2 Saray Awaran 29 - Pangasinan Meaning-Based Bible(MBBPAN83)

Si Ari Ezekias na Juda(2 Ar. 18:1-3)

1Duamplo tan lima nen Ezekias nen nagmaliw ya ari na Juda, tan nanoley ed Jerusalem na duamplo tan siam taon. Si Abia ya anak nen Zacarias so ina to.

2Ginagawa toy makapaliket ed Katawan, ta inalig to ray ginagawa nen laki ton Ari David.

Say Inkalinisan na Timplo Unong ed Ganggan

3Diad ononan bulan na taon ya inggapo nen Ezekias a nanari, nilokasan to ray puirta na Timplo tan impaapiger to ra.

4Tinipon tod bokig na patio na Timplo iray papari tan saray Levita,

5tan diman to ra akitongtongan. Inkuanto, “Sikayo ran Levita, linisan yo onung ed ganggan so sikayon dili tan say Timplo na Katawan a Dios na saray lalaki yo. Ekal yo ray amin a makarotak ed Timplo.

6Aliwan matoor ed Katawan a Dios tayo iray lalaki tayo, ta ginagawa ray aliwan makapaliket ed sikato. Inkaindan da tan imbeneg day pasen a panaayaman to.

7Insasara da ray puirta na Timplo, ineerep da ray lamparaan, tan ag la ra nampopool na insinso o nansasaklang na saray bagat ed Timplo na Dios na Israel.

8Lapud saya akapasnuk so Katawan ed Juda tan Jerusalem, et nikelawan tan ataktakot so balang sakey lapud ginawa tod sikara. Malinlinew so pakaamta yod sayan inkagawa.

9Inaatey ed bakal iray lalaki tayo, adakep iray kaasawaan tan saray anak tayo tan niakar irad arum a bansa.

10“Ginetmak la natan a misipanan itayo ed Katawan, say Dios na Israel, pian ontonda lay pasnuk tod sikatayo.

11Anak ko, ag kayo la manaabala. Sikayo ray pinili na Katawan a mampool na insinso ed sikato tan sikayo ray mangipangulo na saray totoo ed pangigalang ed sikato.”

12-14Wadman iray onggendan a Levita:

Diad boleg nen Coat,

di Mahat a lakin anak nen Amasai

tan Joel a lakin anak nen Azarias

Diad boleg nen Merari,

di Cis a lakin anak nen Abdi

tan Azarias a lakin anak nen Jehaleleel

Diad boleg nen Gerson,

di Joah a lakin anak nen Zima

tan Eden a lakin anak nen Joah

Diad boleg nen Elizafan,

di Simri tan Jeiel

Diad boleg nen Asaf,

di Zacarias tan Matanias

Diad boleg nen Heman,

di Jehiel tan Simei

Diad boleg nen Jedutun,

di Semaya tan Uziel

15Tinipon da ray kapara ran Levita, tan nilinisan day sikaran dili onung ed ganggan. Insan onung na ingganggan na ari ginapwan dan nilinisan so Timplo onung ed Ganggan na Katawan.

16Linmoob ed Timplo iray papari ta nilinisan da, insan da impaway ed patio na Timplo iray amin a bengatlan marotak onung ed ganggan. Manlapud man saray amin a bengatlan marotak et inyakar na saray Levita diad Patar na Cedron, diad paway na siudad.

17Diad ononan agew na ononan bulan inggapo ray kimey tan diad kumawalon agew asumpal day impanlinis da, pati say kuarton lolooban ed Timplo. Insan ira lamet nankimey ed ontombuk a waloy agew ya anggad kumalabinanem ya agew na saman a bulan, diad impangiparaan dad Timplo a pangigalangan.

Say Impangisaklang Lamet na Timplo

18Linma ra may Levita ed kinen Ari Ezekias tan impaamta ray onggendan: “Asumpal mi la so impanlinis ed intiron Timplo onung ed ganggan, pati say altar a pangisaklangan na bagat a popoolan, say lamisaan a para masanton tinapay, tan amin a kagawaan da.

