Jeremiya 48 - Shona Common Language Bible（SCLB）

Kuparadzwa kweMoabhu

1Zvanzi naTenzi wehondo nehondo, Mwari weIsiraeri nezveMoabhu,

“Zvazoriwana guta reNebho

nokuti raparara,

Kiriyataimu yanyadziswa, yatorwa,

guta remasvingo

rafumurwa rapazwa.

2Mbiri yeMoabhu hapasisina

muguta reHeshibhoni imomo

vakarirongera bangano rakaipa rokuti,

‘Uyai tiritsakatise sorudzi.’

Nairowo guta reMadhimeni

richaitwa kuti riti zirikiti kunyarara,

bakatwa richakuronda.

3“Heyo mhere yarira kuHoronaimu!

Hero dongo zvaro,

raparara zvokuparara zviya!

4Moabhu yaparara,

heyo mhere yepwere dzacho

5nokuti vanokwira mukwidza wokuRuhiti

iri mhere chete kuhwihwidza

nokuti pamateru okuHoronaimu

heyo mhere yenhamo yokuparadzwa.

6“Tizai muzviponese.

Itai sedhongi romusango murenje,

7pari pamusana pokuti makavimbaka imi

namabasa enyu noupfumi hwenyu,

newewo uchatotorwa

iye mwari wenyu Kemoshi

achaendwa naye kuutapwa, pamwechete

navapristi vake namachinda ake.

8“Mharadzi ichasvika mumaguta ose

pasina kana guta rinopapunyuka,

nhika ichaparara

bani richiparadzwa

sokureva kwakaita Tenzi.

9Ipa Moabhu mapapiro

kuti abhururuke,

maguta ayo achava matongo

asina munhu ageremo.”

10Ngaawirwe norushambwa munhu asingaite basa raTenzi nomwoyo wose. Ngaawirwe norushambwa munhu anochengeta zvake bakatwa asingadeure ropa naro.

Kuparara kwemaguta eMoabhu

11Moabhu yakagarika kubvira paupwere hwayo

uye igere zvayo kudivi ramakomo kusina mhepo.

Haina kana kumbokwengurwa zvayo,

chirongo nechirongo

kana kutomboendeswa muutapwa.

Saka mukanwa mayo muchakangodaro

kunhuwirira kwayo hakusatiwo kwasanduka.

12“Naizvozvo, zvanzi naTenzi chinzwai, ‘Mazuva ari kuuya andichaitumidzira vadeuri vachamurereka vagokwengura midziyo yayo vachipwanya-pwanya zvirongo zvayo.’

13Ipapo Moabhu ichanyara namwari wayo, Kemoshi, sokunyara kwakaita imba yeIsiraeri neBhetieri chivimbo chayo.

14“Chamungabangotaurirawo muchizviti,

‘Tiri magamba chaiwo chii,

nemvumba chaidzo dzokurwa hondo,’

15Mharadzi dzeMoabhu

namaguta ayo vakwidza kuno uku.

Majaya ayo, ano chaiwo, akasvika

achiti zvino rororo kufa.

Ndizvo zviri kutaura Mambo

ane zita rokuti

Tenzi wehondo nehondo.

16Nyatwa yeMoabhu yasvika

nhamo yayo iri kumhanya kuuya.

17Ichemei imi mose

muri munharaunda yayo yakaitenderera

nemi mose munoiziva nezita.

Itii: ‘Zvauya sei chokwadi kuti

tsvimbo huru youmambo ityoke,

mudonzvo wacho wembiri.’

18Jitika pambiri yako apo

ugarewo pasi pakati kukutu kuoma,

iwe mugari weDhibhoni

nokuti mharadzi yeMoabhu

yakuvinga ikaparadza

nzvimbo dzoko dzokuhwanda muhondo.

19Mira panzira utarise

iwe mugari wokuAroero

ubvunze mutizi nomupunyuki

kuti, ‘Zvaita sei?’

20Moabhu yanyadziswa nokuti yaputsika,

hwihwidzai muchichema!

Udza vanhu muna Arinoni

kuti, Moabhu yaparara.

21“Yasvika nguva yokutongwa kwenyika yomuzanda wakasandarika neHoroni neJahiza neMefaati

22neDhibhoni neNebho neBhetidhibhuratimu

23neKiriyataimu neBhetigamuri neBhetimeoni

24neKiriati neBhozira namaguta ose enyika yeMoabhu okure neepedyo.

25Umambo hwekwaMoabhu hwaparara, simba reMoabhu rakaparara. Ndizvo zviri kutaura Tenzi.”

Kunyadziswa kuchaitwa Moabhu

26“Muraradzisei nokuti azvitutumadza kwazvo pana Tenzi muite kuti Moabhu isare yava kuumburuka mumarutsi ayo iyowo ive chiseko chenyika.

