Levitico 14 - Pangasinan Meaning-Based Bible(MBBPAN83)

Say Panlinis ed saray Totoon Inmabig ed Sakit a Kating

1Say Katawan inter tod kinen Moises

2iray onggendan a totontonen a nipaakar ed sirimonya a panlinis ed sakey a toon inmabig ed sakit a kating. Diad agew a say sakey a too et nasintinsiaan a malinis onung ed ganggan, sikatoy niakar ed pari.

3Insan say pari iyakar tod paway na kampo tan diman to nengnengen. No inmabig la may sakit

4say pari iganggan to a niakar ed sikato so duaran manok a malinis onung ed ganggan, sakey a poter na kiew a sidro, sakey ya ambalangan koldon, tan sakey a sangay isopo.

5Insan say pari iganggan to a samay sakey a manok et pateyen ya akasalur so sakey a bangan nankarga na danum ya inalad sobol.

6Alaen to may sananey a manok tan isawsaw tod dala na samay pinatey a manok; isawsaw to met imay kiew a sidro, samay ambalangan koldon, tan samay sangay isopo.

7Iwalsik ton mamimpito imay dala ed samay toon linisan ed sakit ton kating, insan sintinsiaan ton malinis onung ed ganggan. Paibolus tod kaalogan imay mabilay a manok.

8Samay too ipesak toy kawes to, poklisan toy olo to, tan manames; diad onya magmaliw a malinis onung ed ganggan. Nayarian toy onloob ed kampo balet ta manayam ni na pitoy agew ed paway na tulda to.

9Diad kumapiton agew kiskisan toy buek to, balbas to, kirep to, tan amin a bagoy laman to; ipesak toy kawes to tan manames. Diad onya magmaliw lan malinis onung ed ganggan.

10Diad kumawalon agew sikatoy mangyakar na laman a duaran kordiron kalakyan tan sakey a kordiron kabatyan a sakey taon ya anggapoy deral na laman da, duaran kilon arina ya inkames ed larak na oliba tan talora tan kapalduan litro a larak na oliba.

11Say pari iyakar to may too tan sarayan bagat diad lolooban na Tuldan Ayamay Katawan.

12Insan say pari alaen to may sakey a kordiron kalakyan tan, katekep na samay taloran tan kapalduan litron larak, isaklang to a bagat a pambayar. Isaklang to a nidoma-doman rigalod Katawan a para pari.

13Pateyen to may kordiro diad masanton pasen a panamateyan ed saray ayep ya ibagat para kasalanan tan saray ayep ya ibagat a popoolan. Nepeg to yan gawaen lapud say bagat a pambayar et kayaryan na pari tan masanton tuloy a singa bagat a para kasalanan.

14Say pari mangala na daiset a dala to may kordiro, insan to iponaris ed gilig na kawanan a layag to may toon sintinsiaan a malinis onung ed ganggan, diad tangan na kawanan a lima to, tan diad tangan na kawanan a sali to.

15Say pari mangala na daiset a larak na oliba tan ipaterter tod daklap na kawigin lima to,

16idelnet toy tamoro na kawanan a lima to tan iwalsik tod man a mamimpito diad arapan na Katawan.

17Mangala na daiset a larak a walad daklap to tan daiset a dala to may kordiro, insan iporanis to rad kawanan a gilig na layag to may toon sintinsiaan a malinis onung ed ganggan, diad tangan na kawanan a lima to, tan diad tangan na kawanan a sali to.

18Ilana tod olo to may too imay akeraan a larak ed daklap to. Diad onya gawaen toy sirimonya na panlinis.

19Insan say pari isaklang toy bagat a para kasalanan tan gawaen toy sirimonya na panlinis. Kayari to ya, pateyen toy ayep a para bagat a popoolan

20tan, katekep na bagat a trigo isaklang tod tapew na altar. Diad onya say pari gawaen toy sirimonya na panlinis, tan samay too et magmaliw a malinis onung ed ganggan.

21No mairap so bilay na sakey a too tan ag to nayarian ira yan ibagat, mangyakar na sakey labat a kordiron kalakyan ya isaklang ton bagat a pambayar ya onkanan panlinis ed sikato onung ed ganggan, sakey a nidoma-doman bagat ed Katawan a para pari. Sikatoy mangyakar na sakey labat a kilon arina ya inkames ed larak na oliba a para bagat a trigo tan talora tan kapalduan litron larak na oliba.

22Mangyakar met na duaran palekpek odino duaran malangwer a malapati; say sakey ibagat a para kasalanan tan say sakey para bagat a popoolan.

23Diad kumawalon agew na panlinis ed sikato iyakar to ra ya ed pari diad lolooban na Tulda.

