SAME 42 - Ai Vola Tabu Ena Vakavakadewa Vou（FNV）

Ai Karua ni i Vola(Same 42—72)Masu ni Vaqaqara Bula ena Gauna ni LeqaVua na i liuliu ni sere. A nodra Masikili na luve i Kora.

1Me vaka sa gadreva na wai drodro na dia,

Sa vakakina na noqu gadrevi kemuni, na Kalou.

2Au sa karamacataki kemuni, na Kalou bula;

Me'u lako beka ena gauna cava ka cuva e matamuni?

3Au sa tagi ena siga kei na bogi,

Ka sa kequ kakana ga na wai ni mataqu;

Era sa tarogi au na kequ meca ena veigauna kece,

“Sa evei na nomu Kalou?”

4Sa rarawa na yaloqu ni'u vakananuma na veika oqo:

Na noqu a lako vata kei ira na lewe vuqa ki na Vale ni Kalou,

Ni'u a liutaki ira ena neimami lako voli,

Oqori na i lala mamarau era sa lagalaga sere

Ka reki ena vakacaucautaka na Kalou.

5A cava beka na vuna e sa rui bibi kina na lomaqu?

Se ena vuku ni cava au sa rui nuiqawaqawa kina?

Ia au na vakanuinui ga vua na Kalou,

Ka'u na vakacaucautaki koya tale

Na noqu i vakabula ka noqu Kalou.

6Noqu Kalou, sa bibi sara na yaloqu e lomaqu,

Oqo na vuna ka'u sa nanumi kemuni kina;

Io, mai na vanua o Joritani kei Eremoni,

Kei na ulunivanua o Maisa.

7Sa kaci na wasa titobu ki na boto ni sauloa

ena rorogo vadugu ni savu;

Ka sa sevi au na nomuni biau kecega

kei na nomuni biau lelevu kece sara.

8Sa vakarota ko Jiova na nona loloma tudei ena veisiga.

Ka sa tiko ga e lomaqu na nona sere ena veibogi,

Kei na masu vua na Kalou ni noqu bula.

9Au sa kaya vua na Kalou o koya sa solia vei au na bula,

“Na cava o ni sa guilecavi au kina?

Na cava me'u sota kaya tikoga kina na ka rarawa

Mai na nodra i tovo kaukauwa na noqu meca?”

10Au sa vakayalolailaitaki ena nodra veivakasewasewani,

Era taroga tikoga vei au,

“E vei na nomuni Kalou?”

11Na cava mada au sa rui rarawa tiko kina?

Na cava au vakaleqai kina?

Au na vakanuinui ga vua na Kalou

Ka'u na vakacaucautaki koya tale

Na noqu i vakabula ka noqu Kalou.