Saray Bilang 10 - Pangasinan Meaning-Based Bible(MBBPAN83)

Saray Pilak a Trumpita

1Say Katawan kuantod kinen Moises,

2“Manggawa kay duaran pinitpit a pilak a trumpita ya ikanam ran panawag ed saray totoo ed pantitipon da tan diad pangyalis day kampo.

3No mambansag a napaknul na andokey iray trumpita, mantitipon ed kawalaan mo iray amin a totoo diad lolooban na Tuldan Ayaman ko.

4Balet no sakey labat so napaknul, saray pangulo labat na saray boleg so mantitipon ed kawalaan mo.

5No napaknul ira na antikey, onalsa la ray tribun walad bandad bokig.

6No kumadwan napaknul ira na antikey, onalsa la ray tribun walad bandad abalaten. Kanyan antikey so pamaknul ed saray trumpita no iyalis so kampo,

7balet andokey so pamaknul no tawagen a mantitipon ya amin iray totoo.

8Saray paparin lalakin anak nen Aaron so mamaknul na saray trumpita.

“Say onggendan a totontonen et nepeg ya onuren anggan kapigan.

9No mibakal kayod loob na dalin yo, ta iyagel yoy sikayon dili ed saray kalaban a dinmogpad sikayo, paknul yod sarayan trumpita so tanul a para bakal. Siak a Katawan a Dios yo et tulongan ta kayo tan iyagel ta kayod saray kalaban yo.

10Ontan met diad saray agew a panliliket yo—diad saray Pista na Balon Bulan tan arum ni ran niganan pista—paknul yo ra yan trumpita no isaklang yo la ray bagat yon popoolan tan saray bagat a para kareenan. Diad satan tulongan ta kayo. Siak so Katawan a Dios yo.”

Saray Israelita Inyalis day Kampo

11Diad kumaduamplon agew na kumadwan bulan na kumadwan taon kayari na insiput ed Egipto na saray Israelita, inmatagey imay lorem ya anakbung ed Tuldan Ayamay Katawan,

12kanyan ginapwan day onkurang manlapud Kalawakan na Sinai. Samay lorem tinmonda ed kalawakan na Paran.

13Onung ed ganggan na Katawan diad panamegley nen Moises, saray Israelita ginapwan day mankurang,

14tan kapag onalis ira ag da oomaney oksuy da. Agrupo-grupo ran mankurang tan onaan iray walad silong na bandira na olupan ya iwawanwan na tribu nen Juda. Si Naason a lakin anak nen Aminadab so pangulo ra.

15Si Natanael a lakin anak nen Zuar so pangulo na tribu nen Isacar,

16tan si Eliab a lakin anak nen Helon so pangulo na tribu nen Zabulon.

17No niabeba la may Tulda, saray kabyangay boleg di Gerson tan Merari a sikaray managawit, gapwan day mankurang.

18Say ontombuk a mankurang et saray walad silong na bandira na olupan ya iwawanwan na tribu nen Ruben. Agrupo-grupo ra tan si Elizur a lakin anak nen Sedeur so pangulo ra.

19Si Selumiel a lakin anak nen Zurisadai so pangulo na tribu nen Simeon,

20tan si Eliasaf a lakin anak nen Deuel so pangulo na tribu nen Gad.

21Insan saray Levitan kabyangay boleg nen Coat so ontombuk a mankurang a sankaawit da ray masanton kagawaan. Kasabi rad pasen a pankampoan da, nipaalagey la may Tulda.

22Say ontombuk a mankurang et saray walad silong na bandira na olupan ya iwawanwan na tribu nen Efraim. Agrupo-grupo ra tan si Elisama a lakin anak nen Amihud so pangulo ra.

23Si Gamaliel a lakin anak nen Pedazur so pangulo na tribu nen Manases,

24tan si Abidan a lakin anak nen Gideoni so pangulo na tribu nen Benjamin.

25Saray onur a mankurang a sikaray guardiad beneg na amin da ray olupan et saray walad silong na bandira na olupan ya iwanwan na tribu nen Dan. Agrupo-grupo ra tan si Ahiezer a lakin anak nen Amisadai so pangulo ra.

26Si Pagiel a lakin anak nen Ocran so pangulo na tribu nen Aser

27tan si Ahira a lakin anak nen Enan so pangulo na tribu nen Neftali.

28Sikato ya sirin so oksuy na kurang da ray Israelita kapag iyalis day kampo; agrupo-grupo ran mankurang.

29Si Moises kuantod kinen bayaw ton si Hobab a lakin anak nen Jetro a taga Madian, “Ngalngali kami la ompikal ya onlad dalin ya imbagay Katawan ya iter tod sikami. Insipan ton paaligwasen so Israel, kanyan mila kad sikami, et pinabangen mi kad aligwas mi.”

30Inmebat si Hobab, “Ag ak la mila; ompawil ak lad dalin kon nianakan.”

31Inkuanen Moises, “Ag mo kami kari tataynan. Amtam no iner so pakapankampuan mi ed kalawakan, tan nayarian mo kamin iwanwan.

32No mila kad sikami, pinabangen mi kad amin a bindision ya iter ed sikami na Katawan.”

Nampikal iray Totoo

33Nen tinaynan na saray totoo so Sinai a mansanton palandey, nanakar iran taloy agew. Wala lawas ed onaan da imay Kaban na Sipanan na Katawan a mananap na pasen a pankampuan da.

34Kapag onalis iran manlapud sakey a kampo, tarungan ira na lorem na Katawan no agew.

35Kapag ompikal imay Kaban na Sipanan, ikuanen Moises, “Alagey ka pa, Katawan; itaytayak mo pa ray kalaban mo tan pabatik mo ray mamobosul ed sika.”

36Kapag ontonda, ikuanen Moises, “Katawan, pawil ka pad saray libo-libon pamilya na Israel.”