TIKO VOLI MAI NA LEKUTU 10 - Ai Vola Tabu Ena Vakavakadewa Vou（FNV）

Na Davui Siliva

1A sa kaya vei Mosese ko Jiova,

2“Mo cakava e rua na davui siliva ka me buli mai na siliva sa lautuki, ia me dau uvuci oqo me vakasoqoni ira vata mai kina na lewenivanua kei na gauna ni cavu valelaca me ra sa tokitoki tale ka toso yani.

3Ni sa uvuci vakadomoilevu na davui ruarua, me ra soqoni vata yani vei iko na lewenivanua taucoko ena mata ni Vale ni Veitavaki.

4Ia kevaka sa uvuci ga e dua na davui, me ra qai soqoni vata yani vei iko o ira na turaga ni veimataqali e Isireli.

5Ni sa uvuci na davui me solia na i vakaro ni tokitoki, me ra qai cavutu ka lako yani na lewe ni mataqali era keba tiko mai na tokalau.

6Ni sa uvuci tale na i vakaro ni tokitoki oqo ena i karua ni gauna, me ra qai cavutu ka toso yani na lewe ni mataqali era keba tiko mai na ceva. Me dau uvuci na i vakaro ena gauna ga e vinakati me ra sa tokitoki kina.

7Ia kevaka e vinakati me ra soqoni vata mai na lewenivanua taucoko, me uvuci ga vakadodonu na davui ka me kakua ni uvuci me vaka na i vakaro ni tokitoki se vakacibi i valu.

8Na davui e rua oqo me rau na uvuca o rau na luve i Eroni, o rau na bete.

“Na veivakaro oqo sa lesi me vakamuri ena veigauna taucoko sara.

9Kevaka sa ia na veivaluvaluti ena nomuni vanua kei ira na meca era sa vakasaurarataki kemuni, me qai uvuci ena davui na i vakaro ni vakacibi i valu. Au na vukei kemuni, oi au ko Jiova, ka'u na vakabulai kemuni mai vei ira na nomuni meca.

10Ena gauna talega ni marau eso me vaka na Solevu ni Vula Vou kei na solevu vakalotu tale eso, me dau uvuci talega kina na davui ruarua ni o ni sa vakacabora na nomuni soro kama kei na soro ni veivinakati. Me caka oqo mo ni dau vakananuma kina ni sai au ko Jiova na nomuni Kalou.”

Era Biuti Saineai na Isireli

11Ena i karuasagavulu ni siga ni karua ni vula ni karua ni yabaki, sa qai toso tale yani na o mai na dela ni vale tabu.

12Era sa cavutu na Isireli ka lako vakaveitarataravi mai na vanua lala o Saineai; ka sa la'ki toka na o ena vanua lala o Perana.

13Era sa qai cavutu ka lako yani, ena kena i matai ni gauna, me vaka sa vakarota ko Jiova vei Mosese.

14Ena kena i vakarau ni nodra veitosoyaki ena veigauna taucoko, era cavutu taumada e liu na wasewase levu ena yavusa Juta kei na kena drotini, mai na kena wasewase lalai vakamataqali, ka veiliutaki kina o Nasoni na luve i Amenatave.

15E a veiliutaki ena nodra i wasewase lalai na mataqali Isakari o Nacanieli na luve i Suari.

16E a veiliutaki ena nodra i wasewase lalai na mataqali Sevuloni o Iliavi na luve i Eloni.

17Ni sa cavu oti na vale tabu, era sa qai gole yani o ira na luve i Kerisoni kei ira na luve i Mirari, me ra colata, ka liutaka yani na nodra i lakolako.

18A qai lako tarava na i wasewase levu ka liutaki mai na yavusa Rupeni kei na kena drotini, mai na kena wasewase lalai vakamataqali, ka veiliutaki kina o Ilisuri na luve i Siteuri.

19E a veiliutaki ena nodra i wasewase lalai na mataqali Simione o Silumieli na luve i Surisatai.

20E a veiliutaki ena nodra i wasewase lalai na mataqali Kata o Eliasafi na luve i Tiueli.

21Era a qai cavutu me ra lako yani na luve i Koaca, ka ra colata na i yaya tabu. Ni bera ni ra tadu yani ki na vanua ni keba ka tarava, sa daubiri oti tale tu mai kina na vale tabu.

22Sa qai lako tarava yani na wasewase levu ka liutaki mai na yavusa Ifereimi kei na kena drotini, mai na kena wasewase lalai vakamataqali, ka veiliutaki kina o Ilisama na luve i Amiute.

23E a veiliutaki ena nodra i wasewase lailai na mataqali Manasa o Kamelieli na luve i Pitasuri.

24E a veiliutaki ena nodra i wasewase lalai na mataqali Penijamini o Epitani na luve i Kitioni.

25Na i otioti ni lakolako o ira na lewe ni wasewase levu ka liutaki mai na yavusa Tani kei na kena drotini, mai na nodra i wasewase lalai vakamataqali, ka veiliutaki kina o Eiseri na luve i Amisatai.

26E a veiliutaki ena nodra i wasewase lalai na mataqali Aseri o Pakieli na luve i Okirani.

27E a veiliutaki ena nodra i wasewase lalai na mataqali Navitalai o Eira na luve i Enani.

28A sa vaka tu oqo na veitarataravi ni nodra i tosotoso na Isireli ena nodra veiwasewase, ni ra sa cavutu me ra lako yani.

29A sa tukuna o Mosese vei tavalena o Opapi na luve i Jacoro na kai Mitiani, “Keimami sa na lako yani ki na vanua sa kaya ko Jiova me solia vei keda. Mo lako mai vata kei keimami, ni sa yalataka na Kalou me vakasaututaki Isireli, ka keimami na wasea vata kei iko na bula sautu.”

30Sa tukuna vei Mosese o Opapi, “Au na sega ni lako; au na cavutu ka lesu tale ki na noqu vanua, vei ira na kai noqu.”

31Sa vosa o Mosese ka vaka, “Isa, au kerea mo kakua ni biuti keimami, baleta ni o kila vinaka na vanua eda rawa ni tara keba kina ena vanua lala oqo, mo dau vukea na kena dusimaki na sala me muri.

32Kevaka o sa lako vata kei keimami, keimami na wasea vata kei iko na veivakalougatataki e solia vei keimami ko Jiova.

Era sa Cavutu ka Lako Yani na Tamata

33Era sa qai cavutu ka lako yani me tekivu mai Saineai, na ulunivanua tabu, me tolu na siga. A sa dau colati tikoga e liu na Kato ni Veiyalayalati i Jiova me vakasaqara e dua na vanua me ra na vakacegu kina.

34Ia ni ra lako tu mai na dua na vanua ni keba ki na dua tale, sa vakarurugi ira ena siga na o nei Jiova.

35Ena veigauna sa dau colati yani kina na Kato ni Veiyalayalati, sa qai dau kaya o Mosese, “Mo ni lamata cake i Jiova, ka me ra talabusese na kemuni meca, ka vakavukaci laivi o ira era sa cati kemuni.”