SAME 94 - Ai Vola Tabu Ena Vakavakadewa Vou（FNV）

Na Kalou sa Lewa na Veika Kecega

1Kemuni Jiova, sai kemuni na Kalou dauveivakatotogitaki;

Ni vakaraitaka mada na nomuni cudru.

2Sa i kemuni ga na turaganilewa ni tamata vakayadua,

Ni vakataulewa mada vei ira na viavialevu ena vuku ni nodra i valavala.

3Ena vakacava soti na balavu ni gauna me ra na reki tikoga kina

na tamata i tovo vakasisila?

I Jiova, ena vakaevei beka na kena dede?

4Ena vakacava soti na balavu ni gauna era na dokadokataka

tiko kina na tamata ca na veika ca era cakava?

5I Jiova, era sa vakamavoataki ira na nomuni tamata;

Era sa vakasosataki ira sa okati me ra nomuni.

6Era sa vakamatei ira na yada kei na luveniyali,

Ka labati ira na vulagi era tiko ena neimami vanua.

7Era sa kaya, “Sa sega ni raici keda ko Jiova;

Sa sega ni kunei keda na Kalou i Jekope.”

8Kemuni na noqu tamata, e rawa vakacava mo ni lialia tu vaka o ya?

O ni na qai yalomatua rawa ena gauna cava?

9Na Kalou sa bulia na daligada, ena qai sega li ni rogoca rawa o koya?

Sa bulia o koya na matada, ena qai sega li ni raica rawa o koya?

10Sa dauvunauci ira na veimatanitu, ena sega li ni vunauci kemudou?

Sa dau vakavulica na tamada me kila-ka, sa sega li ni tu vua na kila-ka?

11Sa kila ko Jiova na ka era nanuma;

Sa kila o koya na kena tawayaga na nodra vakatulewa ni vakasama.

12I Jiova, sa kalougata na tamata o ni sa vakavulica,

O ira o ni sa tuberi ira ena nomuni lawa!

13O ni sa solia vei ira na vakacegu mai na veigauna ni rarawa,

Me yacova ni sa keli na qara me corita na tamata ca.

14Ena sega ni biuti ira na nona tamata ko Jiova,

Ena sega ni biuti ira era sa nona.

15Ena laurai tale na lewa dodonu ena vale ni veilewai;

Ka ra na tokona kece na tamata yalododonu.

16O cei ena tucake me totaki au ena saqati ira na tamata ca?

O cei ena to ena noqu yasana ena saqati ira na i valavala ca?

17Kevaka sa sega ni vukei au ko Jiova,

Ke'u sa na qai ia vakatotolo sara yani ki na vanua ni vagagalu.

18Au a kaya, “Sa sisi na yavaqu me'u sa bale,”

Ia, na nomuni loloma tudei ga, i Jiova, sa tauri au cake tu.

19Ni'u a taqaya ka lomaocaoca,

O ni a qai vakacegui au ga ka vakamarautaki au.

20O ni sa sega ni duavata kei ira na turaganilewa tawa dodonu

Era sa vakalawataka na veika tawa dodonu;

21Era sa bukiveretaki ira na tamata vinaka,

Ka vakatauca na i totogi mate vei ira na tamata dodonu.

22Ia sa taqomaki au ko Jiova;

Sa viribaiti au na noqu Kalou.

23Ena totogitaki ira o koya ena vuku ni nodra i tovo ca,

Ka vakarusai ira me baleta na nodra i valavala ca;

Ena vakarusai ira ko Jiova na noda Kalou.