JOSUA 16 - Ai Vola Tabu Ena Vakavakadewa Vou（FNV）

Vanua e Nodra na Ifereimi

1Na vanua ka nodra i votavota na kawa i Josefa a tekivu mai na Joritani volekati Jeriko, ena tokalau ni veivurevure ni wai e Jeriko ka gole yani ki na vanua lala. A lako mai Jeriko ki na vanua veidelana me yaco sara ki Peceli.

2Mai Peceli a gole vaka ki Lusa, ka lako yani ki Ataroci Atari na nodra i tikotiko na Ariki.

3Sa qai gole yani ki na i dromudromu ni siga ki na nodra vanua na Jofiliti me yaco yani ki na muana sara e ra ni vanua o Peci Oroni. Mai kea ki Keseri me yaco sara ki na Wasa Meditereni.

4Era sa taura na vanua oqo me nodra i votavota o ira na kawa i Josefa, o ya o ira na veimama ni mataqali i Manasa kei na mataqali i Ifereimi.

5Oqo na nodra vanua na veivuvale ni mataqali i Ifereimi: na nodra i yalayala e vakatekivu mai Ataroci Atari ka gole vaka ki na tokalau me yaco sara ki na muana e cake ni vanua o Peci Oroni,

6ka lako yani mai kea ki na Wasa Meditereni. Sa koto ena kena vualiku o Mikimecaci. Mai kea a sa gole yani vaka ki Tenaci Sailo, ia sa lako ravita ga na yasana ki na tokalau me yaco sara ki Janoa.

7Mai Janoa ki Ataroci, Neeraci kei Jeriko, ka yaco sara ki na Joritani.

8Mai Tapua a cici yani na i yalayala ki na ra ni uciwai o Kana ka yaco sara yani ki na Wasa Meditereni. Oqo na vanua a soli me nodra i votavota na veimatavuvale ni mataqali i Ifereimi me ra taukena,

9vata kei na koro lelevu kei na koro lalai eso, ka toka ena nodra vanua na Manasa, ia a soli ga me nodra na Ifereimi.

10Ia era sega ni mani vakasavi ira tani rawa na kai Kenani ka ra vakaitikotiko mai Qasa. Era a bula maliwai ira na Ifereimi o ira na kai Kenani me yacova na siga oqo, ia era a vakasaurarataki ira ga me ra cakacaka me vaka na bobula.