2 Saray Awaran 6 - Pangasinan Meaning-Based Bible(MBBPAN83)

Nampaliwaway Solomon ed saray Totoo(1 Ar. 8:12-21)

1Nampikasiy Solomon,

“Katawan, nilabay moy manayam

ed kaloreman tan kabilongetan.

2Amaalagey ak natan na marakerakep a timplon para sika,

sakey a pasen a panayaman mo

ed ando lan ando.”

3Legan a manalalagey iray totood man, inarap ira nen Solomon, tan kinerew ton bindisionan iray Dios.

4Inkuanto, “Nagalang komun so Katawan a Dios na Israel! Sinumpal toy sipan tod amak a David, sanen inkuantod sikato,

5‘Manlapud samay agew ya impangipaway kod Egipto ed saray totook, ag ak nampili na anggan anton siudad ed intiron dalin na Israel a pangipaalageyan na timplon pangigalangan ed siak tan ag ak nampili na siopaman a mangipangulod saray totook ya Israelita.

6Balet natan pinilik so Jerusalem a pasen a pangigalangan ed siak, tan pinili ta ka, David, a manoley ed saray totook.’”

7Intuloy nen Solomon ya inkuan, “Nampilalekan nen amak a David so mangipaalagey na timplo a pangigalangan ed Katawan a Dios na Israel,

8balet inkuan na Katawan ed sikato, ‘Maung so impanpilalek mon mamaalagey na timplo a para siak,

9balet aliwan sikay mangipaalagey. Say dilin anak mo so mangipaalagey na timplok.’

10“Sinumpal natan na Katawan yan sipan to: sinalatan kon manarid Israel si amak a David, tan nipaalagey koy timplon pangigalangan ed Katawan a Dios na Israel.

11Inyan kod Timplo so Kaban na Sipanan a nankarga na saray tapyak a bato a tanda na impisipanay Katawan ed saray totood Israel.”

Say Pikakasi nen Solomon(1 Ar. 8:22-53)

12Kayari to ya, diad arap na saray totoo, nanalagey si Solomon ed arap na altar tan intagey to ray lima to a nampikasi. (

13Nanggaway Solomon na gansan intablado tan inyan tod pegley na patio. Duara tan kapalduan mitro a kuadrado so kabaleg to tan sakey tan kapalduan mitro so kaatagey to. Sinmapat ed sayan intablado, tinmalimukor ed pasen a nanengneng na balang sakey, insan to inyatagey ed tawen iray lima to.)

14Onyay pikakasi nen Solomon: “Katawan a Dios na Israel, anggapoy arum a dios a miparad sika diad tawen odino diad dalin! Matoor kad impisipanan mod saray totoom, tan ipapanengneng moy ag mangoman a panangarom ed saray totoon sigput a matoor ed sika.

15Tinoor moy sipan mod amak a David ya aripen mo, tan diad sayan agew sinumpal moy amin ya imbagam.

16Et natan, Katawan a Dios na Israel, pikasik ed sika a sumpal mo pa ni may sakey ya insipan mod amak sanen inkuanmod sikaton wala lawas so kabyangay boleg ton manari ed Israel, no saray kabyangay boleg to et pampelengan dan onuren so Ganggan mo a singa impangonur tod sika.

17Kanyan pikasik ed sika, O Katawan a Dios na Israel, a sumpal mo pay amin ya insipan mod kinen David ya aripen mo.

18“Balet talaga kasin makapiayam kad saray totoo diad tapew na dalin, O Dios? Ag ka nakarga na anggan say intiron tawen, kanyan panon kan nakarga na sayan Timplon impaalagey ko?

19Katawan a Dios ko, dengel mo pay pikakasik tan saray kerew ko, siak ya aripen mo.

20Bantayan mo pad agew tan labi yan Timplo, say pasen ya insipan mon pangigalangan ed sika. Dengel mo ak pa sirin legan kon mampipikasi ya akaarap ed sayan Timplo.

21Dengel mo pa ray pikakasik tan saray pikakasi na saray totoom no mampikasi ran akaarap ed sayan pasen. Ditad ayaman mon tawen, dengel mo kami pa tan pirdona mo kami.

22“No naakusa so siopaman a too lapud impanggawa toy kaogsan ed kapara ton too tan niakar ed altar mo diad sayan Timplo, ta mansamban anggapoy kasalanan to,

23O Katawan, dengel ka pad tawen ta sintinsiaan mo ray aripen mo. Dusam pay toon nankasalanan onung na kanepegan to, tan ibolus moy anggapoy kasalanan.

