Deuteronomio 9 - Pangasinan Meaning-Based Bible(MBBPAN83)

Say Pananumlang na saray Totoo

1“Dengel kayo, sikayon totood Israel! Natad sayan agew ngalngali yo la baliwen so Ilog na Jordan tan panayaman so dalin a kayaryan na saray bansan ankabaleg tan makapanyari nen say sikayo. Ankakabaleg iray siudad da ya anggad tawen iray padir da.

2Atatagey iran totoo tan mabisbiskeg ira; alan ira, tan nadngelan yo ya anggapoy makalaban ed sikara.

3Balet sikayon dili nanengneng yo natan a say Katawan a Dios et manayam ed onaan yo a singa manliub ya apoy. Taloen to ra legan a lolooban yo so dalin da, pian napataynan yo ra tan masiglat yo ran napatey onung na insipan to.

4“No apataynan la ra na Katawan a Dios yo para sikayo, ag yo ibabagad sikayon dili a pinaloob to kayo ed saman a dalin lapud sikatoy kanepegan yo. Andi, say Katawan et pataynanen ton para sikayo ira yan totoo lapud maoges ira.

5Say Katawan et pakakayaryan tod sikayo so dalin da, aliwan lapud maung kayon totoo tan gagawaen yo so katunongan. Pataynanen to ra lapud maoges ira tan lapud labay ton tooren imay insipan tod saray lalaki yo ya Abraham, Isaac, tan Jacob.

6Andi-duaruwa sirin a say Katawan et iter tod sikayo man a mataban dalin aliwan lapud kanepegan yo. Andi, ta totoo kayon mananumlang.

7“Ag yon balut lilingwanan imay ginawa yon makasengeg na impanpasnuk na Katawan a Dios yo nen wala kayod kalawakan. Nanlapud samay agew na impanaynan yod Egipto ya anggad sayan agew na impakasabi yo dia, sinusumlang yoy Katawan.

8Anggan dimad Palandey na Sinai impanpasnuk yoy Katawan; lapud mapalalon pasnuk to akaparaan lan mamatey ed sikayo.

9Kinmalab ak ed tagey na palandey ta alaen ko ra may tapyak a baton akaitatakan na impisipanan ed sikayo na Katawan. Nanayam ak diman ya apataploy agew tan labi tan ag ak balut angan o inminom.

10Insan say Katawan inter tod siak iray may duaran tapyak a baton angitatakan na dilin lima to na saramay imbaga tod sikayo manlapud apoy nen nantitipon kayod man ed palandey.

11On, kayariy apataploy agew tan labi say Katawan inter tod siak ira may duaran tapyak a baton angitatakan tod samay impisipanan to.

12“Insan say Katawan kuantod siak, ‘Akseb kan tampol, ta saray totoom ya impaway mo manlapud Egipto et nagmaliw iran maoges. Sinumlang da la may ingganggan kod sikara, tan nanggawa ra na para sikara na talintaoy dios.’

13“Say Katawan kuanto nid siak, ‘Amtak so awet na olo da ra yan totoo.

14Ag mo ak babaaten ed gawaen ko. Ginetmak la ran pateyen pian anggapo lay makanunot ed sikara. Insan ta ka pagmaliwen a sengeg na sakey a bansan lalon baleg tan makapanyari nen say sikara.’

15“Kanyan inmakseb ak a nanlapud palandey a sankaawit ko ra may duaran tapyak a baton akaitatakan na sipanan. Diad saman manliub ya apoy so manlalapud palandey.

16Anengneng ko a sinumlang yo la may ingganggan ed sikayo na Katawan a Dios yo, tan nankasalanan kayod sikato diad impanggawa yo na para sikayon dili na sakey a mital a bakan kalakyan a talintaoy dios.

17Kanyan diad arapan yo imbasig ko ra may duaran tapyak a bato tan apisag-pisag ira.

18Insan apataploy agew tan labin tinmikleb ak lamet ed arap na Katawan tan ag ak balut angan o inminom. Ginawak iman lapud nankasalanan kayod Katawan tan impanpasnuk yo.

19Antakot ak ed samay mapalalon pasnuk na Katawan, ta lapud mapalalon pasnuk to, akaparaan lan mamatey ed sikayo; balet dinengel to ak ni lamet.

20Diad saman, mapalalo met so pasnuk na Katawan ed kinen Aaron et pateyen to la lawari, kanyan impikasik met si Aaron.

21Inalak imay makapakasalanan a talintaon ginawa yo—samay mital a bakan kalakyan—tan imbontuk kod apoy. Insan ko tinemektemek ya anggad dinmabuk, tan imbantak ko may dabuk ed kolus ya onaagos ed leksab na palandey.

22“Impanpasnuk yo met so Katawan a Dios yo nen wala kayod Tabera, Masa, tan Kibrot-hattava.

23Et nen imbaki to kayon manlapud Cades-barnea kayari to kayon binilin a mangayaryan ed dalin ya iter tod sikayo, sinmumlang kayod sikato; ag kayo nanmatalek odino inmonur ed sikato.

24Nanlapu lad samay impikabat kod sikayo, susumlangen yo lay Katawan.

25“Kanyan tinmikleb ak ed arap na Katawan ed saraman ya apataploy agew tan labi, lapud imbaga ton pateyen to kayo la.

26Et nampikasi ak, ‘Katawan a Dios, ag mo pa papateyen iray dilin totoom, saray totoon inyagel tan impaway mod Egipto diad panamegley na baleg a biskeg tan pakayarim.

27Nudnunot mo pa ray aripen mon di Abraham, Isaac, tan Jacob, tan palabas mo lay inkaawet na olo da ra yan totoo, say inkaoges da, tan say kasalanan da.

28Ta no andi, saray Egipsio ibaga ra ya ag mo ra ayarian ya iyakar ed dalin ya insipan mod sikara. Ibaga ra ya inyakar mo rad kalawakan ta pateyen mo ra, lapud kabosul mo ra.

29Say katwaan to, sikaray totoon pinilim a kayaryan tan impaway mo rad Egipto diad panamegley na baleg a biskeg tan pakayarim.’