19Impawil mi met iray amin a kagawaan ya inekal nen Ari Acaz legan na saray taon ya ag to tinoor so Dios. Pinasimbalo mi ran insaklang tan wadman ira natan ed arap na altar na Katawan.”

20Ag nanabalay Ari Ezekias ed impanipon tod saray manonan totoo ed siudad, insan ira nambabansag a linmad Timplo.

21Angala ray pitoran bakan kalakyan, pitoran karniro, pitoran kordiro, tan pitoran kanding ta isaklang da ra a pangekal na saray kasalanan na pamilyay ari tan saray totood Juda, tan panlinis na Timplo onung ed ganggan. Imbaga na ari ed saray papari, a kabyangan ira na boleg nen Aaron, ya isaklang dan bagat ed altar ira may ayayep.

22Pinatey ya onona na saramay papari ira may bakan kalakyan, insan saramay karniro, insan saramay kordiro, tan inwawalsik dad altar so dala na balang ayep ya imbagat.

23Diad kaonuran inyakar da ra may kanding ed ari tan saray arum a mangigagalang, insan impaitapew dad saramay kanding so kalimaan da.

24Kayari to ya pinatey na saray papari ira may kanding, insan da impaturo ed altar so dala ra a sakey a bagat a pangekal na kasalanan na amin a totoo. Ginawa da ya, ta ingganggan na ari ya isaklangan ya amin iray Israelita na saray bagat a popoolan tan saray bagat a para kasalanan.

25Tinombuk na ari iray bilin ya inter na Katawan ed kinen Ari David diad panamegley nen Gad a propita na ari tan diad panamegley nen propita Natan; angipasen na saray Levita ed Timplo a wala ray arpa tan piangpiang da,

26a singa saray kagawaan na musika ya inkakana ra nen Ari David. Nanalagey met irad may papari a wala ray trumpita ra.

27Ingganggan nen Ezekias ya isaklang la so bagat a popoolan; et nen nigapo lay pambabagat, nankanta ray totoo a pangidayew dad Katawan, tan pinaknul na saray tumutogtog iray trumpita ra tan saray arum a kagawaan na musika.

28Akibiang so balang sakey ed impangigalang ed Katawan tan nituloy so pankakanta tan pantotogtog ya anggad apoolan ya amin ira may imbagat.

29Insan say ari tan amin da ray totoo nantalimukor ira tan inggalang day Dios.

30Si Ari Ezekias tan saray pangulo na bansa et imbaga rad saramay Levita a kantaen dad Katawan iray kanta a pangidayew ya insulat ira nen David tan si Asaf a propita. Kanyan kinanta ran malikeliket legan dan mantatalimukor tan mangigagalang ed Dios.

31Inkuanen Ezekias ed saray totoo, “Natan ta malinis kayo la onung ed ganggan, mangawit kayo na saray bagat a para pisasalamat ed abung na Katawan.” Tinmoluk ira may totoo, tan angaawit a mabolbolus so arum ed sikara na saray ayayep a para bagat a popoolan.

32Angawit ira na pitomplon bakan kalakyan, sanlasus a karniro tan duan lasus a kordiro ya isaklang a bagat a popoolan para Katawan;

33angaawit met ira na anem a lasus a bakan kalakyan tan talon libon karniro ya ibagat tan kanen na saray totoo.

34Bangta daiset iray papari tan ag da nayarian a pateyen ya amin ira may ayayep, tinulongan ira na saray Levita ya anggad impakapansumpal na kimey tan impakapanlinis da ray arum a papari onung ed ganggan. (Mapeleng ni ray Levita a manlinis na sikaran dili onung ed ganggan nen saray papari.)

35Likud ed impangisaklang na saray bagat a popoolan, saramay papari et makaoley ira ed impanpool ed taba da ra may nisaklang a bagat a sinira na saray totoo, tan makaoley met ira ed impangipatoro na alak a nisaklang a kaiba da ray bagat a popoolan.

Diad saya, ginmapo sirin so panangigalang ed Timplo.

36Makaliliket si Ari Ezekias tan saray totoo, lapud tinulongan ira na Dios ed maganon impanumpal dad saray amin.