NIEMAIA 12 - Ai Vola Tabu Ena Vakavakadewa Vou（FNV）

O Ira na Bete kei na Livai

1Oqo o ira na bete kei ira na Livai era sa lesu mai na veivakabobulataki kei rau o Serupepeli na luve i Sialitieli tagane vata kei Jesua.

Mai vei ira na bete: o Siraia, o Jeremaia, o Esira,

2o Amaraia, o Maluki, o Atusi,

3o Sekonaia, o Riumi, o Meremoce,

4o Ito, o Kinicoci, o Apaiya,

5o Maijamini, o Matala, o Pilika,

6o Simaia, o Joaripi, o Jitaia,

7o Salu, o Amoki, o Ilikaia, kei Jitaia. Oqori o ira na nodra i liuliu na bete kei ira na nodra i tokani ena gauna i Jesua.

8Mai vei ira na Livai: Oqo o ira ka ra liutaka na kena lagati na veisere ni vakavinavinaka: o Jesua, o Pinui, o Katimieli, o Serepaia, o Juta, kei Matanaia.

9Oqo o ira na lewe ni matasere era duri veibasai ka lagata na i sa ni sere e lagati: o Pakipukia, o Uno, kei ira na i tokani na Livai.

Na Kawa ni Bete Levu o Jesua

10A tama i Joiakimi o Jesua, ka tama i Elaiasipi o Joiakimi, ka tama i Jioiata o Elaiasipi,

11ka tama i Jonacani o Jioiata ka tama i Jatua o Jonacani.

O Ira na Liuliu ni Vuvale Vakabete

12Ena gauna ni bete levu i Joiakimi era a veiliutaki ena veivuvale vakabete o ira oqo: ena vuvale i Siraia o Miraia; ena vuvale i Jeremaia, o Enanaia;

13ena vuvale i Esara, o Mesulame; ena vuvale i Amaraia, o Joanani;

14ena vuvale i Maluki, o Jonacani; ena vuvale i Sipanaia, o Josefa;

15ena vuvale i Aripimi, o Atana; ena vuvale i Miraioci, o Ilikai;

16ena vuvale i Ito, o Sakaraia; ena vuvale i Kiniconi, o Mesulame;

17ena vuvale i Apaiya, o Sikiri, ena vuvale i Miniamini na kai Moataia, o Pilitai;

18ena vuvale i Pilika, o Samua; ena vuvale i Simaia, o Jonacani;

19ena vuvale i Joaripi, o Matinai; ena vuvale i Jitaia, o Usai;

20ena vuvale i Salai, o Kalai; ena vuvale i Amoki, o Iperi;

21ena vuvale i Ilikaia, o Asapaia; ena vuvale i Jitaia, o Nacanieli.

Kedra i Tukutuku na Vuvale Vakabete kei na Livai

22Ena gauna e ratou a dui bete levu kina o Elaiasipi, o Jioiata, o Jonani kei Jatua sa dau volai tu ena i tukutuku maroroi na yacadra na qase ni veivuvale vaka-Livai. A caka vaka talega kina vei ira na bete me yacova mai na gauna vakatui i Taraiasi na turaga ni Perisia.

23Na yacadra na qase ni veivuvale vaka-Livai a dauvolai ena i Vola ni Cakacaka ni Veigauna me yacova mai na gauna vakabete levu i Jonani na luve i Elaiasipi.

24Oqo o ira na nodra turaga na Livai: o Esapaia, o Serepaia, o Jesua, o Pinui, o Katimieli kei ira na wekadratou. Era a wasei vakarua na matasere ka vakasalataki me rau dauvakacaucautaka na Kalou ena lagati ni sere sa dauveimuri me vaka na i vakaro ni tamata ni Kalou o Tevita na tui.

25O Matanaia, Pakipukia, o Opetaia, o Mesulame, o Talimoni kei Akupi e ratou nodra i liuliu na i vakatawa ni katuba ni vale ni yaya kei na kakana ena matamata ni Valenisoro.

26O ira oqori era a bula donuya na gauna i Joiakimi na luve i Jesua ka makubui Josateki kei na nodrau gauna o Niemaia na kovana, kei Esera na bete ka qasenivuli ni Lawa.

Vakatabuya na Bai ni Koro o Niemaia

27Ena gauna sa vakatabui kina na bai kei Jerusalemi, era a vakasoqoni vata mai o ira na Livai mai na veivanua era dui vakaitikotiko mai kina, me rawa ni ra mai tiko ka marautaka vata na soqo levu o ya ena lagalaga sere ni vakavinavinaka vata kei na domo ni api kei na sibali.

28Era a qai soqo vata yani ki Jerusalemi o ira kecega na matavuvale ni dausere ena kawa i Livai mai na nodra veikoro ena yasa i Jerusalemi, mai na veikoro vaka-Nitofa,

29mai Peci-Kilikali, mai Kipa kei Asimavece, na veivanua era sa vakoro tu kina.

30Era a qai cakava na cakacaka vakalotu ni nodra vakasavasavataki ira vakai ira o ira na Livai, me ra savasava talega kina na Isireli, na veimatamata ni koro kei na bainikoro.

