JOPE 21 - Ai Vola Tabu Ena Vakavakadewa Vou（FNV）

Sauma o Jope

1A qai sauma o Jope, ka kaya,

2Dou vakarorogo mada ki na ka au tukuna tiko;

Oqori duadua ga na veivakacegui au bau kerea vei kemudou.

3Dou dolava mada vei au e dua na gauna me'u vosa kina,

Ia ni sa oti, dou qai vakidi ucu ka vakadudu gusu kevaka o dou vinakata.

4Au sega ni veicudruvi tiko kei na tamata vakayago;

E tiko na vu ni noqu sa sega ni dabe dei rawa.

5Dou raici au mai. Na nomudou raici au sa sega li ni

Rauta mo dou wadra balavu kina ka galu ena kidroa?

6Ni'u vakananuma na ka sa yaco tiko vei au,

Au sa qai domobula vakalevu sara ka'u sautaninini.

7A cava beka e vakalaivi ira kina na tamata na Kalou me ra

Qase sara ka vutuniyau?

8Era sa tubu cake e matadra o ira na luvedra kei na makubudra.

9Sa sega ni bau vakarusa na Kalou na nodra veivale;

Ka ra sega ni bula tu ena dela ni rere.

10Io, era luvea kecega na nodra bulumakau

Ka sega na leqa ni nodra vakasucu.

11Era veiciciyaki na luvedra

ka ra veiqitori me vaka na luve ni sipi;

12ka ra meke ki na domo ni api kei na bitu ni vakatagi.

13Era vakayagataka na nodra bula ena bula ni tiko sautu,

Ka ra mate vakacegu yani ka sega ni ra bau vakararawataki.

14Era tukuna vua na Kalou na tamata i valavala ca me laiva,

Me ra lewai ira tu ga;

Era sega ni via kila na lomana me baleta na nodra bula.

15Era nanuma ni sega na betena na qarava na Kalou,

Se ni dua na betena na masu vua.

16Era suguta ni ra rawa ka mai na nodra kaukauwa sara ga,

Ia oi au, au sega sara ni vakadonuya na nodra vakasama.

17E dau bokoci vakavica beka na nodra cina na i valavala ca?

E sa bau dua beka vei ira e vakarusai?

E sa bau totogitaki ira li na tamata ca na Kalou

Ena dela ni nodra cudru,

18se biligi ira tani me vaka na draunico madu sa liwava laivi na cagi,

Se me vaka na kuvu ni qele sa cagina ena cagilaba?

19Dou sa kaya voli ni sa totogitaka na Kalou

E dua na gone lailai ena vuku ni caka cala nei tamana.

E sega! Na Kalou me kuitataki ira sara ga na tamata i valavala ca,

Me vakaraitaka kina ni vakayacora na ka oqo ena vuku ni nodra i valavala ca.

20Laiva vei ira na tamata i valavala ca me ra dui cola na nodra i totogi;

Ka me ra vakila sara mada na kaukauwa ni cudru ni Kalou Cecere.

21Ni sa muduki koso na noda bula na tamata,

Eda kauwaitaka dina li ke ra marau tiko se segai o ira na luveda?

22Ena rawa li vua e dua me vakavulica na Kalou,

Me vaka ni o koya sa lewai ira talega era sa cecere?

23Eso na tamata era sa bulabula vinaka me yacova na nodra mate;

Era sa mate ni ra marau tu ka yalo vakacegu.

24A sa totoka tu na i tuvaki ni yagodra,

Ka bulabula vinaka na nodra sui.

25Eso tale na tamata sa sega vei ira na marau;

Era sa bula ka mate yani ni rarawa tu ga na lomadra.

26Ia era sa tautauvata ga ni ra sa mate ka bulu;

Ka robota na yagodra kecega na baca ni qele.

27Au sa kila deivaki na ka dou vakasamataka voli,

Kei na i tuvatuva eso mo dou vakacalai au kina.

28Dou sa taroga, Sa evei na nodra vale na tamata dokai?

Sa evei na nodra vale na tamata i valavala ca?

29Dou sa sega beka ni dau veitalanoa kei ira na tamata dauveilakoyaki?

Dou sega beka ni kila na i tukutuku era kauta lesu mai?

30Ena siga sa cudru ka veivakanakuitataki kina na Kalou,

Sa o ira na tamata ca ka ra dau calata na kuita ena vuqa na gauna.

31Sa sega e dua me beitaki ira na tamata ca,

Se me sauma lesu vei ira na veika ca era sa vakayacora oti.

32Ni sa colati na yagodra ki na i bulubulu,

Ki na nodra qara sa yadravi vakavinaka,

33Sa udolu vakaudolu na tamata era la'ki veitalaci ena i bulubulu,

Ka sa bika vakamalua yani na yagodra na qele malumu.

34Ia o kemudou! Dou sa via vakayalovinakataki au ena nomudou lialia!

Sa lasu taucoko sara na i sau ni taro dou sa tukuna vei au!