24Say pari alaen to may kordiro tan samay larak na oliba tan isaklang ton nidoma-doman rigalo ed Katawan a para pari.

25Pateyen to may kordiro tan mangala na daiset a dala to, insan to iponaris ed gilig na kawanan a layag to may too, diad tangan na kawanan a lima to, tan diad tangan na kawanan a sali to.

26Samay pari mangipaterter na larak ed daklap na kawigin lima to

27tan diad panamegley na tamoro na kawanan a lima to iwalsik tod man a mamimpito diad arapan na Katawan.

28Mangipoyuk na daiset a larak ed saramay pasen ya angiponarisan to na dala: diad gilig na kawanan a layag to may too, diad tangan na kawanan a lima to, tan diad tangan na kawanan a sali to.

29Say akeraan ed samay larak a walad daklap to et ipoyuk tod olo na samay too tan diad onya gawaen to so sirimonya na panlinis.

30Insan mangisaklang na sakey ed saramay palekpek odino malangwer a malapati,

31a sakey a bagat a para kasalanan tan say sananey para bagat a popoolan a katekep toy bagat a trigo. Diad onya say pari gawaen toy sirimonya na panlinis.

32Sikato ya so ganggan a sumpalen na toon walay sakit ton kating balet ag to nayarian ya isaklang so ingganan bagat a para panlinis to.

Say Boot ed Abung

33Say Katawan inter tod kinen Moises tan Aaron

34iray onggendan a totontonen a nipaakar ed saray abung a nabobootan. (Sarayan totontonen et tombuken ira no saray totood Israel et akaloob la ra ed dalin na Canaan ya iter na Katawan ed sikara.)

35Siopamay makalmo na boot ed abung to nepeg ya ibaga tod pari.

36Say pari iganggan to ya ekalen iray amin a karga to may abung kasakbayan a laen ton nengnengen so boot; ta no ag da ra ekalen nasintinsiaan ira a marotak onung ed ganggan. Insan onlad samay abung so pari

37ta nengnengen toy boot. No wala ray birdian odino balangaan a batek a singa kinmotlaung la rad dingding,

38taynan to may abung tan italak ton pitoy agew.

39Diad kumapiton agew ompawil ta nengnengen to lamet imay abung. No kinmayat imay boot,

40iganggan ton saray bato ed kawalaan na samay boot et ekalen ira tan ibantak irad sakey a marotak a pasen onung ed ganggan diad paway na siudad.

41Kayari to ya, paekal to ray amin a palitadad dalem na abung tan paibantak to rad sakey a marotak a pasen diad paway na siudad.

42Insan saray arum a bato la so isalat ed saramay baton nakal, tan palitadaan la na balo so dalem na abung.

43No nabootan lamet imay abung kayarin nakal la ra may bato tan say palitada tan apalitadaan lay balo,

44say pari laen ton nengnengen. No kinmayat imay boot, samay abung et marotak.

45Nepeg a bagbagen la may abung; amin a bato to, saray kiew to, tan amin a palitada to et nepeg ya ibantak irad sakey a marotak a pasen diad paway na siudad.

46Siopamay toon onloob ed abung legan ya akatalak et magmaliw a marotak ya anggad labi.

47Siopamay toon ondokul odino mangan ed loob to may abung et nepeg ya ipesak toy kawes to.

48No diad pannengneng na pari et ag la linmetaw so boot kayarin apalitadaan na balo imay abung, sintinsiaan na pari a malinis la onung ed ganggan imay abung lapud naandipat lan sigput so boot.

49Diad panlinis ed samay abung onung ed ganggan, say pari mangala na duaran manok, pigaran poter na kiew a sidro, sakey ya ambalangan koldon, tan sakey a sangay isopo.

50Pateyen to may sakey a manok ya akasalur so sakey a bangan nankargay danum ya inalad sobol.

51Insan to alaen ira may kiew a sidro, samay sangay isopo, samay ambalangan koldon, tan samay mabilay a manok tan isawsaw to ra ed dala na samay pinatey ton manok tan diad samay danum. Insan walsikan ton mamimpito imay abung.

52Diad onya linisan to may abung diad panamegley na dala na samay manok, samay danum ya inalad sobul, samay mabilay a manok, saray poter na kiew a sidro, samay sangay isopo, tan samay ambalangan koldon.

53Insan to ibolus ed paway na siudad diad kaalogan imay manok a mabilay. Diad onya gawaen toy sirimonya na panlinis na abung, a et magmaliw a malinis onung ed ganggan.

54Sikara ya so ganggan a nipaakar ed saray sakit na baog;

55-56saray giri, saray pelsa, odino saray babag, tan nipaakar met ed boot na kawes odino boot na abung.

57Sarayan ganggan ipaamta ra no marotak odino malinis so antokaman.