega na nona vakasavi tani na tamata ca.

35Au a dau kila e dua na tamata ca ka i tovo kaukauwa sara,

Sa tubu sivisiviti ira kecega me vaka na sitari mai Lepanoni.

36Ia, sa qai yali ga ena noqu lako sivita ena dua na gauna e muri

Ni'u a qai vakasaqarai koya, ka'u sa sega ga ni kunea.

37Vakadikeva na tamata yalododonu, ka raica na tamata vinaka;

Ena dau tiko ga na nodra kawa na tamata yalomalua.

38Ia o ira na tamata i valavala ca era na vakarusai vakadua,

Ka ra na vakawabokotaki na nodra kawa.

39Sa vakabulai ira na yalododonu ko Jiova

Ka taqomaki ira ena gauna ni leqa.

40Sa dau vukei ira ka sereki ira;

Sa dau vakabulai ira mai vei ira na tamata ca ko Jiova

Baleta ni ra sa dau vakaruru ga e rukuna.