1Ia ena i ka 18 ni yabaki ni tui i Isireli o Jeropoama, a buli o Apaijia me tui Juta.
2A tui tiko mai Jerusalemi me yabaki tolu. Ia na yaca i tinana o Mekaia, na luve i Urieli mai Kipea. E rau a veivala o Apaijia kei Jeropoama.
3A tuva i valu o Apaijia; era a tamata i valu qaqa, ka ra lewe 400,000 na tamata digitaki; a tuva i valu talega o Jeropoama me valuti koya, vata kei ira era lewe 800,000 na tamata i valu qaqa ka digitaki.
4A tucake o Apaijia ena dela ni ulunivanua o Simareimi, ka tiko oqori ena vanua veiulunivanua o Ifereimi, ka kaya, Ni rogoci au mai, o iko Jeropoama kei kemuni kecega na Isireli!
5Dou sega li ni kila ni sa solia oti ko Jiova na nodra Kalou na Isireli vei Tevita kei ira na luvena na i tutu vakatui, ena veiyalayalati sa sega ni voroki rawa?
6A qai tucake mai o Jeropoama na luve i Nipati, e dua na tamata i Solomoni na luve i Tevita, ka talaidredre vua na nona turaga.
7Era a ravi voliti koya eso na tamata ca ka sega na betedra ka ra beci Reopoama na luve i Solomoni, ni a gone ga o Reopoama, yalo wai, ka sega ni vorati ira rawa.
8Ia oqo o ni sa nanuma mo ni vorata na matanitu i Jiova, ka sa tu ga e ligadratou na luve i Tevita, baleta ni o ni sa lewe vuqa, ka sa tiko kei kemuni na matakau ceuti ni luve ni bulumakau koula ka a cakava o Jeropoama me nomuni Kalou.
9O ni a sega li ni vakasavi ira tani na bete i Jiova, o ira na luve i Eroni, o ira na Livai, ka lesia ga na nomuni bete me vaka era a dau cakava na tamata ni veivanua eso? O koya ga e lako mai kei na dua na luve ni bulumakau tagane se vitu na sipi tagane ena rawa ni vakasavasavataki mai na cakacaka vakabete ni veikalou tani vakaoqo.
10Ia o keimami, sa neimami Kalou ga ko Jiova ka keimami sa sega ni biuti koya. Era tu o ira na neimami bete ka era qaravi Jiova ka ra luve i Eroni, kei ira na Livai ka ra vakayacora tiko na nodra i tavi.
11Era sa dau vakacabora na i soro kama kei na ka boi vinaka ena veimataka kei na veiyakavi. Era sa dau cabora talega na madrai ena dela ni teveli koula dina sa savasava, ka dau vakawaqara na cina ena i tutu ni cina koula ena veiyakavi. Keimami sa vakayacora tiko na i lesilesi i Jiova na neimami Kalou, ia o ni sa vuki tani ka biuti koya.
12Na Kalou duadua ga sa liutaki keimami, ka ra sa tu oqo na nona bete kei na nodra davui me ra vakarau uvuca yani, me vakatekivutaki kina na neimami valuti kemuni. Oi kemuni na luve i Isireli, ni kakua sara ni vala kei Jiova, na nodra Kalou na nomuni qase! E sega ni rawa ni nomuni na qaqa!
13Ia, a sa tala oti yani eso na nona matasotia o Jeropoama me ra la'ki ravuti ira vakasauri na mataivalu i Juta mai dakudra ni ra sa vala tiko na kena vo e matadra.
14Ni ra qai rai vuki yani ki muri o ira na Juta, era sa raica ni ra sa viribaiti wavoki tu. Era sa qai tagi yani vei Jiova me vukei ira, ka ra uvuca na davui o ira na bete.
15Era a kaila ena domolevu na Juta, ka vakacibi i valu ena veiliutaki i Apaijia. A sa vakamalumalumutaki Jeropoama kei ira kecega na Isireli ko Jiova ena mata i Apaijia kei ira na Juta.
16Era sa qai dro na Isireli e matadra na Juta, ka sa soli ira yani na Kalou ki ligadra.
17A mokuti ira na Isireli ena dua na ravuravu levu o Apaijia kei ira na nona tamata; a bale mate kina vei ira na Isireli e veimama na milioni na sotia digitaki.
18Era a vakamalumalumutaki vakaoqo na Isireli ena siga o ya, ka ra rawata kina na qaqa o ira na Juta baleta ni ra a vakararavi vei Jiova, na Kalou ni nodra qase.
19A sa vakacemuri Jeropoama voli o Apaijia, ka taura laivi mai vua na koro o Peceli, o Jisana, o Ifironi, kei na nodratou veikoro e wavokita.
20A sega tale ni qai kaukauwa cake tale mai o Jeropoama ena gauna i Apaijia; a ravuti koya ko Jiova, ka mani mate kina.
21Ia sa tubu me kaukauwa mai o Apaijia. A tauri ira me watina e lewe 14 na yalewa, ka ra sucu kina e lewe 22 na luvena tagane kei na 16 na luvena yalewa.
22Na vo ni tukutuku me baleti Apaijia, oqori na veika sa tukuna kei na veika sa vakayacora, sa volai koto ena i Vola Tukutuku i Ito na Parofita.
Who We AreWhat We EelieveWhat We Do
2025 by iamachristian.org,Inc All rights reserved.
