1Au a waraka tikoga na veivuke i Jiova;
Sa qai vakatudaliga mai vei au ka rogoca na noqu tagi.
2Sa dreti au cake mai na dua na qara rerevaki,
Io, mai na dua na qara lolobo sara!
A sa vakatikori au ena dela ni vatu
Ka sa vakadeitaka na yavaqu.
3Sa vakavulici au me'u lagata e dua na sere vou,
Na sere e vakacaucautaki kina na noda Kalou.
Era lewe vuqa era na raica na ka oqo ka ra na rere,
Ka ra na yaco me ra vakadinati Jiova.
4Sa kalougata na tamata sa vakadinati Jiova,
Ka sa sega ni goleva na veikalou matakau,
Se duavata kei ira era qarava na veikalou lasu.
5Kemuni Jiova na neimami Kalou,
Sa vuqa sara na ka o ni sa cakava vei keimami,
Sa sega tale e dua me vakataki kemuni!
Sa vuqa na i naki vinaka o ni sa tuvana vei keimami,
Kevaka au via vakamacalataka kece
Au sa na sega ni wilika rawa na kedra levu!
6 Ipe 10.5-7 O ni sa sega ni vinakata na i soro kei na i soro kama:
O ni sa sega ni gadreva me vakamai taucoko
ena i cabocabonisoro na veimanumanu;
Era vakacabori ena i cabocabonisoro
se na i soro me bokoci kina na i valavala ca.
Ia, o ni sa solia ga vei au na daliga me'u rogoci kemuni kina.
7Ka'u a qai sauma yani, “Oi au oqo;
Sa tu na nomuni vakaro me baleti au ena nomuni vola ni Lawa.
8Au rekitaka dina me'u vakayacora na lomamuni na noqu Kalou!
Io, ka'u sa tugana na nomuni vakavuvuli ki na vu-ni-yaloqu.”
9Au sa tukuna oti na i tukutuku vinaka ni veivakabulai i Jiova,
Ena nodra soqoni levu na nomuni tamata.
O ni sa kila ga, i Jiova
Ni'u na sega ni cegu ena noqu tukuna tikoga.
10Au na sega ni vunia tikoga e lomaqu
na i tukutuku ni nomuni veivakabulai;
Au na dautukuna tikoga na nomuni yalodina kei na veivuke.
Au sega ni dau galuvaka na nomuni loloma tudei,
Kei na nomuni yalodina ena nodra soqoni na nomuni tamata.
11Kemuni Jiova, ni kakua ni muduka na nomuni yaloveivosoti vei au.
Ka me taqomaki au ga na nomuni loloma tudei kei na yalodina.
A Masu ni Kere Veivuke(Same 70)12Sa wavoliti au e vuqa sara na leqa,
Ka sa sega ni wili rawa!
Sa vesuki au na noqu i valavala ca
Ka'u sa sega kina ni rai rawa;
Sa levu cake mai na i wiliwili ni drau ni uluqu,
Ka'u sa yalo lailai sara ga kina.
13Ni yalovinaka, i Jiova, mo ni vakabulai au!
Me yaco totolo mai vei au na nomuni veivuke.
14O ira era saga me ra vakamatei au
Me ra vakadrukai ga ka me ra veilecayaki;
Me ra vakasukai lesu ka vakamadualaki
O ira sa vinakata me ra vakamavoataki au.
15Me ra vakalolomataki ena vuku ni nodra madua
O ira era sa dredre ni veivakalialiai vei au.
16Me ra reki ka marau
O ira kece era lako mai vei kemuni;
Me ra kaya tikoga o ira era lomana na nomuni veivakabulai,
“Sa cecere ga ko Jiova!”
17Au sa leqa ka dravudravua,
Ia sa nanumi au ga na Turaga.
Sa i kemuni na noqu dauniveivuke ka dauniveisereki;
Ni kakua ni vakaberabera, na noqu Kalou.
Who We AreWhat We EelieveWhat We Do
2025 by iamachristian.org,Inc All rights reserved.
