Sirac 51 - Pangasinan Meaning-Based Bible(MBBPAN83)

Sakey a Kanta na Pisasalamat

1Pisasalamatan ta ka, O Katawan tan Ari;

Idadayew ta ka a Dios tan Manangilaban ko.

Pisasalamatan ta ka,

2ta tinulongan mo ak tan inyagel mo ak.

Impaliis mo ak ed patey,

diad panagderal na tila tan panagpaoges.

3Tinulongan mo ak nen anggapoy arum ya ontulong;

lapud baleg a panangasim inlaban mo ak

ed saray amayamay a gunigon ya asagmak ko,

diad alabas a panagbosul na saray kalaban ko,

a labay dan erepen so bilay ko;

4diad ag pakaingas lapud makapairap ya asewek

a manlalapud pool ya ag ko sinelselan;

5diad dilin patey;

diad tila-tilan panagpaoges a nidalem ed ari.

6Aminsan niarap ak ed patey;

7aliber ak na saray kalaban ed anggan iner.

Nananap ak na toon ontulong ed siak,

balet anggapoy tood man.

8Balet, O Katawan, anunotan koy ontan lan panangasim

tan saray ginagawam ed imbeneg a panaon.

Anunotan ko ya iyaagel mo ray manmamatalek ed sika,

tan ilalaban mo rad saray kalaban da.

9Insan manlapu diad tapew na dalin nampikasi ak ed sika

ya iyagel mo ak ed patey.

10Nampikasi ak, “O Katawan, sika so amak,

ag mo ak pa ikakaindan ed saray gunigon ko

no anggapoy nagawaan ko sumpad saray mapaatagey a kalaban ko.

11Idayew ta ka lawas

tan kantaan ta ka na saray imno na pisasalamat.”

Inebatan moy pikakasik,

12tan inlaban mo ak ed taktakot na deral.

Kanyan pisasalamatan tan idadayew ta ka.

O Katawan, idadayew ta ka!

Say Pananap ed Kakabatan

13Nen ogaw ak ni, kasakbayan na impanbiabiahik, masebeg kon impikasi a nawalaan ak na Kakabatan.

14Linma ak ed Timplo tan kinerew koy Kakabatan, tan anapen ko legan kon mambilay.

15Manlapud kakkaksilan ko ya anggad kataktakenan ko, say Kakabatan so kawalaay gayagak. Nanlapud impanogaw ko, say dalan na Kakabatan so maptek kon pankukurangan.

16Naawat ko so Kakabatan nen inggapok a derengelen, et atumangan ak na baleg a pakatalus.

17Lawas manaaral ak tan misalsalamat ak ed amin da ray nambangat ed siak.

18Ginetmak so mambilay a makabat tan mapeleng ak ed panaggaway kamaungan. Anggapoy pagbabawian ko.

19Ginawaan koy anggaay nayarian ko ed pakakayaryan kod Kakabatan. Nen nampikasi ak, maermen ak ya angipatway ontan lan kinaarawik ed Kakabatan.

20Balet tinibokel koy kanunotan ko a nagamuran koy Kakabatan, et nalmok nen inmarawi ak ed kasalanan. Binmaleg ak ed Kakabatan nanlapud samay inmonan impakalmok, tan ag ak balut mambilay no anggapoy Kakabatan.

21Lapud adagdag ak na pampilalek a narumog ko, atumangan ak na mapalalo.

22Initdan ak na Katawan na langkap na maung a panagsalita, et inkanak a mangidayew ed sikato.

23Dago kayo, amin yon mankaukolan na bangat, tan manaral kayod iskuilaan ko.

24Akin et aakoen yon anggapoy amta yo tan anggapoy gagawaen yo nipaakar ed satan a kipapasen yo?

25Saya so ibabagak: anggapoy gastosen ed pakagamur na Kakabatan.

26Isolung yoy pako, tan manaral kayon maabuloy. Asingger lawas so pankanawnawa.

27Sikayon dili so onnengneng! Tuan ag ak nanaral a maung, balet arumog koy baleg a pakapenekan.

28Anggan antoy karakel na ibayar yod pakagamur ed Kakabatan, anggapoy nadarak yo.

29Manggayaga tan misalamat kayo lapud panangasi na Katawan, tan ag kayon balut ombabaing a mangidayew ed sikato.

30Gawa yoy kimey yo ed dugan oras, et tumangan kayo na Katawan diad isisipen ton dugan panaon.