JEREMAIA 19 - Ai Vola Tabu Ena Vakavakadewa Vou（FNV）

Na Saqa sa Kavoro

1A sa kaya vei au na Turaga ko Jiova me'u la'ki volia e dua na saqa qele. A tukuna me'u kauta eso na qase mai vei ira na tamata kei na so na parofita qase,

2Ka curu ena matamata ni koro o Poliseti vaka ki na Qakilo kei Inomi. Me'u la'ki vunautaka e kea na vosa ni Turaga, ka a solia vei au.

3A tukuna vei au ko Jiova, “Ni vakarorogo na tui kei Juta kei kemuni na lewe i Jerusalemi ki na ka sa tukuna na Turaga ko Jiova ni lewevuqa na nodra Kalou na Isireli. Au sa na kauta mai e dua na veivakarusai ki na vanua oqo, ka na qasikanunu kecega na daligadra era rogoca.

4Au na cakava na ka oqo baleta ni ra sa biuti au na tamata ka ra sa vakadukadukalitaka na vanua oqo ena nodra vakacaboisoro ki na veikalou tani, na veikalou era a sega ni bau kilai, se o ira na nodra qase kei ira na tui Juta e liu. Era sa vakasinaita na vanua oqo ena nodra dra na tamata tawa cala,

5Ka ra tara na veicabocabonisoro vei Peali me ra vakama kina na luvedra ena buka me i soro. E a sega ni bau yaco mai ki na noqu vakasama, au a sega talega ni bau vakaroti ira me ra vakama na luvedra me i soro.

6Ia, oqo sa kaya ko Jiova, “Ena yaco mai na gauna, ena sega tale ni vakatokai kina na vanua oqo me yacana o Tofeci se na Qakilo kei Inomi. Ia ena vakatokai me yacana na Qakilo ni Veivakamatei.

7Au na vakarusa ena vanua oqo na veika era nakita na kai Juta kei Jerusalemi. Au na vakavuna me ra qaqa na kedra meca ka vakamatei ira ena i valu. Au na solia na yagodra me kedra kakana na manumanu kila kei na manumanu vuka.

8Au na kauta mai e dua na veivakarusai vakarerevaki ena koro oqo, ka ra na kurabui ka kidacala o ira kecega era curu kina.

9Au na vakavuna me ra kani ira na luvedra na tiko e kea. Era na dui kania na wekadra ena koro ni ra sa viribaita na meca na nodra koro ka ra saga me ra vakamatei ira.”

10A qai kaya vei au ko Jiova, me'u voroka na saqa e matadra na tamata era lako vata kei au,

11Ka tukuna vei ira na ka sa tukuna na Turaga ko Jiova ni lewevuqa, “Au na vorolaki ira na tamata oqo kei ira na koro oqo me vaka na nomu vorolaka na saqa qele ka sa sega ni rawa ni o na sema vata tale. Era na bau la'ki bulu na tamata ki Tofeci ka ni sa sega na vanua me ra bulu kina.

12Sa i koya o ya na ka au na cakava ena koro oqo kei ira na lewena. Au na cakava me vakataki Tofeci.

13Na veivale e Jerusalemi, na nodra veivale na tui Juta kei na veivale kece sa dau vakamai kina na ka boi vinaka ki na veikalokalo ka dau sova kina na i soro liviraki ki na veikalou tani ena dukadukali me vakataki Tofeci.”

14Ia, au sa qai biuti Tofeci na vanua e a talai au kina ko Jiova me'u la'ki vunautaka kina na nona vosa. Au a qai lako ka la'ki tu ena lomanibai ni Valenisoro ka tukuna vei ira kece na tamata,

15Ni sa kaya na Turaga ko Jiova ni lewevuqa na nodra Kalou na Isireli. “Au na kauta mai ki na koro levu oqo kei na kena veikoro kece na i totogi au a tukuna ni'u na cakava baleta ni o ni sa rui yalo kaukauwa ka sega ni via rogoca na noqu vosa.”