Sirac 37 - Pangasinan Meaning-Based Bible(MBBPAN83)

Tila-tilan ran Kaaro

1Nayarin ibaga na siopaman a sikatoy kaarom, balet wala ray totoon kakaaro ed salita labat.

2Singa patey so ermen ya iiter na impanbarungan na malet a sankaaro.

3Walad sikatayo yan maoges a liknaan! Akin et wala ya? Panon ton pinano so mundo na panamalikdo?

4Wala ray totoon mansiansian kakaarom labat no maung ya amiy nagagawa, balet sumpaen da ka no gunigon lay onsabi.

5Say tuan kaaro tulongan to ka sumpad saray kalaban mo tan iyagel to ka no walay laban.

6Ag mo lilingwanan itan a kaiba no bakal; pinabang mod saray agunggonad impanalo.

Alwar ed Pangawat na Simbawa

7Nayarin mangiter na simbawa so balang too, balet wala ray manisimbawa a pankaabigan da labat so nununoten da.

8Manalwar ka no walay manimbawad sika. Amtaen mo nin onona no akin et labay to kan simbawaan, ta andi-duaruwan manonan nununoten toy sikaton dili. Akin et sikatoy walad tapew, aliwan sika?

9Ibaga tod sikan maung so nagagawa, insan bantayan toy nagagawad sika.

10Ag ka onkekerew na simbawa ed toon anggapoy talek tod sika, tan ag ka mangiiter na simbawa ed toon mangiimon ed sika.

11Ag ka onkekerew na simbawa ed sakey a bii nipaakar ed kasamsam tod panangaro,

ed sakey a matakot nipaakar ed bakal,

ed sakey a nigosianti nipaakar ed bili na sasaliwen,

ed sakey a sumasaliw nipaakar ed panaglako,

ed sakey a toon maigot nipaakar ed pisasalamat,

ed sakey a toon maruksa nipaakar ed panangasi,

ed sakey a toon mangiras nipaakar ed kimey,

ed sakey a toon walay getar na pankimey to nipaakar ed panumpal na kimey,

ed sakey ya aripen nipaakar ed mairap a kimey.

Ag mo dedengelen so antokaman a simbawa ra.

12Ingen, saral ka ed sakey a toon rilihioso tan bibirbiren a mangoonur ed saray ganggan na Katawan, sakey a toon walay pililikna tod sika, tan maermen ed pakanengneng ton ag ka mampapalabo.

13Tan manmatalek kad dilin panagnunot mo; anggapoy lalon napanmatalkan a simbawa nen say dilin simbawam.

14No maminsan dakel ni so nibaga na dilin liknaan mo nen saray pitoran bantay a walad atagey a tori.

15Manonad amin, ipikasim ed Sankatageyan ya ipanengneng tod sika so nepeg mon gawaen.

Kakabatan tan Panagmatalek

16Walad beneg na amin a nagagawa so panagplano tan panagnunot.

17-18Apatiran bengatla so pibabalian na kanunotan: say maung tan say maoges, say bilay tan say patey. Onggagapo ran amin ed kanunotan, balet say dila so sigput a manoley da.

19Nayarin marunong a mambangat so sakey a too, balet nayarin ag ya onkanad sikato.

20Nayarin maung so pananalita to, balet nabigut ed kaonuran lapud kabosul na saray totoo.

21Nayarin onyay nagawa no ag to ikakanay kalakal to, no say Katawan et ag to initdan na karunongan.

22Nayarin ipasen na sakey a too so sikaton dili a makabat tan ipaamta tod sika ya anggapoy duaruwa to nipaakar ed saray amta to.

23Siopamay peteg a makabat et magmaliw a bumabangat na saray totoo to, tan ag da napanduaruwaan a katwaan so ibangat to.

24Satan a too idayew na amin a totoo tan salitaen da a mapalar.

25Nabilang iray agew na bilay na too, balet ag nabilang iray agew na bilay na Israel.

26Naala na makabat a too so panagmatalek na saray totoo to, tan nanunotan da ed anggad angga.

Pandangkad Panangan

27Anak, diad pambibilay mo, dangkaan moy panangan mo, tan ag mo kakanen so antokaman ya amtam a makapoy ed sika.

28Aliwan amin a kakanen et nayari ed balang too, tan nandoroma so labay a kanen na balang too.

29Ag mo ipapasen a nakaukolan mon kanen ya amin iray masasamit a kakanen, tan ag ka kapaakan ed dinanman a kakanen.

30No alabas so pangan mo, mansakit ka, tan no labasen mon naynay, onsakit lawas so eges mo.

31Amayamay lay totoon inatey lapud inkasiba. Paliisan mo ya, et mambilay ka na andokey.