1’n Asafpsalm.
Die Here is God, net Hy is God.
Hy praat
en roep die hele aarde op
van waar die son opkom
tot waar dit ondergaan.
2Vanuit Sion, in volmaakte prag,
skyn God in heerlikheid.
3Ons God kom nader,
maar nie in stilte nie:
Voor Hom verteer ’n vuur
en rondom Hom
woed ’n storm.
4Hy roep die hemel
en die aarde
om sy getuies te wees
wanneer Hy regspreek
oor sy volk:
5“Versamel dié
wat getrou is aan My,
en met offers
’n verbond met My sluit.”
6Die hemele
maak sy regverdigheid bekend,
want God self is die regter.
Sela
7“My volk, luister as Ek praat,
Ek sal teen jou getuig, Israel.
Ek is God, jou God!
8Dis nie weens jou offers
dat Ek jou berispe,
of oor jou brandoffers
wat gedurig voor My is nie.
9Ek soek geen bul uit jou stal,
of bokke uit jou kraal nie.
10Want al die diere van die bos
is Myne,
ook die wild op duisende berge.
11Ek ken elke voël op die berge;
al wat roer in die veld
is Myne.
12Sou Ek honger wees,
sal Ek jou dit nie sê nie,
want aan My behoort die aarde
en alles daarop.
13Eet Ek dalk die vleis van bulle,
of drink Ek die bloed
van bokke?
14Offer dankoffers aan God,
en betaal jou geloftes
aan Hom die Allerhoogste.
15Roep na My
in die dag van nood.
Ek sal jou verlos
en jy sal My eer.”
16Maar vir die goddelose
sê God:
“Hoe durf jy
my bepalings voorhou
en jou op my verbond beroep?
17Want jy verwerp
my vermanings
en verontagsaam my opdragte.
18Wanneer jy ’n dief sien,
maak jy soos hy;
en met egbrekers
vereenselwig jy jou.
19Jou mond verkondig kwaad,
en jou tong praat bedrog.
20Jy sit en beswadder jou broer,
en praat
tot nadeel van jou eie broer.
21Dit alles het jy gedoen,
maar Ek het stilgebly,
en jy het gedink
Ek het soos jy geword.
Maar nou eis Ek rekenskap
van jou
en sal jou openlik beskuldig.
22Luister hierna,
julle wat My misken,
anders sal Ek julle
uitmekaarskeur
sonder dat iemand julle verlos.
23Hy wat ’n dankoffer bring,
eer My.
Aan hom wat my pad volg,
sal Ek my verlossing
bekendmaak.”
Who We AreWhat We EelieveWhat We Do
2025 by iamachristian.org,Inc All rights reserved.
