1Ag abayag, dinogpaan lamet nen David iray Filisteo tan tinalo to ra. Inekal tod pakaoley da so siudad na Gat tan saray kaliber-liber ton bario.
2Tinalo to met iray Moabita, kanyan nagmaliw iran walad silong na pakaoley to tan nambabayar iray buis ed sikato.
3Insoblay nen David a dinogpaan si Ari Hadadezer na Seba, diad asingger ed lugar na Hamat, nen si Hadadezer et labay ton iletneg so pakaoley tod dalin a kaabay na Ilog na Eufrates.
4Adakep nen David so sanlibon karwahi to, piton libon kumakabayo to, tan duamplon libon arum a sondalo to. Angikera na saray kabayon para sanlasus a karwahi, insan to nilolopuy iray arum.
5Nen saray taga Siria a walad Damasco et angibaki ra na saray sondalon ontulong ed Ari Hadadezer, dinogpaan ira nen David tan pinatey toy duamplo tan duan libon lalaki.
6Insan nankampod Damasco iray sondalo to; saray tagad man et nagmaliw iran walad silong na pakaoley to, kanyan nambabayar iray buis ed sikato. Impanatalo na Dios si David ed anggan iner a pasen.
7Asamsam nen David iray balituk a samper a sankaawit na saray opisyal nen Hadadezer, tan inawit to ra ed Jerusalem.
8Amayamay met so nala ton gansa ed Tibha tan Cun, saray siudad ya ooleyan nen Hadadezer. (Diad arapen a panaon ginawa nen Solomon ira yan gansa a balbaleg a kawa, saray lusek, tan saray ikakana ed Timplo.)
9Akabatan nen Ari Toi na Hamat a tinalo nen David iray amin a sondalo nen Hadadezer.
10Kanyan imbaki toy lakin anak to a si Hadoram a mangilugay ed kinen Ari David tan mangitanduro ed sikato lapud impanalo tod kinen Hadadezer, ya amimpigan akalaban nen Toi. Initdan nen Hadoram si David na saray rigalon ginawad balituk, pilak, tan gansa.
11Insaklang nen David ira ya ed Katawan a pati saray pilak tan balituk a nalnala tod saray bansan tinatalo to—Edom, Moab, Ammon, Filistia, tan Amalec.
12Si Abisai a lakin anak nen Sarvia et tinalo to ray Edomita diad Patar na Asin tan pinatey toy labinwalon libod sikara.
13Nankampod nandoroman lugar na Edom iray sondalo to, kanyan nagmaliw a walad silong na pakaoley nen David iray tagad man. Impanatalo na Katawan si David ed anggan iner a pasen.
14Nanoley si David ed intiron Israel; maptek tan anggapoy nilabi so impanoley tod saray totoo.
15Si Joab a sananey ya anak nen Sarvia so pangulo na saray sondalo; si Josafat a lakin anak nen Ahilud so makaoley ed pansulat na awaran;
16si Sadoc a lakin anak nen Ahitob tan si Ahimelec a lakin anak nen Abiatar et sikaray papari; si Seraya so sikritario na palasio;
17si Benaya a lakin anak nen Joiada so makaoley ed saray umaantabay ed kinen David—salanti saray Kereteo tan saray Peleteo; tan saray lalakin anak nen Ari David et atatagey a betang so ineegnaan da diad impanlingkur dad sikato.
Who We AreWhat We EelieveWhat We Do
2025 by iamachristian.org,Inc All rights reserved.
