JOPE 5 - Ai Vola Tabu Ena Vakavakadewa Vou（FNV）

1I Jope, mo yalo vinaka ka kaci mada yani.

De lakolako ena sauma mai e dua.

2Na nomu vakaleqa vakasivia na lomamu ena nomu yalo ca,

Sa rui ka lialia ka yalowai talega.

3Au raica na tamata e lialia vakalevu sara

Ni tiko dei ga ka tiko vinaka;

Ia a qai lutuka vakasauri na nona vale e dua na sau

Me vu ni nona mate.

4O ira na luvena era sega ni tiko vinaka rawa,

Ni ra na buturaki kecega e matamata,

Ka sega ni dua e vukei ira rawa.

5O ira na viakana era na kania na ka e tea na lialia —

E okati kina na ka e tubu maliwa ena kau vakavotona;

Ka ra karamacataka na nona i yau o ira na viagunu.

6E sega ni bula cake mai na qele na i tovo ca,

Se tubu mai na i teitei na leqa;

7E sega sara ga!

Ia na tamata sa dau vakaleqai koya ga,

Me vaka na kena dauvuka cake na lidinibuka.

8Ia oi au, ka'u na vakasaqara na Kalou,

Ka'u na vakacabora vua na noqu gagadre.

9E dredre me da kila rawa na ka lelevu e dau cakava;

Kei na nona cakacaka mana ni sega ni dau vakaiyalayala.

10Sa vakatauca mai o koya na uca ki na qele,

Ka vakasuasuataka na veilomanivanua.

11Io, sa dau laveti ira cake yalomalumalumu na Kalou,

Ka solia na reki vei ira era lolosi.

12Sa vakaseva na Kalou na nodra i naki na tamata lawaki ca,

Ka vakayacora me ra liga lala.

13 1Kori 3.19 A sa vakatacoritaki ira na tamata qaseqase ena nodra i lawaki,

Ka muduka vakatotolo na nodra sasaga na tamata lawaki kaukauwa.

14Sa ologi ira na butobuto ni sa siga tu,

Ka ra vakayayamo voli ena sigalevu me vaka na bogi.

15Ia sa taqomaki ira na dravudravua na Kalou mai na mate;

Ka vueti ira era gadreva na veivuke mai na leqa.

16O koya oqo sa nodra kina na nuidei na tamata dravudravua,

Ka sogolati na gusuna sa cakacaka vakatawadodonu.

17 Vbale 3.11,12; Ipe 12.5,6 Sa kalougata na tamata sa vakadodonutaki koya na Kalou!

Mo kakua ni cata ni sa vunauci iko o koya.

18 Osea 6.1 Ena vadretitaka na Kalou,

Na mavoa kecega sa vakayacora.

Kevaka ena vakamavoataki iko na ligana,

Sa na veivakabulai talega na ligana.

19Ena veigauna kecega

Sa dau taqomaki iko o koya mai na veika ca;

20Ni sa yaco mai na dausiga levu,

Ena qarauna mo bula tikoga;

Ia ni sa yaco na i valu,

Ena taqomaki iko mo kakua ni mate.

21Ena vueti iko mai na vosa vakacaca ni gusu;

Ka vakabulai iko ni basika mai o rusa.

22O na dredrevaka na veivakarusai kei na dausiga,

Ka sega ni rerevaka na manumanu kila eso.

23Na tikinivanua kecega o siviyarataka

Era na kau tani kina na veivatu me galala vinaka;

Ka ra na sega ni katalaki iko na manumanu daukata.

24O na qai tiko vakacegu ena nomu valelaca;

O na rai yani ka raici ira na nomu sipi ni ra tu welewelei sara.

25Era na lewe vuqa na luvemu kei na nomu kawa

Me vaka na i wiliwili ni drau ni co ena dua na i kanakana.

26Me vaka na witi ka tamusuki ni sa matua vinaka,

O iko talega o na qai mate ni o sa matua ka qase sara.

27Na ka kece oqo Jope,

Keitou kila mai na vakadidike dede keitou a cakava.

E ka dina taucoko ka dodonu mo rogoca,

Ka kila me rawa kina ni o vinaka.