1A sa vakarota o Tevita me ra soqoni vata kece yani ki Jerusalemi na i vakalesilesi kece e Isireli. Era sa vakasoqoni vata yani ki Jerusalemi o ira kece na turaga ni mataqali, kei ira era qarava na cakacaka ni veiliutaki vakamatanitu, kei ira era qarava na veika e taukena na tui kei na nona manumanu, kei ira na i vakalesilesi ni valenitui, vata kei ira na nona sotia yaloqaqa ka kilai levu.
2A sa tucake tu e matadra o Tevita na tui ka sa vosa vei ira me vakaoqo: “Oi kemuni na wekaqu, mo ni rogoci au mada. A sa lomaqu voli me'u tara e dua na vale tudei me i tikotiko ni Kato ni Veiyalayalati, me i tutu ni yava i Jiova na noda Kalou; ka'u a sa vakarautaka tu na veika me baleta na kena tara na valenisoro me dokai kina na Kalou,2Samu 7.1-16; 1Vei 17.1-14
3ia sa sega ni vakadonuya na Kalou me'u vakayacora vakakina, baleta ni'u sa sotia oi au ka sa rui sivia na noqu vakadave dra.
4Ia ko Jiova, na Kalou ni Isireli, sa digitaki au kei ira na noqu kawa me veiliutaki vakatui vei Isireli ka tawa mudu. A sa digitaka o koya na mataqali o Juta me ia na veiliutaki, ka sa digitaka na vuvale i tamaqu mai vei ira na Juta. Mai na vuvale oqori, a sa ka ni marau ki vua me tauri au ka buli au me'u tui vei ira kecega na Isireli.
5A sa solia vei au ko Jiova e levu na luvequ tagane, ka sa digitaki Solomoni o koya mai vei ira kece na luvequ me veiliutaki vakatui e Isireli taucoko.
6“A sa kaya vei au ko Jiova, ‘Ena tara na noqu vale tabu o Solomoni na luvemu. Au sa qisi koya me luvequ, ka'u na tamana oi au.
7Au na vakataudeitaka talega na nona matanitu ka tawa mudu kevaka sa tudei o koya me muria kece na noqu lawa kei na noqu lewa, me vaka sa vakayacora tiko edaidai.’
8“Ia oqo, ena mata ni Kalou kei na matadra na lewenivanua e Isireli na tamata i Jiova, au sa vakaroti kemuni mo ni vakabauta ka talairawarawa ki na veika kecega sa vakarota vei keda ko Jiova na noda Kalou, me rawa ni tomani kina na kena taukeni tikoga na vanua vinaka oqo, ka mo ni qai solia yani vei ira na nomuni kawa era veisosomitaki ena veitabatamata mai muri ka tawa mudu.”
9Ia kivei Solomoni, a sa kaya, “Ia o iko, Solomoni na luvequ, mo kila na Kalou i tamamu, ka mo qaravi koya ena yalodina kei na lomasoli. Ni sa dikeva na yalo kece ko Jiova, ka sa kila na i tuvatuva kece kei na nanuma ni lomada. Kevaka o na vakasaqarai koya, o na kunei koya; ia kevaka o na vakanadakui koya, ena biuti iko o koya ka tawa mudu.
10Ia mo kila deivaki oqo, ni sa digitaki iko ko Jiova mo tara na nona Valenisoro tabu. Mo vakayacora sara oqo, ka cakava ena yaloqaqa.”
11A sa solia vei Solomoni o Tevita na i tuvatuva kece me baleta na veivalevale me na tiki ni Valenisoro, oqo me vaka na vale me maroroi kina na kena i yaya, kei na veirumu tale eso, kei na Tikina Tabu Sara, o ya na vanua e sorovaki kina na i valavala ca.
12A solia talega vei Solomoni o Tevita na i tuvatuva ni veika kece sa vakananuma me baleta na rara, kei na veirumu era toka wavolita, kei na veivale me maroroi kina na i yaya eso ni vale tabu vata kei na i yau sa vakatabui me nei Jiova.
13A solia talega vei Solomoni o Tevita na i tuvatuva ni nodra veiqaravi na bete kei ira na Livai ena nodra cakacaka ena Valenisoro, ka me ra maroroya na kena i yaya kecega.
14A vakasalataka o Tevita na levu ni siliva kei na koula me vakayagataki ena buli ni veiyaya ni vale tabu,
15na veicina yadua vata na kena i tutu,
16na teveli siliva eso, kei na teveli koula yadua me dau biu kina na i buli madrai tabu sa cabori vua na Kalou.
17A sa vakasalataka talega na levu ni koula dina me vakayagataki ena kedra caka na i cula, na beseni, na joke, kei na levu ni siliva vata na koula me vakayagataki ena caka ni disi,
18kei na levu ni koula dina me vakayagataki ena kena caka na i cabocabonisoro me dau vakamai kina na ka boi vinaka vata na qiqi ni jerupi vakatabana e rua sa vakatateba na tabadrau ena dela ni Kato ni Veiyalayalati i Jiova.
19A sa kaya o Tevita na tui, “Na veika kecega oqo e koto ena dua na i tuvatuva ka volai me vaka sara ga na veivakaro a vakatakila vei au ko Jiova me'u cakava.”
20A sa vosa o Tevita na tui vua na luvena o Solomoni ka kaya, “Mo kaukauwa ka yaloqaqa. Mo tekivuna sara na cakacaka oqo ka kakua sara ni vakalaiva e dua na ka me tarovi iko. Ko Jiova na Kalou ka'u sa qarava ena tiko vata ga kei iko. Ena sega ni biuti iko o koya, ia ena tiko dei ga kei iko me yacova ni o sa vakacavara vakavinaka na cakacaka ni nona Valenisoro.
21Sa soli oti na i tavi me ra vakayacora na bete kei na Livai ena Valenisoro. Era sa nanamaki me ra vukei iko na tamata cakacaka vakamatai kecega, ka ra sa vakarorogo ki na nomu lewa na tamata vata kei ira na nodra qase.”
Who We AreWhat We EelieveWhat We Do
2025 by iamachristian.org,Inc All rights reserved.
