Sirac 28 - Pangasinan Meaning-Based Bible(MBBPAN83)

1Limanoen na Katawan iray kasalanan mo, et no ombawi ka ed siopaman, ombawi met so Katawan ed sika.

2Balet no pirdonaen mo so siopaman a nankasalanan ed sika, napirdona ray kasalanan mo no mampikasi ka.

3Ag mo nailaloan a pirdonaen ka na Katawan no walay eememan mon bosul a sumpad sakey a too.

4Makasalanan ka met, et no ag mo pirdonaen iray arum a totoo, anggapoy kanepegan mon mampikasi a pirdonaen ka na Katawan.

5No ag mo naekal so panagpasnuk mo, anggapoy ilalom a napirdona—sakey ka met labat a too.

6Nudnunot mo ya! Walay agew na ipatey mo, tan naboluk so laman mo. Kanyan tondaan moy bosul tan mambilay kan maonur ed saray ganggan na Katawan,

7saray ganggan ed siopaman na Sankatageyan. Kanyan palabas mo la ray kasalanan na kaakbay mo; ag mo la pamapasnukan.

Saray Sangsangan

8No arawian mo ray sangsangan, ag ka mankasalanan na dakel, ta say petang na olo so manangigapo na saray sangsangan.

9Kasalanan so pamuyak na pankakaaro diad panamegley na pamalesa na pambosulan da ray totoon marakep so panoolup da.

10No dakel so kiew, lalon ampetang so apoy. No lalon anawet so olo, lalon ampetang so sangsangan. No lalon mabiskeg odino mayaman so sakey a too, lalon mapetang so olo to.

11Say sangsangan a biglan onliub et nayarin mansumpal ed pateyan.

12Nayarin sibukan moy ngalab pian ondalang, odino nayarin lukdaan mo pian naerep. Anggan dinay gawaen mod saraya, songut moy ikanam.

Andi-kakanaan a Tongtong

13Kanepegan na saray managtalabutob tan saray matila so nisamba, lapud sikaray kadederalay amayamay a totoon mareey pambibilay da.

14Dakel iray aderal so bilay da tan apataynan irad kaabungan da, lapud saray totoon akibabalid panagbilay da. Satan a pibabali et nansumpal ed impakaderal na mabiskeg iran siudad tan saray abung na gagalangen a totoo.

15Saray totoon mibabali so makasengeg na impakaisian na saray matoor ya asawan bibii, tan atakew ya min iray bengatlan nansagputan da.

16Siopamay ondengel ed toon managpaoges na kapara ton too et ag balut mandeen so kanunotan to.

17Mampabiret so lewet, balet makapoter na pokel so dilan matila.

18Dakel niy totoon inaatey lapud maoges a tongtong nen saray totoon inaatey diad panamegley na ispada.

19-20Ipasen mon mapalar ka no nipaliis kad tongtong ya andi-kakanaan no ag apakoan na balatyang so tenger mo odino agolunggolungan na ambelat iray salim.

21Mamapaarap ed makapasinagem a patey so salitan mamaoges na arum a too; diad tuay tua, maung ni no inatey ka la.

22Balet ag natalo na salitan mamaoges iray totoon matonung; ag ira napoolan na apoy to.

23Saray natatalo to et saray inkaindan day Katawan; ag naerep so apoy na salitan mamaoges na pinmool lad pegley da. Singa lion ya ondegkem ed sikara so salitan mamaoges tan singa liopardo a bingbingkasen to ra.

24Ag mo ta aalaren so kayaryan mo? Ag mo ta totombukan so kuartam?

25Ontan met, alwaran moy panagsalitam. Simbang moy salitam tan iparaan moy pankandado na sangim.

26Nayarin walay toon manaalagar na pakailawan mo, et no aliwa kan maalwar naerel kad saray dilin salitam tan natumba kad arap to.