Exodo 39 - Pangasinan Meaning-Based Bible(MBBPAN83)

Say Impanggawad saray Kawes na Papari

1Asul, purpura, tan ambalangan tinebey so inkana ra ed impanggawa ra na saray balibalin kawes da ray papari ya isolung da no manlingkur ira ed Masanton Pasen; inggawaan day Aaron na saray kawes na pari. Ginagawa da ra ya onung na ingganggan na Katawan ed kinen Moises.

2Say inkana ra ed impanggawa na ipod et say balituk, asul, purpura tan ambalangan tinebey, tan pinon linen.

3Nampitpit ira na balituk tan impagmaliw dan maimpis, ginugulay da ran singa tinebey, insan da ra insaletsalet ed pinon linen, tan diad asul, purpura, tan ambalangan tinebey.

4Nanggawa ra na duaran balabal na takeb, tan impeket da rad saray duaran samput na ipod.

5Say balibaliy inkalagan balkes a ginawad balituk, asul, purpura, tan ambalangan tinebey tan pinon linen et nipeket ed samay ipod kanyan nansaip ira, onung na ingganggan na Katawan ed kinen Moises.

6Imparaan da ray baton onisi tan impeket da ra ed saray panangipatoonan; balibaliy imkatatakan da na kangaranan na saray labinduan lalakin anak nen Jacob.

7Impeket da ra ed saray balabal na takeb na ipod, ta sikaray pakanudnunotan ed labinduan boleg na Israel onung na ingganggan na Katawan ed kinen Moises.

Say Impanggawad Apis na Pagew(Exo. 28:15-30)

8Nanggawa ra na apis na pagew a say inkana ra et kapara na saramay inkanad ipod tan kapara to met so borda ra.

9Kuadrado ya tan dinobli; siamiran pulgada so karokey to tan siamiran pulgada so benlag to.

10Impeket dad saya so apatiran karasig na mabmablin bato: diad ononan dasig pineketan da na sakey a baton rubi, sakey a topasio, tan sakey a garniti;

11diad kumadwan dasig, pineketan da na sakey a baton ismiralda, sakey a sapiro, tan sakey a diamanti;

12diad kumatlon dasig, pineketan da na sakey a baton hasinto, sakey ya agata, tan sakey ya amatista;

13diad kumapat a dasig, pineketan da na sakey a baton birilo, sakey a kornalina, tan sakey a haspi. Nipeket ira ya ed saray panangipatoonan a balituk.

14Diad kapag sakey ed sarayan labinduan bato say sakey a ngaran na sakey a lakin anak nen Jacob et nitatak; sikaray pakanudnunotan ed saray labinduan tribu na Israel.

15Nanggawa ra na puron balituk a kadina a para apis na pagew, a singa nilobir a koldon.

16Nanggawa ra na duaran panangipatoonan a balituk tan duaran singsing a balituk, tan impeket da ra yan singsing ed saray tagey a suyok na apis na pagew.

17Impeket dad saramay duaran singsing iray duaran balituk a koldon

18tan impeket day duaran samput na koldon ed saray duaran panangipatoonan, insan impeket da ra ed saray balabal na ipod.

19Nanggawa ra na duaran singsing a balituk tan impeket da ra ed saray leksab a suyok na apis na pagew diad akindalem na samput ya abay na ipod.

20Nanggawa ni ra na duaran singsing a balituk tan impeket da ra ed leksab na arap na duaran balabal na ipod, diad abay na tupig tan tagtagey na balibaliy inkalagan balkes.

21Onung na ingganggan na Katawan ed kinen Moises, insinger da na asul a koldon iray singsing na apis na pagew ed saray singsing na ipod, pian say apis na pagew et mansiansiad tagtagey na balkes tan ag onlokak.

Say Impanggawad Arum a Kawes na Papari(Exo. 28:31-43)

22Say intiron andokey a kawes ya onlatup ed ipod et agawa ed asul ya abel.

23Say lewlew a pangisolungan na olo et initdan na patalker a singa lewlew na kawes, pian ag napilat.

24-26Diad liber-liber na saloy to pineketan da na saray granada a puron linen tan ginawad asul, purpura, tan ambalangan tinebey, tan insaletsalet da ray kampanilya a puron balituk, onung na ingganggan na Katawan ed kinen Moises.

27Nanggawa ra na saray pinon linen a kawes ya antikey so taklay a para si Aaron tan saray lalakin anak to,

28nanggawa ra met na turban a pinon linen, saray sakub na toktok na olo a pinon linen,

29tan say balabal ya abel a pinon linen a ginawad asul, purpura, tan ambalangan tinebey tan binordaan da, onung na ingganggan na Katawan ed kinen Moises.

30Nanggawa ra na arkos a puron balituk a sikatoy masanton tanda na inkisaklang, tan tinatakan da na “Nisaklang ed Katawan.”

31Insinger da na asul a koldon diad arap na turban onung na ingganggan na Katawan ed kinen Moises.

Say Impakasumpal ed saray Kimey(Exo. 35:10-19)

32Asumpal a siansia iray amin a kimey ed Tuldan Ayamay Katawan. Saray Israelita ginawa ray amin a bengatla onung na ingganggan na Katawan ed kinen Moises.

33Inyakar dad kinen Moises imay Tulda tan amin a kagawaan to, saray panagkawit to, saray tabla to, saray balewet to, saray lusek to, tan saray dapan to;

34say ambalangan pinamagan katat na karniron kalakyan a para sakbung to; say pinon katat a sakbung to; say sanib a kurtina;

35say Kaban na Sipanan a nankarga na saray tapyak a bato, saray tiken to, tan say sakub to;

36say lamisaan tan amin a kagawaan to, tan saray tinapay a nibagat ed Dios;

37say puron balituk a panangipatoonan na lamparaan, saray lamparaan to, amin a kagawaan to, tan say larak a para saray lamparaan;

38say altar a balituk; say larak a panagpoyuk; say ambalingit ya insinso; say kurtina na lolooban na Tulda;

39say altar a gansa a pati parilya to a gansa, saray tiken to, tan amin a kagawaan to; say talyasi a panagorasan a pati ansagan to;

40saray kurtina na pinagkaalar a pati saray lusek to tan saray dapan to; say kurtina na lolooban na pinagkaalar tan saray lobir to; saray palpal na Tulda; amin a kagawaan ya ikana ed dalem na Tulda;

41saray balibalin kawes a nepeg ya isolung na saray papari no onloob irad Masanton Pasen—saray masanton kawes nen Aaron a pari tan saray lalakin anak to.

42Saray Israelita ginawa ra yan amin a kimey onung na ingganggan na Katawan ed kinen Moises.

43Inapiapiger iran ninengneng nen Moises, et anengneng ton ginawa ray amin a bengatla, onung na ingganggan na Katawan. Kanyan binindisionan nen Moises ray totoo.