31Au a qai soqoni ira vata kecega yani na turaga kei ira na nodra qase na Juta ki na dela ni bai ka wasei ira me rua na mata-tayabe lelevu me ra tayabe wavokita na koro e dela ni bai, ka me ia na vakavinavinaka vua na Kalou.

Na i matai ni wasewase sa tayabe yani ki na i matau ena dela ni bai vaka ki na Matamata ni Benu.

32A sa muri ira tiko e dakudra na daunisere o Osaia, ka ra muri koya tiko yani e dua na veimama ni mata turaga vei ira na nodra qase na Juta.

33Era sa tiko sara yani e dakudra na qase na nodra matavakatagi na bete ka lewena o Asaraia, o Esera, o Mesulame,

34o Juta, o Penijamini, o Simaia, o Jeremaia,

35kei na so vei ira na luvedra na bete era uvu bitu ni vakatagi. Sa qai tarava yani o Sakaraia na luve i Jonacani ka makubui Simaia. (O ira na nona kawa e wili kina o Matanaia, o Mikaia, kei Sakuri mai na mataqali nei Esava.)

36A sa muri koya yani eso tale na lewa ni nona mataqali — o Simaia, o Asareli, o Milelai, o Qilalai, o Maai, o Nacanieli, o Juta kei Anani — o ira kece oqo era sa kauta voli na i vakatagi vaka-wa eso sa dau qiria o Tevita na tui, na tamata ni Kalou. A sa tayabe tiko e matadratou oqo o Esera, na vunivola ka qasenivuli ni lawa.

37Era a muri e dela ni Matamata ni Waivure, ka ra muria cake na i cabecabe ki na Koro i Tevita ena vanua e cabeta cake na bai ka toka era na vale nei Tevita na tui, ka ra yabe sara yani vaka ki na Matamata ni Wai ena yasa ni bai ki na tokalau.

38Na i karua ni wasewase ni mata-tayabe a gole yani ki na yasana kadua ni dela ni bai, ka'u a muri tiko yani e dakudra oi au vata kei na veimama ni wase ni turaga ni Isireli. Keimami lako sivia na Vale cere-i-cake ni Lovo ka yaco yani ki Bai Raraba,

39ka lako yani e dela ni Matamata i Ifereimi, ka curuma yani na Matamata Makawa kei na Matamata ni Ika, ka lako yani ki na Vale cere-i-cake i Ananeli kei na Vale cere-i-cake ni Lewe Duanadrau me la'ki yaco sara ki na Matamata ni Sipi ka qai la'ki cava na tayabe ena Matamata ni Yadra.

40Era sa qai tu na mata-tayabe ruarua sa ia na vakavinavinaka vua na Kalou ena Valenisoro, ka vakakina oi au kei na veimama ni wiliwili ni vakailesilesi;

41era sa ia na uvu bitu ni vakatagi tiko mai o iratou na bete o Iliakimi, o Maseia, o Miniamini, o Mikaia, o Elioenai, o Sakaraia kei Ananaia.

42O ira na kena daulaga sere ka kena i liuliu o Jesiraia e wili kina o Meesea, o Semaia, o Iliaseri, o Usai, o Joanani, o Malikaia, o Ilami kei Esa.

43Ena siga o ya era a vakacabora kina eso na i soro lelevu ka ra a marau ni a vakamarautaki na Kalou ena dua na marau levu. Era a marau talega na watidra kei ira na luvedra ka rogo yawa sara na marau i Jerusalemi.

Na i Tavi me Qaravi e Valenisoro

44Ena gauna o ya era a lesi kina o ira me ra liutaka na qarava na veirumu ni yaya kei na lololo ena i tikotiko vakabete me dau kumuni ka maroroi kina na i solisoli kecega, na i sevu vuanikau dreu, na i katini ni vua ni teitei mai na veiteitei kecega ena veikoro me nodra i wasewase na bete kei ira na Livai me vaka a tukuni tu ena kena lawa. A marautaki ira na bete kei ira na Livai era veiliutaki ena vanua taucoko o Juta,

45ena vuku ni nodra cakava na cakacaka ni nodra Kalou kei na cakacaka ni veivakasavasavataki. O ira talega na dausere kei ira na dauyadrava na valenisoro era sa cakava na nodra i tavi me vaka na i vakaro ni tui o Tevita kei Solomoni na luvena.1Vei 25.1-8; 1Vei 26.12

46Ena gauna makawa i Tevita na tui kei Esava na dausere ka ra tu talega na veisere ni vakacaucau kei na vakavinavinaka vua na Kalou.

47Ena gauna i Serupepeli ka vakakina ena gauna i Niemaia, a sai tavi i Isireli taucoko me dau solia vakailoloma vei ira na dausere kei ira na dauyadrava na valenisoro na kedra kakana ni veisiga ka vota tani talega o Isireli na ka me nodra se kedra sara ga na bete. Ia o ira na Livai me qai nodra i tavi na wasea na nodra i votavota na bete.