27Handiti Isiraeri yanga iri chiseko chako iwe Moabhu. Iyo Isiraeri yakambowanikwa iri pakati pembavha here, zvaunobva wati paunongotaura nezvayo unobva wadzungudza musoro kudaro?

28“Tamai mumaguta mundogara mubako,

imi vagari veMoabhu.

Itai hwenjiva inovaka dendere

mumativi memipata yamakomo.

29Guhu rokuzvikudza kweMoabhu takarinzwa,

kuzvikudza kukuru kwazvo

nokuzvitutumadza kwayo

nokuzvizuwidza kwayo

nokuzvidadisa kwayo

nomwoyo wayo wokuzvinyundumadza.

30“Ndinoziva unhunzvatunzva hwayo,

kuzvikudza kwayo hakuna zviripo

zviito zvayo hazvina maturo.

Ndizvo zviri kutaura Tenzi.

31Ndokusaka ndichihwihwidza kuchema Moabhu,

ndinobongomora mhere kuchema Moabhu yose,

ndinochema vanhu vokuKiriheresi.

32“Iwe mugirepisi weSibhuma,

ndinokuchema kupinda gungwa reJazeru!

Mapazi ako anotandira napamusoro pegungwa

kusvikira nokuJazeru.

Michero yako yapazhizha

nezvinobva mumunda wamagiresi

zvawirwa nomuparadzi.

33“Rufaro nokupembera zvabviswa

munyika inobereka zvakawanda,

nyika yeMoabhu.

Ndakaita kuti waini ipwe

muzvisviniro zvewaini.

Hapana achambokanya magirepisi

nenziyo dzokufara,

kudaidzira kwaro hakusisiri kwokufara.

34“Maguta Heshibhoni neEreare aridza mhere nokuJahazi kwose vadudza nezwi ravo kubvira kuZoari kusvikira kuHoronaimu nokuEgiratishereishiya. Chiripo ndechokuti mvura yokuNimurimu yaperawo.

35Izvozvi ndava kuita kuti Moabhu zvichiiperera, ndizvo zvinotaura Tenzi, iyo Moabhu inopira chibayiro panzvimbo yakatunhumara yokuteurira ichipisira rusenzi kuna mwari wayo.

36Ndokusaka ndichidandaura mumwoyo senyere, ndichichema Moabhu. Mwoyo wangu uri kuchema senyere vanhu vokuKiriheresi nokuti upfumi hwavanga vazviwanira hwaparara.

37“Musoro woga woga wakaveurwa, uye ndebvu dzose dzaguswa, akachekwachekwa maoko ose akasungira saga muchiuno.

38Pamatenga ose edzimba dzeMoabhu napamisika yayo kunongova kuchema koga koga, nokuti ndakapwanya Moabhu sehari isina achaida. Ndizvo zvinotaurwa naTenzi.

39Kupwanyika here ikoko! Kuungudza here ikoko! Kudzoka here ikoko kwakaita Moabhu achinyara! Moabhu yava chiseko chenyika nechinhu chinokatyamadza vose vomunharaunda yayo.”

Moabhu haisi kuzopapunyuka

40Chiripo ndechokuti zvanzi naTenzi:

“Mamboti maonei zvenyu,

kuchaita munhu achabhururuka

ari mhepo zvayo kumhanya segondo,

achitambanudzira mapapiro ake kurwisa Moabhu!

41Maguta achatorwa

uye nhare dzokuzvidzivirira muhondo dzichabvutwa.

Mwoyo yavarwi veMoabhu,

pazuva iroro, ichaita

semwoyo womukadzi ari pakusununguka.

42Moabhu ichaparadzwa

isisazovazve rudzi,

pamusana pokuti yakazvitutumadza

ichirwisana naTenzi.

43Kutyisa negomba nomusungo

zvakumirira iwe mugari weMoabhu.

Ndizvo zvinotaura Tenzi.

44“Anenge atiza zvinhu zvinotyisa

achawira muhunza

anenge abuda muhunza imomo

achabatwa nomusungo

nokuti ndichapinza Moabhu muna izvozvi

mugore rokurangwa kwavo,

ndizvo zviri kutaura Tenzi.

45Mumumvuri weHeshibhoni

vatizi vanombomiramo

simba ravaperera nokuti

muHeshibhoni mabvira moto,

murazvo wabvira mumba maSihoni.

Waroromesa huma yeMoabhu,

ndaza youmambo

hwokuvanakomana vebongozozo.

46“Zvakuwana iwe Moabhu!

Vanamati vaKemoshi pavo pavaperera

nokuti vanakomana venyu

navanasikana venyu vakatapwa

vaendwa navo kuutapwa.

47“Zvakadaro zvazvo ndichadzosera

Moabhu makomborero ayo mune ramangwana,”

ndizvo zviri kutaura Tenzi.

Zvarehwa izvozvi ndokutongwa kuchaitwa Moabhu.