1Die droë woestyn
sal bly wees.
Die dor plekke
sal vol blomme wees.
2Ja, daar sal ’n oorvloed wees
van blomme,
en ’n gejuig en gesing!
Die woestyne
sal groen word
soos die Libanonberge,
so mooi soos die weivelde
van Karmelberg
en die vlaktes van Saron.
Daar sal die Here
sy heerlikheid ten toon stel,
en die grootsheid
van ons God.
3Versterk dié
wat moeg geword het.
Bemoedig dié
wat wil neerslaan.
4Sê vir dié wat bang is:
“Wees sterk
en moenie bang wees nie.
Want julle God kom
om wraak te neem,
om julle vyande te straf
en om julle te red!”
5Wanneer Hy kom,
laat Hy blindes sien
en dowes hoor.
6Lam mense sal rondspring
soos bokke,
en mense wat nie kon praat nie,
sal van vreugde sing!
Fonteine sal in die wildernis
ontspring
en strome water
sal die woestyn natlei.
7Die droë grond
sal ’n poel water word,
die dorstige land
borrelende fonteine.
Waar daar eers net blyplek was
vir woestynjakkalse,
sal daar nou
gras, riet en bossies groei.
8Deur die woestyn
sal nou ’n grootpad loop.
Die pad sal genoem word:
die Heilige Weg.
Mense wie se harte boos is,
sal nie daarop reis nie.
Dit sal net oop wees vir mense
wat op God se pad loop.
Dwase sal nie
daar kom nie.
9Langs die pad
sal leeus nie skuil nie.
Daar sal geen roofdiere
wees nie.
Net mense vir wie God gered het,
sal op die pad loop.
10Dié wat die Here vrygekoop het,
sal terugkeer na Jerusalem.
Hulle sal sing
van blydskap,
hulle sal vol vreugde wees,
en ellende en smart
sal verdwyn.
Who We AreWhat We EelieveWhat We Do
2025 by iamachristian.org,Inc All rights reserved.
