Nziyo 90 - Shona Common Language Bible（SCLB）

BHUKU RECHINA(Nzi 90—106)Munamato waMosesi munhu waMwari

1TENZI ndimi manga muri musha wedu

pazvizvarwa zvose.

2Makomo asati aberekwa

musati masika nyika napasi pose.

Muri Mwari narini narini, chingo nechingo.

3Munopindura munhu kuva huruva

munongoti vanhu,

“Dzokerai kune zvamakanga muri.”

4Nokuti churu chamakore kwamuri

chakangoita sazuro kana chapfuura

kana sakanguvana kokugaririra usiku.

5Munotsvaira vanhu,

vakaita sechiroto,

vakaita souswa hunosvibirira mangwanani.

6Kumangwanani hunomuka hwakasvibirira

kumanheru hunouna hwosvava.

7Nokuti hasha dzenyu dzinotiparadza.

Tinobva taparara nokutya kushatirwa kwenyu.

8Munoisa uipi hwedu pamberi penyu

uye zvitadzo zvedu zvapachivande

munozviisa pachena pauso hwenyu.

9Mazuva edu ose anopfuura

imi makashatirwa;

makore edu anopera sefemo.

10Makore oupenyu hwedu

makumi manomwe

kune vakasimba vanoita makumi masere

asi akanaka acho

inongova nhamo namatambudziko,

haatani kupera,

isuwo tobva tobhururuka toenda.

11Ndiani anoziva panosvika hasha dzenyu.

Hasha dzenyu dzakangoenzana

nokutyisa kwenyu

12saka tidzidziseiwo kuverenga mazuva edu

kuti tingwarire.

13Muchasvika kupiko nhai TENZI?

Dzokai zvenyu

muitire varanda venyu ngoni.

14Tiratidzeiwo mwoyochena wenyu mangwanani

kuti tipembere kufara uye tifare mazuva edu ose.

15Tipeiwo kufara kwamazuva

akaenzana namazuva amakatirwadzisa

uye kwamakore atakaona nhamo.

16Ratidzai mabasa enyu kuvaranda venyu

uye mbiri yenyu kuvana vavo.

17Nyasha dzatenzi Mwari wedu ngadzive patiri.

Basa ramaoko edu muite kuti ribudirire.

Hongu ngaribudirire basa ramaoko edu.