1Na cava o ni sega kina ni botea na lomalagi
Ka lako sobu mai?
Era na raici kemuni na veiulunivanua
Ka sautaninini ena rere.
2Era sa sautaninini me vaka na wai
Sa buebue ena dela ni buka katakata.
Ni lako mai ka vakaraitaka na nomuni kaukauwa
Vei ira na kemuni meca
Ka cakava me ra sautaninini
Na veimatanitu e matamuni.
3O ni a lako mai ena dua na gauna,
Ka mai cakava na veika rerevaki
Keimami a sega ni namaka.
Era a raici kemuni na veiulunivanua
Ka sautaninini ena rere.
4 1Kori 2.9 Sa sega ni dua e bau rogoca se raica,
E dua na Kalou me vakataki kemuni
O koya sa dau cakava na ka
Ena vukudra era vakanuinui vua.
5O ni sa vinakati ira era taleitaka ni cakava na ka vinaka
O ira era nanuma me ra bula voli
Me vaka na lomamuni.
O ni a cudruvi keimami,
Ia keimami sa ia tikoga na i valavala ca,
Veitalia ga na nomuni cudru levu.
Keimami sa ia tikoga na i tovo ca me tekivu sara mai liu.
6Keimami sai valavala ca kece sara;
Na neimami tovo vinaka sara mada ga e sa dukadukali ga.
Keimami sa vaka na draunikau sa cagina tani ena cagi
Ena vuku ni neimami i valavala ca.
7E sega ni bau dua e gole yani vei kemuni ena masu me kere veivuke.
O ni sa vunitaki kemuni vei keimami
Ka biuti keimami ena vuku ni neimami i valavala ca.
8Ia oqo kemuni Jiova sai kemuni na Tama i keimami,
O ni sa vaka na dautuli kuro
Ka keimami sa vaka na qele me tuli kina na kuro, o ni a tuli keimami,
9Ia ni kakua ni cudruvi keimami
Se wilika tiko vei keimami na neimami i valavala ca ka sega ni mudu.
Keimami sa nomuni tamata,
Ni lomani keimami mai.
10Na nomuni veikoro tabu era sa vaka na vanua lala.
O Jerusalemi e sa rusa ka lala tu.
11Na neimami vale tabu ka vanua rairai vinaka
Era dauqaravi kemuni kina na neimami qase,
Sa vakarusai ena buka.
Sa rusa na veivanua kece keimami dau lomana.
12Kemuni Jiova
O ni sega li ni vakayavalati ena ka oqo?
O ni na sega li ni cakava e dua na ka,
Ka cakava me keimami sota kaya
Na ka keimami sega ni rawa ni colata?
Who We AreWhat We EelieveWhat We Do
2025 by iamachristian.org,Inc All rights reserved.
