1Die Gees
van die oppermagtige Here
het op my gekom.
Die Here het my gesalf
om goeie nuus te bring
vir arm mense.
Hy het my gestuur
om dié wat hartseer is,
te troos,
om vir die gevangenes
vryheid aan te kondig,
en vrylating
vir dié in die tronk;
2om die genadejaar
van die Here aan te kondig,
die dag van afrekening
vir ons God.
Maar almal wat treur, troos Hy,
3die dag wanneer Hy
vir dié wat in Sion treur,
eer gee in plaas van smart,
vreugde in plaas van droefheid,
blydskap in plaas van hartseer.
Die Here het hulle geplant
soos sterk en groot eike
om sy roem
te vermeerder.
4Hulle sal die verlate stede
herbou,
en die plekke weer opbou
wat lank gelede verwoes is.
Hulle sal die verwoeste stede
herstel,
plekke wat vir geslagte lank
verlate gelê het.
5Buitelanders sal julle kleinvee
laat wei,
vreemdelinge sal julle landerye
en julle wingerde bewerk.
6Julle sal genoem word:
die priesters van die Here,
die bedienaars van ons God.
Julle sal die skatte
van die nasies geniet,
en spog met hulle rykdom.
7In plaas van vernedering
en minagting
sal my volk
’n dubbele deel ontvang
van voorspoed en ewige vreugde.
8“Want Ek, die Here,
het geregtigheid lief.
Ek haat diefstal en misdaad.
Omdat Ek getrou is,
sal Ek my volk beloon
vir hulle lyding.
Ek sluit ’n verbond met hulle
wat vir altyd sal bestaan.
9Hulle afstammelinge
sal bekend wees
onder die volke,
en hulle nakomelinge
onder die nasies.
Almal wat hulle sien,
sal besef dat hulle ’n volk is
wat die Here geseën het.”
10Ek verheug my in die Here!
Ek is bly in my God!
Want Hy het vir my
klere van redding aangetrek,
en vir my die mantel
van regverdigheid omgehang.
Ek is soos ’n bruidegom
met sy sierkroon,
soos ’n bruid verfraai
met haar juwele.
11Soos die grond die plante
laat uitspruit
en die vrugtebome in ’n tuin
vrugte lewer,
so sal die oppermagtige Here
sy reg vir al die nasies toon.
Who We AreWhat We EelieveWhat We Do
2025 by iamachristian.org,Inc All rights reserved.
