Amos 4 - University of Wales Guild of Graduates Translation 1945 (NT, Hosea, Amos)

1Clywch y gair hwn, fuchod Basan,

Y sydd ym mynydd Samaria,

Yn gorthrymu’r gweiniaid,

Yn ysigo’r tlodion,

Yn dywedyd bob un wrth ei harglwydd,

“Dwg ac yfwn.”

2Tyngodd fy Arglwydd Iafe i’w sancteiddrwydd,

“Wele’r dyddiau’n dyfod arnoch

Y dygir chwi ymaith â thryferau,

A’r gweddill ohonoch â bachau pysgota;

3A thrwy adwyon yr ewch allan,

Bob un ar ei chyfer,

A bwrir chwi i Harmon.”

Medd Iafe.

4“Deuwch i Fethel a throseddwch,

Yng Ngilgal ychwanegwch droseddu;

A dygwch erbyn y bore eich aberthau,

A’ch degymau erbyn y trydydd dydd;

5A llosgwch ddiolch-offrwm o surdoes,

A chyhoeddwch offrymau gwirfodd, hysbyswch,

Canys hynny a hoffwch, Feibion Israel.”

Medd fy Arglwydd Iafe.

6“Rhoddais innau i chwi

Lendid dannedd yn eich holl ddinasoedd,

Ac eisieu bara yn eich holl leoedd;

Eto ni ddychwelasoch ataf.”

Medd Iafe.

7“Ateliais innau’r glaw oddiwrthych,

Ac eto dri mis hyd y cynhaeaf;

Pan lawiwn ar un ddinas,

Ar ddinas arall ni lawiwn;

Glewid ar un rhan,

A chrinai’r rhan ni lawiai arni;

8Ac ymlusgai dwy ddinas neu dair i un ddinas,

I yfed dwfr, ac nis digonid;

Eto ni ddychwelasoch ataf.”

Medd Iafe.

9“Tarewais chwi â deifiad ac â llwydni,

Diffeithiais eich gerddi a’ch gwinllannoedd,

A’ch ffigyswydd a’ch olewydd a fwytâi’r lindys;

Eto ni ddychwelasoch ataf.”

Medd Iafe.

10“Anfonais haint i’ch plith, yn ol dull yr Aifft,

Lleddais eich gwŷr ifainc â’r cleddyf,

Gan gymryd eich meirch yn gaeth;

A pherais i ddrewi’ch gwersylloedd godi hyd at eich ffroenau;

Eto ni ddychwelasoch ataf.”

Medd Iafe.

11“Dymchwelais rai ohonoch

Fel y dymchwelodd Duw Sodom a Gomorra,

Ac aethoch fel pentewyn a gipiwyd o’r gynneu;

Eto ni ddychwelasoch ataf.”

Medd Iafe.

12“Am hynny fel hyn y gwnaf iti, Israel — .

Am mai hyn a wnaf iti,

Bydd barod, Israel, i gyfarfod â’th Dduw.”

13Canys ef yw lluniwr y mynyddoedd,

A chrëwr y gwynt,

Ac y sy’n mynegi i ddyn beth yw ei feddwl;

Gwneuthurwr gwawr a gwyll,

Ac y sy’n sengi ar uchelfeydd y ddaear;

Iafe, Duw lluoedd, yw ei enw.