SAME 41 - Ai Vola Tabu Ena Vakavakadewa Vou（FNV）

A Masu ni Tamata Tauvi MateVua na i liuliu ni sere. A Same i Tevita.

1Sa kalougata na tamata sa kauwaitaka na dravudravua,

Ena vukei koya ko Jiova ena gauna e leqa kina.

2Ena taqomaki koya ko Jiova ka maroroya na nona bula,

Ena vakalougatataki koya na Turaga ena vanua e tiko kina;

Ka na sega ni soli koya ki na ligadra na nona meca.

3Ena vukei koya ko Jiova ni sa tauvi mate

Ka vakabulai koya mai na mate kecega.

4Au a kaya, “Au sai valavala ca vei kemuni Jiova;

Mo ni lomani au ka vakabulai au!”

5Era sa kaya na veika ca na kequ meca.

Era vinakata me'u mate ka guilecavi.

6O ira era sa na mai sikovi au era sa sega ni vosa dina;

Era sa kumuna kece na i tukutuku ca baleti au

Ka qai lako yani ka tukuna ena veiyasana kecega.

7O ira kecega sa cati au, era sa veivosakitaki au lo vakai ira;

Era sa vakananuma na ka ca duadua me baleti au.

8Era sa kaya, “Sa tauvi mate bibi sara o koya,

Ka sa na sega ni bula tale mai kina.”

9 Maciu 26.23; Mari 14.18; Luke 22.21; Joni 13.18 O koya mada ga na noqu i tokani vinaka,

o koya au dau vakadinata ka vota vata na kequ,

Sa saqati au tale.

10Ni lomani au Jiova ka vakabulai au;

Me'u na qai sauma lesu na nodra i vakarau na noqu meca.

11Au na qai kila kina ni o ni sa vinakati au,

Baleta ni ra sa sega ni qaqa vei au.

12O ni na vukei au baleta ni'u sa cakava na ka dodonu

Ka maroroi au tikoga e matamuni ka sega ni mudu.

13 Same 106.48 Me da vakacaucautaki Jiova, na Kalou ni Isireli;

Me da vakacerecerei koya ena veigauna kecega.

Emeni! Emeni!