JOSUA 14 - Ai Vola Tabu Ena Vakavakadewa Vou（FNV）

Wasewase ni Vanua ena Ra ni Joritani

1Oqo na veitiki ni vanua a soli vei ira na Isireli me nodra i votavota ena vanua o Kenani, me vaka sa vota vei ira na veimataqali e Isireli o Eliesa na bete, kei Josua na luve i Nuni kei ira na i liuliu ni mataqali.

2Me vaka na i vakaro i Jiova vei Mosese, e sa votai na nodra vanua na ciwa veimama na mataqali ena ra ni uciwai na Joritani ena vakawiri madigi. Tiko 26.52-56; 34.13

3Tiko 32.33; 34.14-15; Vrua 3.12-17 A sa solia oti o Mosese na nodra i votavota na rua veimama na mataqali ena tokalau ni Joritani, ia e sa sega ga ni solia o koya e dua na vanua vei ira na Livai,

4ka ni sa rua na nodra mataqali na kawa i Josefa: o Manasa kei Ifereimi. E a sega ni soli vei ira na Livai e dua na i wase ni qele, ia sa soli ga me nodra eso na koro me ra tiko kina, kei na vanua veico eso me kana kina na nodra manumanu yava i va.

5Era sa wasea na qele o ira na Isireli me vaka sa vakaroti Mosese kina ko Jiova.

Soli na Vanua o Epironi vei Kelevi

6Ena dua na siga, era sa lako mai vei Josua e Kilikali eso na tamata mai na mataqali i Juta. A dua vei ira, o Kelevi na luve i Jifune, a sa tukuna vei Josua, “O sa kila na vosa sa tukuna ko Jiova vei Mosese na tamata ni Kalou mai Katesi Banea me baleti kedaru.Tiko 14.30

7Au a yabaki vasagavulu ena gauna sa talai au kina na tamata ni Kalou o Mosese ki Katesi Banea me'u mai yamata ena vanua oqo. Au a qai kauta lesu mai vua na i tukutuku dina.Tiko 13.1-30

8Ia, o iratou na wekaqu keitou a lako vata e ratou a vakayalolailaitaki ira na tamata me ra rere vakalevu. Ia, au a yalodina ka talairawarawa ga vei Jiova na noqu Kalou ena veika au cakava.

9Ena vuku ni ka o ya, sa yalataka kina o Mosese vei au kei ira na luvequ me solia vakaidina me neitou i votavota na vanua sa butuka na yavaqu.Tiko 14.24

10Ia oqo, raica, sa oti yani e vasagavulu-kalima na yabaki mai na siga ka cavuta kina na vosa o ya vei Mosese ko Jiova. E a yaco na ka o ya ena gauna era lako voli kina na Isireli ena loma ni vanua lala, ia sa vakabulai au tiko ko Jiova mai na siga o ya me yacova mai na siga oqo, me vaka na nona vosa ni yalayala. Raici au mada! Au sa yabaki 85 oqo

11ka'u se kaukauwa vinaka tikoga me vaka na noqu kaukauwa ena siga ka veitalai yani kina o Mosese. Au se rawa talega ni la'ki vala se cakava eso tale na ka.

12Ia oqo, mo solia vei au na vanua veidelana oqo me vaka sa yalataka vei au ko Jiova ena siga o ya. O a rogoca talega o iko ni a tukuni ena siga o ya ni ra tiko mai kea na kawa i Anaki kei na nodra koro lelevu sa vakabai wavoki; ia de rairai na tiko vata kei au ko Jiova, ka'u na qai vakasevi ira tani, me vaka ga na nona vosa.”

13Sa qai vosa vakalougatataki Kelevi na luve i Jifune o Josua ka soli Epironi vua me nona i votavota.

14Era sa taukeni Epironi tikoga na kawa i Kelevi na luve i Jifune na Kenisaiti, ena vuku ni nona a talairawarawa ena yalodina vua ko Jiova na Kalou ni Isireli.

15E liu, a vakatokai voli o Epironi me koro i Aripa. (O Aripa e kilai ni nodra qaqa rogo levu duadua na kai Anaki.)

Sa qai yaco na sautu ena vanua.