Job 27 - Pangasinan Meaning-Based Bible(MBBPAN83)

1Inmebat si Job:

2“Isambak ed ngaran na mabilay a Makapanyarin-amin a Dios,

ya angekal na kanepegan ko tan amapait na bilay ko—

3legan a paingasen ak na Dios;

4say bibil ko ag mangibalikas na antokaman a maoges;

say dilak ag mantila.

5Ag kon balut ibaga a sikayo so duga;

legan a mabilay ak ipasoot kon anggapoy kasalanan ko.

6Anggan kapigan italindeg ko a wala ak ed katonungan;

malinis so konsinsiak ed kapigan man.

7Amin iray onsusumpa tan onlalaban ed siak,

nadusa ra komun a singa kanepegan da ray totoon maoges tan aliwan matonung.

8Antoy ilalo na toon anggapoy Dios to,

no babawien la na Dios so bilay to?

9No gunigon so onsabid sikato, dengelen kasi na Dios so itawag to?

10Nampilalekan to komun so liket ya iiter na Dios,

tan nampikasi lawas komun ed sikato.

11Aboluyan yo ak a mangibangat ed sikayoy ontan lan kabaleg na pakayari na Dios,

tan mangipaliwawa na ginetma na Dios a Makapanyarin-amin.

12Balet andi la, ta anengneng yo met lamlamang;

akin sirin et mansasalita kayoy andi-kakanaan?”

[Inmebat si Zofar]

13“Onya so panusa na Makapanyarin-amin a Dios ed maoges tan managpairap a too.

14Nayarin nawalaan na amayamay ya anak a lalaki,

balet napatey iran amin ed bakal;

kulang lawas so tagano da ray anak to.

15Ompatey ed salot iray makaligtas ed bakal,

et ag manermen iray anggan kaasawaan da.

16Nayarin daakan so pilak na toon maoges,

tan dakerakel iray kawes to;

17balet isolung na saray totoon

matonung iray kawes to,

tan apagen na saray anggapoy kasalanan iray pilak to.

18Singa abung na genggeng so abung ya ipaalagey na toon maoges,

odino singa alolung ed alog a panagbantayan na sakey aripen.

19Onogip a mayaman no maminsan a labi,

et kabangon tod kabwasan anggapo lay kayamanan to.

20Onsabid sikatoy takot a singa biglan delap;

say alimbuasabos ed labi itikyab tod arawi;

21say dagem a manlapud bokig so mangyarawid sikatod abung to;

22onsiplug ed sikato ya andi-panangasi,

legan a gagawaen toy anggaay nayarian ton onarawi.

23Mambanesbes ya ombasig so dagem ed sikato legan ya ombabatik,

tan patakoten to lapud pakayari ton manderal.