24“No atalo na saray kalaban da iray totoom ya Israelita, lapud nankasalanan irad sika, insan ira ompawil ed sika tan mampikasi ra diad sayan Timplo, ta onkerew iray pirdona,

25dengel ka pad tawen, O Katawan. Pirdonam pa ray kasalanan da, tan ipawil mo rad dalin ya inter mod sikara tan saray lalaki ra.

26“No mankasalanan ed sika iray totoom tan dusaen mo ra diad panamegley na ag mo pangiter na oran, insan ira magbabawi tan onarap irad sayan Timplo diad pampikasi ra,

27dengel mo pa rad tawen, O Katawan, tan pirdonam iray kasalanan da ray aripen mo, saray totoom ya Israelita tan ibangat mo pad sikaray maptek a pambilay da. Insan, O Katawan, ipelag moy oran ed dalin mo ya impatawir mod saray totoom.

28“No walay eras ed dalin, odino salot, odino namagaan iray tanaman, odino deralen ira na saray dorun, odino dogpaan na saray kalaban iray totoom, odino mansakit o manginagem ira,

29dengel mo pa ray pikakasi ra. No siopaman ed saray totoom ya Israelita odino amin da et iyonat day kalimaan da ed sayan Timplo diad pampikasi ra lapud impapuson ermen da,

30dengel mo pa ray pikakasi ra. Ditad ayaman mod tawen dengel mo pa ra tan pirdonam ira. Sika labat so makaamta ed kanunotan na balang sakey a too. Iter mo pad balang sakey so kanepegan ton awaten,

31pian takotan ka na saray totoom tan onuren da ka legay panaon na pambilay da ed dalin ya inter mod saray lalaki ra.

32“No say sakey a sangkailin manaayam ed arawin bansa et nadngelan toy ontan lan inkatalonggaring mo tan pakapanyarim, tan no panon a sipaparaan ka lawas ya ontulong, insan onla dian mampikasi diad Timplo,

33dengel mo pay pikakasi to. Diad ayaman mod tawen Katawan, dengel mo pa tan iter mo so antokaman a kerewen tod sika, pian naamtaan tan takotan ka na amin a katoowan ed mundo a singa saray totoom ya Israel. Naamtaan dad satan a diad sayan Timplo ya impaalagey ko so nepeg a pangigalangan ed sika.

34“No iganggan mo ray totoom ya onlan mibakal ed saray kalaban da et mampikasi rad siak, inerman so kawalaan da ya akaarap irad sayan siudad a pinilim tan diad sayan Timplon impaalagey ko a para sika,

35dengel mo pa ray pikakasi ra. Dengel mo pa rad tawen, Katawan, tan panalom ira.

36“No mankasalanan ed sika ray totoom—ta anggapo lantiy anggan sakey a too ya ag mankakasalanan—tan diad pasnuk mo et impatalom irad saray kalaban da tan ipadakep mo rad arum a dalin ya anggan anto lay kaarawi to,

37dengel mo pa ray pikakasi na saray totoom. No diad saman a dalin et magbabawi ra tan mampikasi rad sika, ipatwa ray inkakasalanan tan inkaoges da, dengel mo pa ray pikakasi ra, O Katawan.

38No diad saman a dalin, et petepeteg tan masimoon iran magbabawi, tan mampikasi ran akaarap ed sayan dalin ya inter mod saray lalaki mi, diad sayan siudad a pinilim, tan diad sayan Timplo ya impaalagey kon para sika,

39dengel mo pad satan iray pikakasi ra. Dengel mo pa rad ayaman mod tawen, kasian mo ra, tan pirdonam iray amin a kasalanan da.

40“Natan, O Dios ko, imano mo kami pa tan talineng mo ray pikakasin nibalikas ed sayan pasen.

41Alagey ka, Katawan a Dios, insan ka onloob ed Timplo a kaibam so Kaban na Sipanan a tanda na pakayarim, tan manayam ka dia ed ando lan ando. Bindisionan mo pa ray paparim ed amin a gawaen da, tan manliket komun iray totoom lapud kaabigan mo ed sikara.

42Katawan a Dios, ag mo komun ipopolisay so ari a pinilim. Nudnunot mo pa may ag mangoman a panangarom ed kinen David ya aripen mo.”