1Ni rogoci au Jiova ka sauma mai na noqu masu
Baleta ni'u sa dravudravua ka vakaloloma.
2Ni vakabulai au mai na mate baleta ni'u sa yalodina vei kemuni;
Ni vakabulai au, ni'u sa nomuni tamata ka'u sa vakadinati kemuni.
3Sa i kemuni na noqu Kalou, ni yalololoma vei au,
Au sa masu vei kemuni ena veisiga taucoko.
4Ni vakamarautaki au Turaga,
Baleta ni sa lako cake yani na noqu masu vei kemuni.
5O ni sa vinaka ka dau veivosoti Turaga,
O ni sa sinai ena loloma tudei vei ira kece era masuti kemuni.
6Ni vakarorogo Jiova ki na noqu masu;
Ni rogoca na noqu kere veivuke.
7Au masu yani vei kemuni ena gauna ni leqa
Baleta ni o ni sauma mai na noqu masu.
8Sa sega tale ni dua na kalou me vakataki kemuni Jiova,
Ka sega e dua me cakava rawa na ka o ni sa vakayacora oti.
9Na veimatanitu kece o ni a bulia
Era na lako mai ka mai cuva vei kemuni.
Era na vakacaucautaka na nomuni cecere,
10Baleta ni sai kemuni taudua ga na Kalou, o ni sa qaqa;
Sa i kemuni taudua ga o ni cakava na cakacaka veivakurabuitaki.
11Ni vakavulici au Jiova ena ka o ni vinakata me'u cakava,
Au na qai talairawarawa vei kemuni ena yalodina,
Ni vakavulici au me'u qaravi kemuni ena yaloqu taucoko.
12Au na vakacaucautaki kemuni, na Turaga na noqu Kalou
ena yaloqu taucoko,
Au na tusanaka na nomuni cecere ka sega ni mudu.
13Sa ka vakaitamera ga na nomuni loloma tudei vei au;
O ni sa qai vakabulai au mai na bati ni bulubulu.
14Kemuni na Kalou era sa saqati au na tamata viavialevu,
Era saga me ra vakamatei au e dua na i lala tamata i tovo kaukauwa,
O ira na tamata era sega ni dau kauwaitaki kemuni.
15Ia, oi kemuni na Turaga,
o ni sa Kalou yalololoma ga ka dau yalololoma,
O ni sa dau berabera ga ni cudru ka sa sinai sara ena loloma tudei
kei na yalodina.
16Ni vakanamata mai vei au, ka mataloloma vei au;
Ni vakaukauwataki au ka vakabulai au,
Baleta ni'u sa qaravi kemuni me vaka sa cakava o tinaqu.
17Ni vakaraitaka na i vakadinadina ni nomuni vinaka Jiova,
Era na qai madua kina o ira era cati au,
Ni ra raica ni o ni solia vei au na vakacegu ka vukei au.
Who We AreWhat We EelieveWhat We Do
2025 by iamachristian.org,Inc All rights reserved.
