Jeremias 41 - Pangasinan Meaning-Based Bible(MBBPAN83)

1Nen kumapiton bulan, si Ismael a lakin anak nen Natanias tan apo nen Elisama, tan sakey a kabyangay pamilya na ari, linmad Mizpa a kaiba to ray samploran lalaki, ta nengnengen day Gobirnador Gedalias. Nen wala rad Mizpa tan mandorongo ra,

2inoyus nen Ismael so ispada to tan saramay samploran lalaki, insan da pinatey si Gedalias.

3Pinatey met nen Ismael ya amin iray Israelitan kaiba nen Gedalias ed Mizpa tan saray sondalon taga Babilonia a nibanan wadman.

4Kaimbuas, kasakbayan a naamtaan so impamatey ed kinen Gedalias,

5wala ray walomplon lalakin sinmabi a nanlapud Sikem, Silo, tan Samaria. Inekal da ray balbas da, pinipilat da ray kawes da, tan sinasalger day laman da. Sankaawit da ray trigo tan say insinso ya ibagat da ed dalem na Timplo.

6Pinmaway ed Mizpa si Ismael tan manakakis ya inabet to ra. Kaasingger tod sikara, inkuanto, “Loob kayod siudad ta nengneng yoy Gedalias.”

7Kaloob dad siudad, pinatey ira nen Ismael tan saray totoo to, insan da impepelag ed bobun iray bangkay da.

8Balet walay samplora ed samay grupo ya akikasid kinen Ismael, “Ag mo kami kari papateyen! Walay trigo, sibada, larak na oliba, tan dilo mi a niamut ed kaalogan.” Kanyan kinawanan toy bilay da tan ag to ra impipatey ed saramay kakaiba ra.

9Balbaleg a bobun imay angipelagan nen Ismael ed saray bangkay na saramay pinapatey to. Sikato man imay bobun a ginawa nen Ari Asa nen dodogpaan nen Ari Baasa na Israel. Pinano nen Ismael na bangkay imay bubon.

10Insan dinakep nen Ismael iray bibiin anak na ari tan saray arum a totoo ed Mizpa a sikaray impalima nen Nebuzaradan a pangulo da ray sondalo na Babilonia ed kinen Gedalias. Inala nen Ismael iran priso, insan da ginapwan so amaarap ed dalin na Ammon.

11Nadngelan nen Johanan a lakin anak nen Carea tan amin da ra may kakaiba ton pangulo na sondalo so maoges a ginawa nen Ismael.

12Kanyan intagar da ray totoo ra tan nila ran labanan si Ismael. Nabot da ed pasen ya asingger ed baleg a dipositoway danum ed Gabaon.

13Aliketan ira may prison inaala nen Ismael nen anengneng day Johanan tan saray pangulo na saray sondalo.

14Kanyan pinmoliktar ira may priso tan batik irad kinen Johanan.

15Balet nibatikan nen Ismael tan saramay waloran kakaiba to si Johanan, insan linma rad dalin na Ammon.

16Si Johanan sirin tan saramay kakaiba ton pangulo na sondalo et inaasikaso da ra may sondalo, bibii, anak, tan saray yunuko ya inaalan priso nen Ismael ed Mizpa kayari ton pinatey si Gedalias.

17Insan ira sinmiput ya onlad Egipto. Tinmonda ran agano ed Kimham ya asingger ed Betlehem. Ginetma ray onla ed Egipto,

18pian nibatikan da ray taga Babilonia, ta antakot da ra lapud samay impamatey nen Ismael ed kinen Gedalias a ginawa na ari na Babilonia a gobirnador na dalin.