1Linmay Roboam ed Sikem a dimay nantitiponan na saray totood Israel a wala rad baybay, ta gawaen dan ari.
2Nadngelan ya nen Jeroboam a lakin anak nen Nebat, a wadman nid Egipto a dimay nila to nen imbatikan toy Ari Solomon, kanyan pinmawil ed Israel.
3Impaawit na saray tribu ed baybay, insan ira linman amin ed kinen Roboam tan kuandad sikato,
4“Ambelat so impasakbat nen amam ed sikami. No palemewen moy sasakbaten mi tan painomayen moy panagbilay mi, panlingkuran mi ka.”
5“Pawil ki dia kayariy taloy agew, ta ibagak ed sikayoy ebat ko,” inkuantod sikara. Kanyan linma la ra.
6Insan impanon ya nen Roboam ed saray mamatakken a lalakin sumisimbawa nen ama ton Solomon. “Antoy isimbawa yon iyebat kod saraman a totoo?” tepet tod sikara.
7Inmebat ira, “No mapangasi kad saraman a totoo tan panliketen mo ra lapud marakep ya iyebat mo, matoor ira lawas a manlingkur ed sika.”
8Balet ag dinengel nen Roboam so simbawa ra. Ingen, linmad saray lalakin binmaleg a kaiba to a sikaray sumisimbawa to la natan.
9Tinepet tod sikara, “Antoy isimbawa yod siak? Antoy ibagak ed saraman a totoon onkekerew a palemewen koy sasakbaten da?”
10Inmebat ira, “Onyay ikuan mod saraman a totoo: ‘Mabiskeg niy kiking ko nen say ulpo nen amak.’
11Ambelat so impapasakbat ed sikayo nen amak; ambelat niy ipasakbat kod sikayo. Nilatiko kayo nen amak, pekpeken ta kayoy balatyang!’”
12Kayariy taloran agew, pinmawil ed kinen Ari Roboam si Jeroboam tan amin a totoo onung na imbaga tod sikara.
13Maruksa ya inmebat ed sikara tan ag to tinombuk so simbawa da ra may mamatakken a sumisimbawa.
14Sinalita to may impaikuan na saray mamalangwer a sumisimbawa: “Ambelat so impasakbat ed sikayo nen amak; ambelat niy ipasakbat kod sikayo. Nilatiko to kayo nen amak; pekpeken ta kayoy balatyang!”
15Say Katawan a Dios so akanlinawa a si Roboam et ipolisay toy kerew na saray totoo, pian napatwa so imbaga tod kinen Jeroboam diad panamegley nen propita Ahias a taga Silo. Sikato yay makasengeg ya ag dinengel na ari iray totoo.
16Nen abirbir na saray totoo ya ag ira dengelen na ari, inmeyag ira, “Anggapo lay pibibiang tayod kinen David tan say pamilya to! Antoy ginawa ran para sikatayo? Totood Israel, onsempet ti la! Akaoley lad sikaton dili si Roboam!”
Kanyan sinmempet la ray amin a totood Israel.
17Pinaulyan da lay Roboam a nanoley ed saray totoon manaayam labat ed sakop na Juda.
18Imbaki nen Ari Roboam si Adoniram, say makaoley ed saray totoon pinasoot a mankimey, ya onlad saray Israelita, balet tinutupak da ya anggad inatey. Lapud saya, nangganat si Roboam a linmogan ed karwahi to, insan batik ed Jerusalem.
19Nanlapud saman, sumpad saray manaarin kabyangay boleg nen David iray totood baybay a nanarian na Israel.
Who We AreWhat We EelieveWhat We Do
2025 by iamachristian.org,Inc All rights reserved.
