Exodo 31 - Pangasinan Meaning-Based Bible(MBBPAN83)

Saray Totoon Mangipaalagey na Tuldan Ayamay Katawan

(Exo. 35:30–36:1)

1Say Katawan kuantod kinen Moises,

2“Pinilik si Bezalel a lakin anak nen Uri tan apo nen Hur tan kabyangan na boleg na Juda;

3sikatoy pinanok na pakayarik. Initdan ko na pakatalus, dunong, tan pakayari a manggawa na antokaman a kimey ya inartian;

4nayarian toy mamplano na balibalin kimey tan nagawa to ra ed balituk, pilak, tan gansa;

5marunong a mantabas na saray alahas ya ilira, tan mankorti na tabla tan arum ni ran inartian a kimey.

6Pinilik met ya ontulong ed kinen Bezalel si Oholiab a lakin anak nen Ahisamac tan kabyangan na boleg nen Dan. Initdan ko met na baleg a dunong iray amin nin arum a kumikimey, pian nagawaan day amin a labay kon pagawa:

7say Tuldan Ayamay Katawan, say Kaban na Sipanan a pati say sakub tod tapew, amin a kagawaan ed dalem na Tulda,

8say lamisaan tan saray kagawaan to, say puron balituk a panangipatoonan na lamparaan tan amin a kagawaan to, say altar a panagpoolan na insinso,

9say altar a panangisaklangan na bagat a popoolan tan amin a kagawaan to, say talyasi tan say ansagan to,

10saray balibaliy inkagawan kawes na pari a para si Aaron tan saray anak ton lalaki ya ikana ra no manlingkur iran papari,

11say panaglana a larak, tan say ambalingit ya insinson para Masanton Pasen. Diad panggawa ed sarayan bengatla, nepeg a gawaen da onung ed amin a ganggan kod sika.”

Say Agew na Panagpainawa

12Say Katawan kuantod saray Israelita

13diad panamegley nen Moises, “Ngilinan yoy Agew a Panagpainawak, lapud sikatoy sakey a tanda ed siak tan sikayo, diad amin a panaon ya onsabi; sikato met so mangipanunot ed sikayo a siak a Katawan et ginawa ta kayon dilin totook.

14Nepeg yon ngilinan so agew na panagpainawa, lapud masanto yan agew. Siopamay toon ag manngilin ed sayan agew, no ag ingen mankimey, nepeg a pateyen.

15Anem agew a makapankimey kayo, balet say kumapiton agew et masanton agew a nisaklang ed siak. Siopamay toon manggaway kimey ed sayan agew, nepeg a pateyen.

16Saray Israelita nepeg a ngilinan da yan agew, ta sakey yan tanda na sipanan.

17Sakey yan mansiansian tanda na sipanan ed saray Israelita tan siak, lapud siak a Katawan et pinalsak so tawen tan say dalin ed loob na anemiran agew, tan diad kumapiton agew tinmonda ak a nankimey tan nampainawa ak.”

18Nen asumpal na Dios so akisalita ed kinen Moises diad tagey na Palandey na Sinai, inter tod kinen Moises so duaran tapyak a bato ya angitatakan na dilin Dios na saray ganggan.