SAME 43 - Ai Vola Tabu Ena Vakavakadewa Vou（FNV）

A Masu ni Tamata e Gadreva na Kalou(Na i Kuri ni Same 42)

1Kemuni na Kalou, mo ni vakaraitaka ni'u sa tawa cala,

Ka taqomaki au mai vei ira na tamata tawa lotu;

Ni sereki au mai vei ira na tamata ca ka lasulasu.

2Sa i kemuni o ni sa dau taqomaki au;

Na cava o ni sa biuti au kina?

Na cava na vuna me'u vakararawataki tikoga kina

Mai vei ira na tamata i tovo kaukauwa kei ira na kequ meca?

3Ni tala mai na nomuni rarama kei na nomuni dina

Me mai liutaki au,

Ka kauti au lesu ki Saioni, na nomuni ulunivanua tabu,

Kei na nomuni vale tabu o ni tiko kina.

4Ia au na qai lako ki na nomuni cabocabonisoro na Kalou,

Baleta ni o ni solia vei au na reki kei na marau;

Au na qai qiria na noqu api ka sere ni vakacaucautaki,

Kemuni na Kalou, na noqu Kalou.

5Na cava au rarawa tiko kina?

Na cava au vakaleqai tiko kina?

Au na vakanuinui ga vua na Kalou;

Ka'u na vakacaucautaki koya tale

Na noqu i vakabula ka noqu Kalou.