1 Here, hou ’n bietjie in gedagte
wat met ons gebeur het.
Kyk hoe ons verneder is.
2Die grond wat ons geërf het,
het in vreemde hande beland.
Uitlanders besit ons eiendom.
3Ons is weeskinders
wat nie meer ’n pa het nie.
Ons ma’s is weduwees.
4Ons moet betaal
vir die water wat ons drink,
brandhout moet ons koop.
5Agtervolgers blaas in ons nek.
Ons is moeg,
maar ons durf nie rus nie.
6By Egipte het ons gevra
vir hulp
en by Assirië vir kos.
7Ons voorouers
het sonde gedoen,
maar hulle is nou al dood.
En nou moet ons daarvoor betaal.
8Slawe het nou ons base geword
en niemand kan ons
van hulle bevry nie.
9Ons loop die risiko
om doodgemaak te word
wanneer ons in die wildernis
kos bymekaarmaak.
10Ons vel het donker geword
van die hongersnood,
asof dit in ’n oond gebak het.
11Ons vroue
word in Jerusalem gemolesteer
en ons dogters
in die dorpe van Juda verkrag.
12Ons leiers word opgehang
aan hulle hande.
Daar is geen respek
vir ons oumense nie.
13Jong mans moet koring maal
by die meul.
Jong seuntjies steier
onder vragte hout
wat hulle moet dra.
14Die leiers kan nie meer
by die stad se poort sit
en beraadslaag nie.
Die jongmense maak nie meer
musiek nie.
15Vreugde het verdwyn
uit ons harte.
Ons vrolike danse
het in treursange
verander.
16Die kroon
het van ons koppe geval.
Dit gaan sleg met ons,
want ons het sonde gedoen.
17Dit het ons swak gemaak.
Ons oë het dof geword.
18Die tempelheuwel is verlate.
Jakkalse sluip daar rond.
19U bly dieselfde, Here,
vir ewig en altyd.
U regeer
van geslag tot geslag.
20Hoekom
hou U aan
om van ons te vergeet?
Hoekom hou U so lank aan
om ons te vermy?
21Lei ons terug na U toe,
Here,
sodat ons
by U kan uitkom.
Maak ons lewe weer
soos dit vroeër was.
22Of het U ons
dan heeltemal verwerp?
Gaan U dan
vir altyd vir ons kwaad bly?
Who We AreWhat We EelieveWhat We Do
2025 by iamachristian.org,Inc All rights reserved.
