1Oqo e dua na i tukutuku baleti Papiloni,
Me vaka na kena lako mai na covulaca mai na ceva,
Sa na lako mai vakakina na veika vakadomobula
Mai na dua na vanua rerevaki.
2Au a raica e dua na raivotu ni veika vakadomobula ena yaco,
Era na butako na daubutako,
Ka veivakarusai na dauveivakarusai.
Ni la'ki valu na mataivalu ni Ilama!
Ni buku na druadrua ena koro na mataivalu ni Mitia!
Na veivakararawataki sa vakavuna o Papiloni
Ena muduka kece na Kalou.
3Na veika au raica ka rogoca ena raivotu,
Sa vakasinaiti au ena domobula kei na rere,
Kei na mosi me vaka na taratara ni yalewa bukete.
4Sa cowiri na uluqu ka'u sautaninini ena rere,
Au a gadreva me yaco mai na yakavi,
Ia sa qai kauta talega mai vei au na rere.
5Ena raivotu au a raica,
Ni sa vakarau tu e dua na magiti ni kana vata.
Sa tevu tu na i sulu me ra dabe kina na vulagi,
A sa tekivu me ra kana ka gunu.
Sa qai kacivaki mai vakasauri,
“Kemuni na turaganivalu! Ni vakarautaka
Na nomuni i sasabai!”
6Ia sa qai kaya vei au ko Jiova,
“Lako ka la'ki lesia e dua na tamata yadra,
Ka tukuna vua me vakaraitaka mai na ka a raica.
7Kevaka sa raica ni ra sa lako mai na tamata
Ka ra vodo ose,
Ka ra lako vakaveisa yarua mai,
Kei ira era vodo mai ena asa kei na kameli,
Tukuna vua me vakaraici ira vinaka sara.”
8Sa qai kailavaka mai na tamata yadra,
“Kemuni na Turaga,
Au sa dau yadra tiko ena i tikotiko ni yadra,
Ena veisiga kecega.”
9 Vtaki 14.8; 18.2 Era sa qai lako mai oqo na tamata era vodo ose,
Era lako yarurua mai.
“Sa bale, sa bale o Papiloni!
Era sa kavoro kece tu na matakau
Era dau qarava ena dela ni qele.”
10Kemuni na noqu tamata,
O ni a samulaki me vaka na witi,
Ia oqo au sa kacivaka vei kemuni
Na i tukutuku vinaka,
Au sa rogoca mai vei Jiova ni lewevuqa,
Na nodra Kalou na Isireli.
Ai Tukutuku me Baleti Itomi11Oqo e dua na i tukutuku me baleti Itomi.
A sa kaci mai vua na sotia yadra.
“Sotia yadra, ena qai oti ena gauna cava na bogi?
Tukuna vei au na gauna ena qai oti kina.”
12Sa qai kaya na sotia yadra,
“Sa kida mai na mataka,
Ia ena lako tale mai na bogi!
Kevaka o via taroga tale mai,
Lesu mai ka mai taroga tale.”
Ai Tukutuku me Baleti Arapea13Oqo e dua na i tukutuku baleti Arapea.
Kemuni na kai Titani,
O ni na mai vakeba tiko ena vanua talasiga mai Arapea.
14Ni solia na wai vei ira era viagunu
Era lako mai vei kemuni.
Kemuni mai na vanua o Tema,
Ni solia na madrai vei ira era sa dro mai.
15Era sa dro mai na tamata mai na i seleiwau,
Sa vakarau me vakamatei ira,
Na dakaititi sa vakarau vanai ira,
Kei na vakarerevaki ni i valu.
16Ia sa qai kaya vei au na Turaga, “Ena loma ga ni dua vinaka na yabaki, sa na oti kina na lagilagi kei Kitari.
17Era na qai vo ga e vica wale sara na dauvavana yaloqaqa mai Kitari, ni'u sa kaya vakaoqo oi au ko Jiova na nodra Kalou na Isireli.
Who We AreWhat We EelieveWhat We Do
2025 by iamachristian.org,Inc All rights reserved.
