Jobhu 25 - Shona Common Language Bible（SCLB）

Bhiridhadhi.Ukuru hwaMwari nokusachena kwomunhu

1Bhiridhadhi Mushuhi akapindurawo achiti,

2“Mwari ano ukuru uye anotyisa

ndiye anochengetedza runyararo

kwake kumusoro ikoko.

3Hondo yake inoverengeka here,

ndiani asingavhenhekerwi nechiedza chake?

4Munhu angave akarurama sei

pamberi paMwari,

munhu akaberekwa nomukadzi

angave akachena sei?

5Inga wani kwaari

kunyange mwedzi zvawo haupenyi

kana nyenyedzi kwaari hadzina kuchena.

6Ko kutozotiwo munhu, honye zvake,

munhu chidukutse zvacho.”