Say Kakabatan nen Solomon 9 - Pangasinan Meaning-Based Bible(MBBPAN83)

Kinmerew na Kakabatan si Solomon

1“Dios na saray lalakik, mapangasin Katawan, diad panamegley na salitam pinalsam ya amiy bengatla.

2Diad panamegley na Kakabatan mo, ginawam ya oleyan na too iray amin a pinalsam,

3oleyan tod inkasanto tan inkatonung so sankamundoan, ipakurang toy kaptekan a kataruk na kalinisan.

4Itdan mo ak pay Kakabatan ya akayorung ed abay na tronom; itdan mo ak pay pasen ed pegley da ray anak mo.

5Siak so aripen mo, a singa si inak ya akaona nen siak. Sakey ak labat a too. Aliwa ak a mabiskeg, tan antikey so bilay ko. Melag so pakatalus kod Ganggan tan no panoy pangikanak.

6Anggan bilang ayadyari so sakey a too, nipasen a singa anggapo no andid sikatoy Kakabatan a manlalapud sika.

7Pinili mo ak ed saray arum a totoo a magmaliw ya ari na saray dilin totoom, tan manintinsia ed saray anak mon lalaki tan bibii.

8Imbagam ed siak a mamaalagey ak na Timplo ed masanton palandey mo, sakey ya altar ed Jerusalem, say siudad a pinilim a panayaman mo. Kapara ya na Timplo ed tawen ya imparaan mo nen gapo.

9Kaibam so Kakabatan tan amta to ray gagawaen mo; walad abay mo nen ginawam so mundo. Amta toy pakaliliketan mo, no antoy maung tan ontokuy ed saray ganggan mo.

10Ibakim pay Kakabatan manlapud saray masanton katawenan, manlapud mapagalang a tronom, pian makapankimey ed abay ko, tan naaralan ko no antoy pakaliliketan mo.

11Amta tan natatalusan toy amin a bengatla, tan maptek ya iwanwan to ak ed saray gagawaen ko. Iyagel ak na kagalangan to.

12Maptek kon sintinsiaan ed satan iray totoom, tan magmaliw ak a manepeg ed trono nen amak. Magmaliw a makapaliket iray gawaen ko.

13“Siopay makaaral na linaway Dios?

14Ag ya nayarian a gawaen na kanunotay too, tan ibabalang kami na saray pilosopiya mi,

15lapud pabebelaten na laman min ompatey so kamarerwa mi. Say laman et sakey ya ag mansiansian bengatlan ginawad dalin, sakey a samper ed ag manondan kanunotan.

16Papalaranan mi labat iray nipaakar ed dalin; nepeg min panirapan ya aralen iray bengatlan asingger ed sikami. Siopa sirin so makapanilalo a natalusan to ray mangatatawen a bengatla?

17Anggapoy toon makaamta na linawam likud no inter mod sikaton onona so Kakabatan, tan imbakin so ispiritu santom ed sikato.

18Diad onyan polaing, saray totoo et nilira ra ed dugan dalan, naaralan day makapaliket ed sika, tan inyarawi ra na Kakabatan ed kaatapan.”